ក្រសួងការ បរទេសកម្ពុជា ទាត់ចោលសេចក្តី ថ្លែងការណ៍ សហភាពអឺរ៉ុប ស្តីពីការបោះឆ្នោត
 |
| រូបតំណាង |
ប្រតិកម្មរបស់ក្រសួងការបរទេសកម្ពុជា ធ្វើទ្បើងមួយថ្ងៃ បន្ទាប់ពីការិយាល័យសហភាពអឺរ៉ុបប្រចាំកម្ពុជា ចេញផ្សាយសេចក្តីថ្លែងការណ៍របស់ខ្លួន ដោយលើកឡើងថា ការបោះឆ្នោតដោយតម្លាភាព និងការជឿទុកចិត្តបាន គឺជាមូលដ្ឋានសំខាន់ ក្នុងការពង្រឹងលទ្ធិប្រជាធិបតេយ្យ និងធានាការអភិវឌ្ឍន៍ប្រទេសកម្ពុជា នៅពេលអនាគត។ សហភាពអឺរ៉ុប ក៏បានលើកឡើងពីការប្រើប្រាស់ប្រព័ន្ធផ្សព្វផ្សាយ ដោយសមធម៌ និងទប់ស្កាត់រាល់ការប្រើប្រាស់ទ្រព្យសម្បត្តិរដ្ឋ នៅក្នុងយុទ្ធនាការឃោសនាបោះឆ្នោតចាប់ពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣។
ក្នុងកំណត់ទូតរបស់ក្រសួងការបរទេសកម្ពុជា ផ្ញើទៅកាន់ប្រតិភូសហភាពអឺរ៉ុបប្រចាំកម្ពុជា ក្រសួង ថ្លែងថា ក្នុងនាមជារដ្ឋមានអធិបតេយ្យ និងឯករាជ្យ រដ្ឋាភិបាលកម្ពុជា មិនអាចទទួលយកសេចក្តីថ្លែងការណ៍របស់ប្រតិភូសហភាពអឺរ៉ុបនៅកម្ពុជាបានទ្បើយ។ ក្រសូងការបរទេសកម្ពុជា សុំឲ្យប្រតិភូសហភាពអ៊ឺរ៉ុប គោរពឲ្យបានពេញលេញនូវមាត្រា៤១ នៃអនុសញ្ញាទីក្រុងវីយែន ស្តីពីទំនាក់ទំនងការទូត ដែលចែងថា រដ្ឋជាភាគីមានកាតព្វកិច្ចមិនជ្រៀតជ្រែកកិច្ចការផ្ទៃក្នុងរបស់ប្រទេសណាមួយទ្បើយ។
កំណត់ត្រា បញ្ជាក់ថា រដ្ឋាភិបាលកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន តែងតែប្តេជ្ញាជាស្រេចហើយ ឲ្យមានការបោះឆ្នោតដោយសេរី ត្រឹមត្រូវ យុត្តិធម៌ មានតម្លាភាព និងប្រជាធិបតេយ្យ ដូចដែលបានអនុវត្តកន្លងមក។
គូររំលឹកថា សហភាពអឺរ៉ុប បានប្រកាសថា ខ្លួននឹងមិនបញ្ជូនអ្នកសង្កេតការណ៍ មកឃ្លាំមើលដំណើរការបោះឆ្នោតជាតិ នៅថ្ងៃទី២៨ ខែកក្កដា ខាងមុខទេ៕ by VOD
