រយៈពេលត្រឹមតែ ៤៥ វិនាទី Xiaomi Mi2S លក់អស់ចំនួន ២០ ម៉ឺនគ្រឿង
កាលពីជាង ១០ថ្ងៃមុខ ក្រុមហ៊ុន Xiaomi ទើបតែបានធ្វើការប្រកាសចេញនូវទូរស័ព្ទទំនើបម៉ូដែលថ្មី Xiaomi Mi2S ដែលទូរស័ព្ទនេះត្រូវបានក្រុមហ៊ុនបញ្ជាក់ថា វាមានល្បឿនលឿនជាងទូរស័ព្ទទំនើប Samsung Galaxy S4 ដែលបំពាក់ដោយ CPU Qualcomm Snapdragon ដូចគ្នានោះទៅទៀត ។ ជាក់ស្ដែងនៅក្នុងការសាកល្បងល្បឿនដំណើរការដោយ Antutu ជាលទ្ធផលបានបង្ហាញថា Xioami Mi2S ទទួលពិន្ទុបានរហូតដល់ទៅ 25,913 ស្របពេលដែល Galaxy S4 បានពិន្ទុត្រឹមតែ 25,446 ។
ដោយឡែកនៅក្នុងពេលកំពុងប្រកាសចេញជាផ្លូវការនូវទូរស័ព្ទទំនើប Xiaomi Mi2S ក៏ត្រូវបានក្រុមហ៊ុនប្រាប់ឲ្យដឹងផងដែរថា ខ្លួននឹងចេញលក់នូវទូរស័ព្ទនេះនាថ្ងៃទី២៣ មេសា ។ ជាការពិតនៅក្នុងការចេញលក់ជាលើកដំបូងនាថ្ងៃទី២៣ ម្សិលមិញនេះក្រុមហ៊ុន Xioami បានបញ្ចេញឲ្យដឹងថា ខ្លួនបានលក់ទូរស័ព្ទ Xiaomi Mi2S បានរហូតដល់ទៅ ២០ ម៉ឺនគ្រឿងក្នុងរយៈពេលត្រឹមតែ ៤៥ វិនាទីដំបូងប៉ុណ្ណោះ ។ តាមរយៈនេះបានបង្ហាញឲ្យឃើញថា មានមនុស្សជាច្រើនដែលកំពុងចាប់អារម្មណ៍ទៅលើទូរស័ព្ទទំនើបមួយនេះ ។
សូមបញ្ជាក់ថា ទូរស័ព្ទទំនើប Xioami Mi2S ត្រូវបានក្រុមហ៊ុនបំពាក់ដោយអេក្រង់ទំហំ 4.3-inch IPS display កម្រិតភាពច្បាស់ 1,280x 720 pixels, CPU quad-core 1.7GHz Qualcomm Snapdragon 600 និង RAM 2GB ប៉ុណ្ណោះគឺមិនមានកម្រិតភាពច្បាស់ Full HD និងអេក្រង់ទំហំ 5-inch ដូចជា Samsung Galaxy S4 នោះទេ (លក្ខណសម្បត្តិលំអិតបែបបច្ចេកទេស) ។ យ៉ាងណាមិញជាមួយនឹងប្រភេទពណ៌ច្រើនជម្រើសទូរស័ព្ទ Xiaomi Mi2S ត្រូវបានចែកចេញពីរប្រភេទផ្សេងគ្នាគឺ តម្លៃ $323.45 សម្រាប់ម៉ូដែលមានអង្គផ្ទុកឯកសារជាប់ម៉ាស៊ីនទំហំ 16GB និង តម្លៃ $372.25 សម្រាប់ម៉ូដែល 32GB ។ បច្ចុប្បន្នទូរស័ព្ទនេះត្រូវបានចេញលក់ជាផ្លូវការហើយនៅក្នុងប្រទេសចិន និងហុងកុង ហើយក្រុមហ៊ុននឹងចេញលក់នៅក្នុងតៃវ៉ាន នាពេលឆាប់ៗខាងមុខ តែមិនមានសម្រាប់ទីផ្សារក្រៅពីនេះនៅឡើយទេ ៕
