លេចចេញរូបរាង និងលក្ខណសម្បត្តិបច្ចេកទេសរបស់ទូរស័ព្ទ BlackBerry R10
BlackBerry 10 OS ជាប្រព័ន្ធប្រតិបត្តិការថ្មីរបស់ក្រុមហ៊ុន BlackBerry ហើយមកទល់ពេលនេះទូរស័ព្ទទំនើបរបស់ក្រុមហ៊ុនដែលដំណើរការដោយប្រព័ន្ធប្រតិបត្តិការនេះមានពីរម៉ូដែលរួចមកហើយគឺ BlackBerry Z10 និង BlackBerry Q10 ។
បើយោងតាមប្រភពព័ត៌មាននាពេលកន្លងមកបានឲ្យដឹងថាសម្រាប់ឆ្នាំ២០១៣ នេះ ក្រុមហ៊ុន BlackBerry ឬមានឈ្មោះដើមថា RIM មានគម្រោងបញ្ចេញទូរស័ព្ទទំនើបដែលដំណើរការដោយ BlackBerry 10 OS ឲ្យបានយ៉ាងហោចណាស់ចំនួន ៦ ម៉ូដែល ដើម្បីជាជម្រើសសម្រាប់អតិថិជន ។ នៅខណៈដែលក្រុមហ៊ុនទើបតែបានប្រកាសចេញខ្សែស្រឡាយទូរស័ព្ទទំនើបដំណើរការដោយ BlackBerry 10 OS បានចំនួនពីរម៉ូដែលនៅឡើយនោះ ពេលនេះមានរូបភាពរបស់ខ្សែស្រឡាយ BlackBerry មួយម៉ូដែលទៀតត្រូវបានបង្ហាញជាមួយនិងលក្ខណសម្បត្តិបច្ចេកទេសមួយចំនួន ។ ទូរស័ព្ទទំនើបមួយនេះត្រូវបានគេឲ្យដឹងថាមានឈ្មោះ BlackBerry R10 និងជាទូរស័ព្ទទំនើបដែលមានទាបជាង BlackBerry Z10 និង Q10 ។ បើទោះជាក្រុមហ៊ុន BlackBerry មិនទាន់បានប្រកាសចេញ BlackBerry R10 ជាផ្លូវការយ៉ាងណាក្ដីក៏ក្រុមអ្នកព័ត៌មាននៅតែអាចប្រម៉ាញ់បាននូវរូបភាពនិងលក្ខណសម្បត្តិបច្ចេកទេសខ្លះៗរបស់ BlackBerry R10 ដែលមានដូចខាងក្រោម៖
- អេក្រង់ទំហំ 3.1-inch
- RAM 2 GB
- អង្គផ្ទុកទិន្នន័យជាប់ម៉ាស៊ីនទំហំ 8 GB
- ដំណើរការដោយ BlackBerry 10 OS
- បំពាក់ដោយក្ដារចុច QWERTY Keyboard
- ថាមពលថ្ម 1,800mhA
បញ្ជាក់៖ យើងខ្ញុំមិនអាចសន្និដ្ឋានបានថាលក្ខណសម្បត្តិបច្ចេកទេសខាងលើអាចនឹងត្រូវបានកម្រិតណានោះទេ សូមប្រិយមិត្តរង់ចាំតាមដានការប្រកាសចេញផ្ទាល់ដោយក្រុមហ៊ុន BlackBerry ព្រោះថាបើយោងតាមប្រភពព័ត៌មានដែលបានលេចឡើងនេះបានឲ្យដឹង BlackBerry R10 នឹងត្រូវបង្ហាញខ្លួននិងលក្ខណសម្បត្តិបច្ចេកទេសលម្អិតនៅក្នុងត្រីមាសទី៣ ឆ្នាំ២០១៣ នេះ ៕
