បាត់ចិញ្ចៀន១៨ឆ្នាំ មករកឃើញ នៅមើមការ៉ុត ក្នុងចម្ការ
ជារឿងដែលនឹកស្មានមិនដល់មួយ ដែលស្រ្តីម្នាក់បានបាត់ចិញ្ចៀនភ្ជាប់ពាក្យអស់១៦ឆ្នាំ ហើយរកឃើញវិញក្នុងសួនបន្លែក្បែរផ្ទះ។ អ្នកស្រី Lena Paahlsson រស់នៅក្នុងប្រទេសស៊ុយអែតបានចំណាយពេលជាច្រើនឆ្នាំដើម្បីដើររកចិញ្ចៀនភ្ជាប់ពាក្យរបស់គាត់ ដែលបានច្នៃម៉ូដដោយផ្ទាល់ដៃគាត់។
ចិញ្ចៀនដែលបាត់នោះជាប្រភេទចិញ្ចៀនមាសស ដោយមានដាំពេជ្រ ៧គ្រាប់ បានបាត់ក្នុងផ្ទះបាយរបស់គាត់តាំងពីឆ្នាំ១៩៩៥ មកម៉្លេះ។
អ្នកស្រី Lena Paahlsson និងស្វាមីរីករាយក្រោយរកឃើញចិញ្ចៀនភ្ជាប់ពាក្យវិញ
អ្នកស្រី Paahlsson និងគ្រួសាររស់នៅក្នុងកសិដ្ឋានមួយក្នុងទីក្រុង Mora ចំកណ្តាលប្រទេសស៊ុយអែត បានរៀបរាប់ឲ្យដឹងថា គាត់បានដោះចិញ្ចៀននោះទុកក្នុងផ្ទះបាយ ដើម្បីរៀបចំអាហារសម្រាប់ថ្ងៃបុណ្យណូអែលជាមួយកូនស្រីរបស់គាត់ ប៉ុន្តែក្រោយពេលធ្វើការងារចប់ គាត់រកចិញ្ចៀននោះមិនឃើញនៅកន្លែងដែលគាត់បានដោះវាទុកនោះសោះ។
អ្នកស្រី និងក្រុមគ្រួសារបានចំណាយពេលជាច្រើនឆ្នាំស្វែងរកចិញ្ចៀននោះគ្រប់កន្លែងក្នុងផ្ទះ និងស្ទើតែរុះផ្ទះទាំងមូលចេញដើម្បីរក តែនៅតែរកមិនឃើញ។ លុះដល់ ១៦ឆ្នាំក្រោយ ពេលដែលអ្នកស្រីចេញទៅដកមើមការ៉ុតក្នុងសួនបន្លែរបស់គាត់ គាត់មានអារម្មណ៍ថា ដូចជាមានអ្វីពណ៌មាសនៅស្រោបជុំវិញមើមការ៉ុតនោះ។ ការពិត គឺចិញ្ចៀនដែលគាត់បានបាត់កាលពីពេល១៦ឆ្នាំមុននោះសោះ៕
ចិញ្ចៀនភ្ជាប់ពាក្យនៅពេលរកឃើញមានសភាពបែបនេះ
