ម៉ូតូ២គ្រឿងបុកគ្នាពេញទំហឹងបណ្ដាលឲ្យមនុស្សប្រុសស្រី៥នាក់របួសធ្ងន់ស្រាល
កំពង់ឆ្នាំង ៖ មនុស្សប្រុសស្រី៥នាក់បានរងរបួសធ្ងន់ និងស្រាល នៅក្នុងករណីគ្រោះថ្នាក់ចរាចរណ៍ម៉ូតូនិងម៉ូតូបុកគ្នាពេញទំហឹងកាលពីវេលាម៉ោង៣និង៣០នាទីល្ងាចថ្ងៃទី២៤ ខែមិថុនា ឆ្នាំ២០១៣ នៅលើផ្លូវជាតិលេខ៥ មុខធនាគារអេស៊ីលីដាក្នុងភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា ក្នុងពេលកើតហេតុគេឃើញម៉ូតូសង់កូរ៉េពណ៌ក្រហមអត់ស្លាកលេខ បើកបរដោយឈ្មោះ សន តក់ អាយុ២០ឆ្នាំ ភេទប្រុស ឌុបឈ្មោះ រឿន ប៉ូ លីន អាយុ១៩ឆ្នាំពីក្រោយ។ ពួកគេរស់នៅភូមិធម្មយុត្តិ សង្កាត់ប្អេរ ក្រុងកំពង់ឆ្នាំង បានបើកបរពីកើតមកលិចបត់មកត្បូងមុខធនាគារអេស៊ីលីដា។ ពេលនោះមានឌុបម៉ូតូឌ្រីម សេ១២៥ ស៊េរី០៥ ពណ៌ខ្មៅអត់ស្លាកលេខឌុបនារី២នាក់មកពីរោងចក្រអ៊ឹមវ៉េក្នុងទិសដៅពីត្បូងមកជើងបើកបរដោយឈ្មោះ ពៅ អាយុ២៧ឆ្នាំ ភេទប្រុស រស់នៅភូមិក្តីត្នោត ឃុំស្រែថ្មី ស្រុករលាប្អៀរ ដោយបើកយ៉ាងលឿនមកដល់ចំណុចកើតហេតុរវល់ងាកក្រោយក៏បានបុកម៉ូតូសង់កូរ៉េចំពីមុខពេញទំហឹងតែម្តង បណ្តាលអោយមនុស្សប្រុសស្រី៤នាក់រងរបួសស្រាល ចំណែកអ្នកបើកម៉ូតូឌ្រីម០៥ សន្លប់ឈឹងរងរបួសធ្ងន់។
ក្រោយពេលកើតហេតុ អ្នករងរបួសធ្ងន់ត្រូវបានគេដឹកតាមរ៉ឺម៉កម៉ូតូបញ្ជូនយក ទៅសង្គ្រោះនៅមន្ទីរពេទ្យបង្អែកខេត្ត ចំណែកម៉ូតូទាំង២ត្រូវបានសមត្ថកិច្ចអូសយកទៅរក្សាទុកនៅអធិការដ្ឋាននគរបាលក្រុងកំពង់ឆ្នាំង ដើម្បីកសាងសំណុំរឿងដោះស្រាយតាមផ្លូវច្បាប់។
ករណីគ្រោះថ្នាក់ចរាចរណ៍នេះត្រូវបានមហាជន ចោមរោមមើលនៅកន្លែងកើតហេតុនិយាយថា មកពីអ្នកបើកបរម៉ូតូឌុប០៥ ស្រវឹងរវល់ងាកក្រោយមើលស្រីស្នេហ៍ទើបបង្កអោយមានគ្រោះថ្នាក់ ព្រោះថាពេលពួកគាត់ជួយលើកគេដាក់លើរ៉ឺម៉កម៉ូតូ ដឹកយកទៅមន្ទីរពេទ្យគេបានធុំក្លិនស្រាហួងចេញពីអ្នករបួសធ្ងន់រូបនោះ៕
ប្រភព : កម្ពុជាថ្មី
