អផ្សុកពេកមកពីខេត្តកណ្តាលចូលទិញថ្នាំញៀននៅម្តុំពេទ្យលោកសង្ឃត្រូវប៉ូលិសចាប់ខ្លួនបាន៣ នាក់
ភ្នំពេញ ៖ មហាជននាំគ្នាឆ្ងល់រឿងទីផ្សារលក់គ្រឿងញៀនលួចលាក់នៅមុខពេទ្យលោកសង្ឃចាប់ បានតែអ្នកទិញ ប៉ុន្តែរកអ្នកលក់ និង ផលិតមិនឃើញ។ បុរស៣នាក់ត្រូវបានកំលាំងសមត្ថកិច្ចប៉ូលិសខណ្ឌសែនសុខចាប់ខ្លួនខណៈពេលពួកគេបានទិញថ្នាំញៀន១កញ្ចប់នៅម្តុំមុខពេទ្យលោកសង្ឃស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែន សុខ កាលពីវេលាម៉ោង២ រំលងអាធ្រាត្រឈានចូលថ្ងៃទី២៦ ខែមិថុនា ឆ្នាំ២០១៣ ដែលប៉ូលិសបាន ចោទប្រកាន់ពីបទប្រើប្រាស់គ្រឿងញៀនខុសច្បាប់ដែលជាញឹកញយចាប់បានអ្នកទិញ៤ទៅ៥ដង ក្នុង១ខែដែលប៉ូលិសខណ្ឌសែនសុខតែងតែចាប់ខ្លួននៅទីនោះតែកំរចាប់អ្នកលក់ និង អ្នកផលិតបានណាស់។
ក្រុមមនុស្សចំនួន៣នាក់ដែលត្រូវបានចាប់ខ្លួនខាងលើទី១ឈ្មោះ វង វ៉ាន់ ភេទប្រុស អាយុ២៨ឆ្នាំ មុខរបរ កម្មករសំណង់ មានទីលំនៅក្នុងក្រុងតាខ្មៅខេត្តកណ្តាល ទី២. ចិន ងួន ភេទប្រុស អាយុ២១ឆ្នាំ មុខរបរ កម្មករសំណង់ រស់នៅក្រុងតាខ្មៅខេត្តកណ្តាល និង ទី៣. ញឹម សៅម៉េត ភេទប្រុស អាយុ២៤ឆ្នាំ មុខរបរ ជាអ្នកចំរៀង ស្នាក់នៅក្នុងសង្កាត់បឹងកក់២ ខណ្ឌទួលគោក។
ពាក់ព័ន្ធទៅនឹងការចាប់ខ្លួនក្រុមជនជាប់ចោទទាំង៣នាក់នោះ មន្ត្រីប៉ូលិសមូលដ្ឋាននិយាយ ថា ជារៀងរាល់យប់លោកអធិការតែងតែបញ្ជូនកំលាំងប៉ូលិសជាច្រើននាក់អោយចាត់ចែងយាមគ្រប់ច្រកផ្លូវចេញ ចូល ក្នុងម្តុំភូមិត្រពាំងឈូក មុខពេទ្យលោកសង្ឃ ដើម្បីរង់ចាំចាប់ខ្លួនអ្នកមកទិញថ្នាំ ញៀននៅទៅនោះពោលគឺ បើមានអ្នកជិះម៉ូតូ ឬ ដើរចូលមិនឃាត់ឆែកទេ តែបើមានអ្នកដើរចេញ មកពីទៅនោះគឺត្រូវឃាត់ ខ្លួនឆែកឆេរតែម្តង ជាពិសេសចាប់ពីម៉ោង១០យប់ឡើងទៅ ជាក់ស្តែងដូច ជាបុរសទាំង៣នាក់ខាងលើនេះជាដើម ពេលកាត់ចូលទៅប៉ូលិសមិនឆែកនោះទេ តែពេលចេញមកវិញគឺឃាត់ខ្លួនឆេកឆេរតែម្តង ហើយរកឃើញថ្នាំញៀនប្រភេទម៉ាទឹកកក១កញ្ចប់នៅក្នុងហោប៉ៅ ជនជាប់ចោទឈ្មោះ វង វ៉ាន់។
នៅក្នុងការឃាត់ខ្លួនពួកគេនោះប៉ូលិសក៏បានដកហូតម៉ូតូ១គ្រឿង ម៉ាកសេ១២៥ សេរី២០០៨ ពាក់ស្លាកលេខ ភ្នំពេញ1Y 1920 រួមទាំងសម្ភារៈផ្សេងៗទៀតដែលពាក់ព័ន្ធ ហើយបានឃុំខ្លួនបណ្តោះអាសន្ននៅក្នុងអធិការដ្ឋាន។
ប្រជាពលរដ្ឋនៅតំបន់ម្តុំមុខពេទ្យលោកសង្ឃនិយាយរិះគន់ថា ហេតុអ្វីបានជាប៉ូលិសចាប់ បានតែអ្នកទិញគ្រឿងញៀន មិនព្រមចាប់ខ្លួនអ្នកលក់ និង អ្នកផលិតសោះអញ្ចឹង ហើយបញ្ហានេះខាងប៉ូលិសក្រុង និង ក្រសួងគួរតែមានវិធានការណ៍ចំពោះរឿងនេះផង៕
ប្រភព : កម្ពុជាថ្មី
