ក្រសួងមហារផ្ទៃចេញសេចក្តីណែនាំ៩ចំណុច ដើម្បីសម្រួលដំណើរការបោះឆ្នោត
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈបញ្ជាការសន្តិសុខអចិន្ត្រៃយ៍ កាលពីថ្ងៃទី២១ ខែមិថុនា ឆ្នាំ២០១៣ បានចេញណែនាំចំនួន ៩ចំណុច ដើម្បីចាត់វិធានការរក្សាសន្តិសុខ និងសណ្តាប់ធ្នាប់សាធារណៈបំរើដល់ដំណើរការបោះឆ្នោត នៅថ្ងៃអាទិត្យទី២៨ ខែកក្កដា ឆ្នាំ២០១៣ ឲ្យទទួលបានជោគជ័យ និងប្រព្រឹត្តិទៅដោយរលួន។
នៅក្នុងសេចក្តីណែនាំ បានបញ្ជាក់ថា ដោយគណៈបញ្ជាការសន្តិសុខអចិន្ត្រៃយ៍យល់ឃើញ ថា នាពេលថ្មីៗនេះមានការលេចចេញនូវបាតុភាពមួយចំនួន ដែលជាការធ្វើឲ្យល្អក់កករដល់បរិយាកាសបោះឆ្នោត ដូចជា ការគំរាមគំហែង និងការបំភិតបំភ័យខាងនយោបាយ។
ហេតុដូច្នេះ ដើម្បីធានាឲ្យកាន់តែប្រសើរ នូវបរិយាកាសសន្តិសុខ សណ្ដាប់ធា្នប់ របៀបរៀបរយ សម្រាប់ដំណើរការបោះឆ្នោតទាំងមូលលោកឧបនាយករដ្ឋមន្ត្រី ស ខេង បានលើកឡើងនៅក្នុងសេចក្តីណែនាំចំនួន៩ចំនុច ដល់អង្គភាពក្រោមឱវាទរបស់ខ្លួនសម្រាប់យកទៅអនុវត្តន៍។
ក្នុងសេចក្ដីណែនាំនោះបានបញ្ជាឲ្យគណៈបញ្ជាការសន្តិសុខអចិន្ត្រៃយ៍គ្រប់លំដាប់ថ្នាក់ទាំងអស់ឲ្យយកចិត្តទុកដាក់ក្នុងការបញ្ជាដឹកនាំចាត់ចែងកម្លាំង និងវិធានការផ្សេងៗ ក្នុងការបំរើដល់ដំណើរការរៀបចំការបោះឆ្នោតឲ្យបានរលូន និងទទួលបានជោគជ័យផងដែរ។
គួរបញ្ជាក់ផងដែរថា ការចេញនូវសេចក្ដីណែនាំនេះ ត្រូវធ្វើឡើងខណៈដែលយុទ្ធនាការឃោសនាបោះឆ្នោតនឹងខិតជិតមកដល់។
ហើយព្រមជាមួយគ្នានេះដែរ ដោយសារតែមានករណីមិនប្រក្រតីមួយចំនួនបានកើតឡើងជាបន្តបន្ទាប់ ដូចជាករណី ផ្ដួលរំលំផ្លាក ការលាបពណ៌ផ្សេងៗ នៅលើស្លាកគណបក្សនានាជាដើម។ ការបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៥ នឹងប្រព្រឹត្តទៅនៅថ្ងៃទី២៨ ខែកក្កដា ឆ្នាំ២០១៣ខាងមុខនេះ៕
Resource by : vayofm.com
Resource by : vayofm.com
