ពាក្យចចាមអារ៉ាម « Microsoft Surface ជំនាន់ថ្មីនឹងត្រូវប្រកាសចេញនៅក្នុងខែមិថុនា»
កាលពីខែមុនមានសេចក្ដីរាយការណ៍មួយបានឲ្យដឹងថា ក្រុមហ៊ុន Microsoft កំពុងធ្វើការទៅលើកុំព្យូទ័របន្ទះស្ដើង Surface ថ្មីដែលមានអេក្រង់ទំហំ 7-inch ។ ដោយឡែកពេលនេះយើងទើបតែទទួលបាននូវពាក្យចចាមអារ៉ាមថ្មីមួយថា កុំព្យូទ័របន្ទះស្ដើង Surface ថ្មីដែលមានអេក្រង់តូចនោះនឹងត្រូវក្រុមហ៊ុន Microsoft ប្រកាសចេញនៅក្នុងខែមិថុនាខាងមុខនេះហើយ ។
យោងទៅតាមប្រភពរបស់កាសែត DigiTime ដែលជាប្រភពផ្គត់ផ្គង់វត្ថុធាតុដើមឲ្យក្រុមហ៊ុន Microsoft បានឲ្យដឹងថា ជំនាន់ថ្មីនៃកុំព្យូទ័របន្ទះស្ដើង Surface របស់ក្រុមហ៊ុនអាចនឹងត្រូវប្រកាសចេញក្នុងពេលរួមគ្នាជាមួយនឹងសន្និសីទ Build Developer Conference របស់ក្រុមហ៊ុនដែលនឹងធ្វើឡើងនាថ្ងៃទី ២៦ ដល់ ២៨ ខែមិថុនា ។ កុំព្យូទ័របន្ទះស្ដើង Surface ជំនាន់ថ្មី ត្រូវបានគេសង្ឃឹមថានឹងបំពាក់ដោយអេក្រង់ចន្លោះពី 7 ទៅ 9-inch ដែលតាមរបាយការណ៍របស់ក្រុមហ៊ុនផ្គត់ផ្គង់បានឲ្យដឹងថា ពួកគេបាននាំចូលនូវផ្នែកទាំងឡាយបានគ្រប់គ្រាន់ហើយដើម្បីផលិតចំនួន ១ ទៅ ១,៥ លានគ្រឿងនៃកុំព្យូទ័របន្ទះស្ដើង Surface ជំនាន់ថ្មីនោះ ។
ជាមួយនេះផងដែរកុំព្យូទ័របន្ទះស្ដើង Surface ជំនាន់ថ្មីនឹងប្រើអេក្រង់ដែលផលិតដោយក្រុមហ៊ុន Samsung និង LG ហើយវាត្រូវបានគេរំពឹងថានឹងបំពាក់ដោយ CPU Intel ឬ NVIDIA processors ៕
