ប្រទះឃើញ សពបុរស ម្នាក់ត្រូវបាន គេប្លុងចោល សង្ស័យអំពើឃាតកម្ម
កណ្ដាល ៖ បុរសម្នាក់ ពាក់អាវពណ៌ខ្មៅខោជើងវែង ខោវប៊យ ត្រូវបានគេប្លុងចោលនៅភូមិបត់តាជី សង្កាត់តាក្ដុល ក្រុងតាខ្មៅ កាលពីរសៀលថ្ងៃទី២៦ ខែមិថុនា ឆ្នាំ២០១៣។
ប្រភពព័ត៌មានឲ្យដឹងថា បុរសរូបនោះសង្ស័យត្រូវឃាតកសម្លាប់ ហើយញាត់ក្នុងគូថរថយន្ត ដឹកយកមកប្លុងចោលនៅទីតាំងខាងលើបង្កឲ្យមានការភ្ញាក់ផ្អើល ដល់ប្រជាពលរដ្ឋ និងអាជ្ញាធរមានសមត្ថកិច្ចនៅតំបន់នោះ។
ប្រភពព័ត៌មានដាច់ដោយឡែកមួយទៀតបានឲ្យដឹងថា កាលពីថ្ងៃទី២៥ ខែមិថុនា ឆ្នាំ២០១៣ មានករណីផ្ទុះអាវុធមួយនៅក្នុងភូមិគ្រឹះលោកឧត្តមសេនីយ៍ឯកមួយរូប នៅក្រសួងមហាផ្ទៃ ដែលទីតាំងនោះបានជួលទៅឲ្យជនជាតិចិនស្នាក់នៅ ស្ថិតក្នុងភូមិព្រែកហូរកើត សង្កាត់ព្រែកហូរ ក្រុងតាខ្មៅ។ ប្រភពបានបន្តថា ក្រោយពេលឮសំឡេងផ្ទុះអាវុធនោះ សមត្ថកិច្ចបានត្រួតពិនិត្យក្នុងភូមិគ្រឹះកើតហេតុ ក៏បានប្រទះឃើញឈាមមានបាតដៃមនុស្សផងពាសពេញបន្ទប់ទទួលភ្ញៀវ និងជញ្ជាំងមួយចំនួនទៀត មិនតែប៉ុណ្ណោះក៏មានស្នាមសក់ជ្រុះនៅក្នុងទីតាំងកើតហេតុនោះទៀតផង។ សមត្ថកិច្ចបានត្រួតពិនិត្យទីតាំងនោះ ប៉ុន្តែមិនឃើញមានជនជាតិចិន ស្នាក់នៅនោះទេ។
ករណីទាំង២នេះសមត្ថកិច្ចមិនទាន់ហ៊ានសន្និដ្ឋានថា ជនដែលត្រូវគេសម្លាប់ញាត់ចូលក្នុងរថយន្តយកមកប្លុងចោលនោះ ជាករណីតែមួយជាមួយនឹងករណីផ្ទុះអាវុធនៅភូមិគ្រឹះលោកឧត្តមសេនីយ៍នោះយ៉ាងណានោះទេ។ គ្រាន់តែដឹងថាជនរងគ្រោះធ្វើការនៅក្រុមហ៊ុនឯកជន ហើយជិះរថយន្តម៉ាកឆ្លាមដើរទារលុយគេ ស្រាប់តែមកដល់កន្លែងកើតហេតុមានម៉ូតូមួយគ្រឿងបានតាមប្រកៀកប្រកិតរួចបាញ់សំដៅជនរងគ្រោះប្លន់យកលុយគេចខ្លួនបាត់តែម្ដង៕via:yolprom
