ស្រវឹងស្រាជិះម៉ូតូលឿនដូចហោះទៅបុកម៉ូតូស្រវឹងដូចគ្នារងរបួសធ្ងន់ទាំងសងខាង
ភ្នំពេញ ៖ បុរសម្នាក់បានបើកម៉ូតូមួយគ្រឿងក្នុងស្ថានភាពស្រវឹងជោក ជ្រុលចង្កូតទៅបុកម៉ូតូមួយគ្រឿងទៀតកំពុងធ្វើដំណើរច្រាសទិសគ្នាយ៉ាងពេញទំហឹងបណ្ដាលឲ្យដួលបោកទៅនឹងថ្នល់រងរបួសធ្ងន់ទាំងសងខាង ត្រូវបានរថយន្តសង្គ្រោះដឹកយកទៅកាន់មន្ទីរព្រះកុសុមៈដើម្បីជួយសង្គ្រោះផងដែរ។
ហេតុការណ៍នេះកើតឡើងកាលពីវេលាម៉ោង៧និង៤៥នាទីល្ងាច ថ្ងៃទី២៣ ខែមិថុនា ឆ្នាំ ២០១៣ស្ថិតតាមបណ្តោយផ្លូវបេតុងក្នុងភូមិសាមគ្គី សង្កាត់ត្រពាំងក្រសាំង ខណ្ឌពោធិ៍សែនជ័យរាជធានីភ្នំពេញ។
ជនរងគ្រោះទាំងពីរនាក់នោះទី១. ឈ្មោះវុធចាន់ណា ភេទប្រុសអាយុ២១ឆ្នាំមុខរបរកម្មកររោងចក្រ បានរងរបួសផុងលលាដ៍ក្បាល ស្នាក់នៅភូមិកើតហេតុខាងលើជិះម៉ូតូមួយគ្រឿងម៉ាកវ័នដែឡាវពណ៌ខៀវពាក់ស្លាកលេខភ្នំពេញ 1AW-1962។ ទី២. ឈ្មោះ ចេ សុធី អាយុ៣១ឆ្នាំមុខរបររត់ម៉ូតូឌុបរស់នៅភូមិចុងកៅស៊ូ សង្កាត់សំរោងអណ្តែត ខណ្ឌសែនសុខ រងរបួសបាក់ឆ្អឹងថ្គាមទាំងសងខាង បើកម៉ូតូមួយគ្រឿងម៉ាកវីវ៉ាពាក់ស្លាកលេខភ្នំពេញ1AJ-2124។
សាក្សីកន្លែងកើតហេតុបានឲ្យដឹងថា មុនពេលកើតហេតុគេឃើញយុវជនម្នាក់បើកម៉ូតូមួយគ្រឿងម៉ាកវ័នដឺឡាវ ក្នុងទិសដៅពីកើតទៅលិចក្នុងស្ថានភាពស្រវឹងស្រាជោក លុះដល់ចំណុចកើតហេតុ ក៏បានបុកជាមួយម៉ូតូវីវ៉ាពេញទំហឹងបណ្តាលរងរបួសធ្ងន់ទាំងពីរនាក់តែម្តង។ ក្រោយពេលកើតហេតុសមត្ថកិច្ចបានចុះទៅដល់កន្លែងកើតហេតុ រួចហៅរថយន្តសង្គ្រោះដឹកយកជនរងគ្រោះទៅកាន់មន្ទីរព្រះកុសុមៈហៅមន្ទីរពេទ្យលោកសង្ឃដើម្បីជួយសង្គ្រោះ។
ចំណែកម៉ូតូទាំងពីរត្រូវបានសមត្ថកិច្ចយកទៅរក្សាទុកនៅអធិការដ្ឋានដើម្បីរង់ចាំភាគីទាំងសងខាងចូលខ្លួនដោះស្រាយតាមផ្លូវច្បាប់៕
Resource by : kpt-news.com.kh
