នាយ ក្រូចចាប់អាជីពពិធីករមួយទៀត
ទន្ទឹមនឹងអាជីពជាតារាកំប្លែង និងតារាភាពយន្តទទួលបានការគាំទ្រពីទស្សនិកជនថ្មីៗនេះ នាយ ក្រូច ទើបតែចាប់អាជីពថ្មីមួយទៀតគឺពិធីករនៅស្ថានីយទូរទស្សន៍ CTN។
កម្មវិធីពីរនៅស្ថានីយទូរទស្សន៍ CTN ដែលនាយ ក្រូច ទើបតែចូលទៅកាន់ជាពិធីករ កាលពីពេលថ្មីៗ គឺកម្មវិធី “កូនភ្លោះខុសសញ្ជាតិ” និងកម្មវិធី” សុខគា លក្ខិណា ប៊ីអាយជី ក្រូច អ៊ីត” ដែលកម្មវិធីនេះ ទើបបន្ថែមលោក និងប្អូនស្រីចូលធ្វើ។ ការក្លាយជាពិធីករបានធ្វើឱ្យលោករំភើប ហើយសប្បាយចិត្តចំពោះតំណែងមួយនេះ។
តារាកំប្លែងរូបនេះបានប្រាប់ Sabay ថា លោកទើបទទួលបានការទុកចិត្តពីអ្នកគ្រប់គ្រងកម្មវិធីដើម្បីធ្វើជាពិធីករនៅក្នុងកម្មវិធីទាំងពីររបស់ស្ថានីយទូរទស្សន៍ខាងលើ។
លោកបានបញ្ជាក់ថា៖ “ទោះជាមិនធ្លាប់ធ្វើជាពិធីករពីមុនក្ដី ប៉ុន្តែខ្ញុំនឹងបញ្ចេញសមត្ថភាពទាំងអស់ដែលខ្ញុំមានដើម្បីធ្វើឱ្យកម្មវិធីទាំងពីរនេះទទួលបានការគាំទ្រពីមហាជនគ្រប់ស្រទាប់វណ្ណៈ។
តារាកំប្លែងសម្ដែងជាតួនាយកម្មក្នុងរឿង “ខ្លាចអី? សើចតើ!” ដែលកំពុងតែទទួលបានការគាំទ្រពីទស្សនិកជន នៅតាមរោងកុននានានៅភ្នំពេញមិនបានព្រួយបារម្ភ ឬភ័យខ្លាចអ្វីទេបើទោះជាមិនដែលធ្វើជាពិធីករពីមុនមកក៏ដោយ។ លោកមានតែសប្បាយចិត្តដោយថ្នាក់លើផ្ដល់ការងារឱ្យជាមួយប្អូនស្រី។
ប្រការធ្វើឱ្យតារាកំប្លែងទទួលបានការគាំទ្រច្រើនពីទស្សនិកជនរូបនេះមិនព្រួយបារម្ភដោយសារតែកម្មវិធីរបស់លោកកាន់ គឺជាកម្មវិធីថតទុក ហើយពិធីករ ពិធីការិនីនៅក្នុងកម្មវិធីទៀតសោតសុទ្ធតែមានសមត្ថភាពអាចធ្វើឱ្យទស្សនិកជនទប់សំណើចមិនបាន។
នាយ ក្រូច បានបន្ថែមទៀតថា លោកទើបតែចូលកាន់កម្មវិធីទាំងពីររបស់ CTN បានមួយខែកន្លងមកហើយ។ លោកថា កម្មវិធីរបស់លោកចាក់ផ្សាយរៀងរាល់ថ្ងៃអាទិត្យនៅក្នុងស្ថានីយទូរទស្សន៍នេះ។
នាយ ក្រូច ត្រៀមនឹងធ្វើតួឯកក្នុងរឿង “ខ្លាចអី? សើចតើ! វគ្គពីរ” ដែលចាងហ្វាងផលិតកម្ម RGB លោក ម៉ៅ រតនា បញ្ជាក់ថា ត្រៀមថតនៅក្នុងខែ កញ្ញា ឆ្នាំ២០១៣ខាងមុខ។
តារាកំប្លែងនាយ ក្រូច កើតនៅថ្ងៃទី ៥ ខែកុម្ភៈ ឆ្នាំ១៩៧៩ ក្នុងខេត្តកំពង់ស្ពឺ។ តារារូបនេះមានប្អូនស្រីម្នាក់ក៏ជាតារាកំប្លែងល្បីឈ្មោះផងដែរ នោះគឺនាង “អ៊ីត” ជាតារាកំប្លែងរួមក្រុមនាយ ពែកមី ដូចគ្នា៕
ប្រភព : សប្បាយ
