មានសេចក្ដីរាយការណ៍ថា៖ LG កំពុងតែត្រៀមនឹងចេញ Nexus 5 និង Google TV ជំនាន់ថ្មី
កាលពីដើមខែមីនាឆ្នាំនេះមានប្រភពចចាមអារ៉ាមមួយបានបង្ហាញពី លក្ខណសម្បត្តិបច្ចេកទេសនិងរូបរាងរបស់ទូរស័ព្ទទំនើប LG Nexus 5 ដែលត្រូវបានកើតឡើងក្រោមកិច្ចសហការគ្នារវាងក្រុមហ៊ុន Google នឹង ក្រុមហ៊ុន LG ។សម្រាប់ពេលនេះមានសេចក្ដីរាយការណ៍ថ្មីមួយថា ក្រុមហ៊ុន Google បន្តសហការនឹងក្រុមហ៊ុន LG ដើម្បីផលិត ផលិតផលមួយចំនួនទៀត ដែលរួមមានទូរស័ព្ទទំនើប និង ទូរទស្សន៍ OLED TV ។ បើយោងតាមប្រភពពីគេហទំព័រ The Korea Times បានឲ្យដឹងថាថ្មីៗនេះនាយកប្រតិបត្តិរបស់ក្រុមហ៊ុន Google លោក Larry Page បានជួបប្រជុំជាមួយនាយកប្រតិបត្តិរបស់ក្រុមហ៊ុន LG លោក Koo Bon-joon នៅអំឡុងពេលដែលលោក Larry Page ធ្វើទស្សនៈកិច្ចទៅកាន់កូរ៉េខាងត្បូង ។ ប្រភពដដែលបានបន្តថា នាយកប្រតិបត្តិទាំងពីរបានជួបពិភាក្សាគ្នាអស់រយៈពេលប្រហែលជាងមួយ ម៉ោងដើម្បីស្វែងរកនូវមធ្យោបាយធ្វើឲ្យភាពជាដៃគូពាណិជ្ជកម្មរបស់ ក្រុមហ៊ុនទាំងពីរកាន់តែមានភាពល្អប្រសើរថែមទៀត ។ នៅពេលនេះក្រុមហ៊ុន LG កំពុងតែធ្វើការលើគម្រោងផលិតទូរស័ព្ទទំនើប Nexus ជំនាន់ទី២ ឬអាចជា (Nexus 5) និង ទូរទស្សន៍ LG-Google OLED TV ។
សូមរំលឹកផងដែរថា Google និង LG ពិតជាទទួលបានជោគជ័យខ្លាំងណាស់តាមរយៈការរួមគ្នាផលិត ទូរស័ព្ទទំនើប Nexus 4 ហើយបើយោងតាមប្រភពចចាមអារ៉ាមដែលធ្លាប់ចេញនាពេលកន្លងមកនោះបាន ឲ្យដឹងថា Nexus 5 មានលក្ខណសម្បត្តិបច្ចេកទេសដូចខាងក្រោម៖
- អេក្រង់ទំហំ 5.2-inch
- បច្ចេកវិទ្យាអេក្រង់ OLED
- កម្រិតភាពច្បាស់ 1920 x 1080 pixels
- CPU Qualcomm Snapdragon 2.3GHz
- RAM 3 GB
- អង្គផ្ទុកទិន្នន័យជាប់ម៉ាស៊ីន 16 GB/32 GB និង 64 GB
- កាមេរ៉ាមុខទំហំ 2.1 MP (អាចថតវីឌីអូក្នុងកម្រិត 1080p) និងកាមេរ៉ាក្រោយទំហំ 16 MP (អាចថតវីឌីអូក្នុងកម្រិត 4K, ថតវីឌីអូប្រភេទ Real Time HDR និង HDR)
- ដំណើរការដោយប្រព័ន្ធប្រតិបត្តិការ Android
- ថាមពលថ្ម 3,300mAh
