កូនៗដណ្តើមកាំភ្លើងខ្លីពីឪពុកប៉ងបាញ់សម្លាប់នៅផ្ទះប្រពន្ធចុង
ភ្នំពេញ ៖ បុរសក្មេងៗ២នាក់ បងប្អូន និង ម្តាយរបស់គេម្នាក់ផងនោះត្រូវកំលាំសមត្ថកិច្ចប៉ូលិសព្រហ្មទណ្ឌ ខណ្ឌសែនសុខឡោមព័ទ្ធចាប់ខ្លួនជាក់ស្តែងភ្លាមៗយ៉ាងលំបាកដោយសារពួកគេបានវាយតប់ទៅ លើស្ត្រីម្នាក់បណ្តាលអោយដេកដួលលើដីដោយចោទប្រកាន់ថាជាប្រពន្ធចុងលួចលាក់របស់ឳពុកខ្លួន ហើយខណៈពេលនោះដែរឳពុករបស់គេមកទាន់ពួកគេបែរជានាំគ្នាចាប់គ្រៀកឳពុកដណ្តើមយកកាំភ្លើងពីចង្កេះ ហើយអាមេបញ្ចូលគ្រាប់ប៉ងបាញ់សម្លាប់ឳពុកតែសំណាងល្អគ្រាប់ស្អុយបាញ់មិនផ្ទុះ។
ទំនាស់នេះបានកើតឡើងកាលពីវេលាម៉ោង ៧ និង ៣០នាទីយប់ថ្ងៃទី២៣ ខែមិថុនា ឆ្នាំ២០១៣ នៅចំណុចផ្ទះលេខ១៨A ផ្លូវបេតុង ភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។ សាក្សីនៅកន្លែងកើតហេតុរួមទាំងសំដីរបស់សមត្ថកិច្ចប៉ូលិសមូលដ្ឋានបានិយាយថា នៅមុនពេលកើតហេតុជនរងគ្រោះឈ្មោះ គួយ សុខា ភេទប្រុស អាយុ៤១ឆ្នាំ មុខរបរ មន្ត្រីប៉ូលិសសង្កាត់ឃ្មួញ (នាមសម្ងាត់ ៣៣.E) មានប្រពន្ធទី១ឈ្មោះ ចាន់ សុភា អាយុ៤០ឆ្នាំ មានទីលំនៅក្នុងភូមិសំរោង សង្កាត់ឃ្មួញ បច្ចុប្បន្នមានកូនប្រុស២នាក់ ហើយកូនបងឈ្មោះ គួយ សុខេង អាយុ១៨ឆ្នាំ កូនប្អូនឈ្មោះ គួយ សុឃុន អាយុ១៥ឆ្នាំ។
ប្រភពដដែលបានបន្តថា ក្រោយមកជនរងគ្រោះ គួយ សុខា បានទំនាក់ទំនងស្រីក្មេងម្នាក់ ឈ្មោះ គង់ ចាន់ស៊ីណា អាយុ៣៤ឆ្នាំ ធ្វើជាប្រពន្ធចុង ហើយក៏កើតជាជម្លោះទាស់ទែងគ្នាជាមួយ ប្រពន្ធដើមរហូតលែងលះគ្នា។ លុះនៅយប់ថ្ងៃកើតហេតុឈ្មោះ គួយ សុខា បានឌុបប្រពន្ធចុងឈ្មោះ ស៊ីណា ទៅផ្ទះ(ចំណុចកើតហេតុ) រួចក៏ត្រឡប់ទៅវិញម្នាក់ឯងសំដៅទៅផ្ទះប្អូនស្រីបំណងផ្ញើសម្ភារៈ រួចក៏ត្រឡប់ទៅផ្ទះប្រពន្ធចុងវិញក៏ស្រាប់តែឃើញប្រពន្ធដើម និង កូនប្រុសទាំង២នាក់ព្រួតគ្នាវាយ ទៅលើនាង គង់ ចាន់ស៊ីណា ជាប្រពន្ធចុងដេកដួលសន្លប់លើដី។
ខណៈពេលដែលឈ្មោះ គួយ សុខា ទៅដល់ចំណុចកើតហេតុពុំទាន់បានចុះពីលើម៉ូតូផង ក៏ត្រូវកូនៗទាំង២ស្ទុះមកគ្រៀក ហើយដណ្តើមកាំភ្លើងពីចង្កេះ រីឯកូនច្បងបានដណ្តើមកាំភ្លើងពីប្អូន យកមកអាមេបញ្ចូលគ្រាប់បំរុងបាញ់សម្លាប់ទៅលើឳពុក តែសំណាងល្អគ្រាប់ស្អុយបាញ់មិនផ្ទុះ ទើបមានការប្រតាយប្រតបគ្នា ហើយឳពុកមានឱកាសស្រែកតាមវិទ្យុទាក់ទងហៅកំលាំងប៉ូលិស បន្ថែមដើម្បីមកអន្តរាគមន៍បានទាំង៣នាក់ ម្តាយ និង កូនៗភ្លាមៗតែម្តង។ពាក់ព័ន្ធទៅនឹងបញ្ហានេះ ភាគីកូនប្រុស និង អ្នកជិតខាងបាននិយាយថា លោក គួយ សុខា អោយតែស្រវឹងតែងតែដកកាំភ្លើង មកភ្ជង់ប្រពន្ធដើម ហើយនៅយប់ថ្ងៃកើតហេតុលោក គួយ សុខា ក៏បានដកកាំភ្លើងភ្ជង់ប្រពន្ធ និង កូនៗដែរ តែក៏ត្រូវកូនដណ្តើមកាំភ្លើងបានមកវិញ។
ក្រុមជនជាប់ចោទកំពុងត្រូវបានឃុំខ្លួននៅក្នុងបរិវេណអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាការតាមបណ្តឹងចោទប្រកាន់របស់ជនរងគ្រោះទាំង២នាក់៕
Resource by : kpt-news.com
