តើ iPhone តម្លៃទាបនឹងមានរាងដូចនេះមែនទេ?
កាលពីថ្ងៃម្សិលមិញប្រិយមិត្តទើបតែទទួលបានព័ត៌មានទាក់ទងនឹងរូបរាង iPhone 5S ដោយឡែកសម្រាប់ពេលនេះយើងខ្ញុំសូមបង្ហាញនូវរូបភាពគំរូរបស់ទូរស័ព្ទ iPhone តម្លៃទាបដែលទទួលបានតាមរយៈប្រភពពីគេហទំព័រ AppleInsider ។ សូមបញ្ជាក់ថារូបភាពដែលបង្ហាញក្នុងអត្ថបទនេះគឺជារូបភាព 3D ដែលត្រូវបានរចនាឡើងដោយផ្អែកលើការស្រមៃនិងចំណេះដឹងរបស់អ្នកជំនាញ គំរូ iPhone តម្លៃទាបនេះត្រូវបានរចនាឡើងស្រដៀងនឹង iPod touch ។
គួររំលឹកផងដែរថាបើតាមសេចក្ដីរាយការណ៍របស់ប្រភពមួយចំនួនដែលបានរាយការណ៍ពីសម្ដីរបស់អ្នកវិភាគថាដើម្បីឲ្យ Apple អាចលក់ទូរស័ព្ទទំនើប iPhone ស៊េរីថ្មីណាមួយដែលនឹងចេញនាពេលអនាគតក្នុងតម្លៃទាបនោះក្រុមហ៊ុននឹងផលិតតួទូរស័ព្ទនោះពីប្លាស្ទិក ។ កាលពីដើមឆ្នាំនេះពពកក៏ធ្លាប់ចេញអត្ថបទមួយដែរដោយបង្ហាញពីគំរូ iPhone តម្លៃទាបដែលមានតួផ្នែកខាងក្រោយធ្វើពីប្លាស្ទិកពណ៌ថ្លា ។ អ្នកនាយករបស់ក្រុមហ៊ុន Pegatron លោក T.H. Tung បានមានប្រសាសន៍ថាទូរស័ព្ទទំនើបរបស់ក្រុមហ៊ុន Apple ដែលប្រិយមិត្តតែងតែឮថាជា iPhone តម្លៃទាបនោះគឺមិនមែនមានតម្លៃទាបនោះទេ គឺគ្រាន់តែមានតម្លៃមធ្យមតែប៉ុណ្ណោះ ។ ប្រសាសន៍របស់លោក T.H. Tung នេះគឺដូចគ្នាទៅនឹងប្រភពមួយពីមុនដែលថាទូរស័ព្ទទំនើបរបស់ក្រុមហ៊ុនដែលប្រភពជាច្រើនថាជា iPhone តម្លៃទាបនោះនឹងមានតម្លៃប្រហែល $350 ។
បើផ្អែកលើការយល់ឃើញរបស់ប្រិយមិត្ត តើក្រុមហ៊ុន Apple អាចនឹងផលិតទូរស័ព្ទទំនើបដែលមានតម្លៃត្រឹមតែ $99 ដែរឬទេ?
