សារព័ត៌មាន​អនឡាញ​របស់​តៃវ៉ាន់ Digitime ថ្មីៗ​នេះ​បាន​ឱ្យ​ដឹង​ថា iPad ជំនាន់​ថ្មី​ទី៥ ដែល​មាន​ឈ្មោះ iPad 5 ជា​មួយ​អេក្រង់​ទំហំ ៩,៧អ៊ីញ​ នឹង​​បង្ហាញ​ខ្លួន​នៅ​អំឡុង​ខែ​កក្កដា​ឬ​សីហា​ឆ្នាំ២០១៣​ខាង​មុខ។

របាយការណ៍​លើកឡើង​នេះ គឺ​​ធ្លាយ​ចេញ​ពី​ក្រុមហ៊ុន​ដៃ​គូ​សហការ​របស់ Apple។ Digitime ទទួល​បាន​ដំណឹង​ពី​ការ​ឌីហ្សាញ​រូបរាង​របស់ iPad 5 មក​ថា tablet ស៊េរី​ថ្មី​នេះ​នឹង​មាន​កម្រាស់​ស្ដើង​ជាង​មុន និង​ស្រាល​ជាង iPad 4។ រីឯ​មុខ​គែម​សងខាង iPad ជំនាន់​ថ្មី​នេះ​ក៏​រំពឹង​ដែរ​ថា នឹង​ស្រដៀង​ជា​មួយ iPad mini។

ប្រភព​នានា​បាន​រាយការណ៍​មក​ថា Apple នឹង​បំពាក់​អេក្រង់ Retina Display នៅ​លើ​ជំនាន់ iPad 5​ ដែល​ជា​របស់​ក្រុមហ៊ុន​ចំនួន​ពីរ​រួម​មាន LG និង Sharp។ មិន​តែ​ប៉ុណ្ណោះ​ប្រភព​ដដែល​បាន​លើកឡើង​ទៀត​ថា iPad 5 នឹង​មាន​ការ​អភិវឌ្ឍន៍​លើ touch panel ប្រើ​បាន​កាន់​តែ​រលូន​ជាង​មុន។ បច្ចេកវិទ្យា touch panel នេះ​គឺ​បង្កើត​ចេញ​ពី​ហ្វិល​ស្ដើង​ប្រភេទ TPK និង ITO ដែល​ជា​របស់​ក្រុមហ៊ុន​បច្ចេកវិទ្យា Nitto Denko និង Teijin។

ដៃគូ​សហការ​ធំ​ជាង​គេ​របស់ Apple Foxconn កំពុង​ជ្រើសរើស​កម្មករ​បន្ថែម​យ៉ាង​ច្រើន​សម្រាប់​បំពេញ​ដៃ​ជើង​ក្នុង​សង្វាក់​ផលិតកម្ម​នៅ​រោងចក្រ Zhengzou ដែល​ជា​សាខា​របស់​ខ្លួន​ស្ថិត​ក្នុង​ប្រទេស​ចិន។ ចាប់​តាំង​ពី Foxconn ប្រកាស​ចាប់​ផ្គត់ផ្គង់ smartphone ជំនាន់​ថ្មី​និង​ម៉ូដែល​ផ្សេងៗ​ទៀត (មិន​បញ្ជាក់​ឈ្មោះ) រោងចក្រ​មួយ​បាន​បង្វឹក​បុគ្គលិក​ការងារ​យ៉ាង​ខ្លាំង​ឱ្យ​បំពេញ​ការងារ​តាម​តួនាទី​ជា​មួយ​សក្ដានុភាព​រៀងៗ​ខ្លួន។

នេះ​អាច​ជា​សញ្ញាណ​មួយ​ដែល​បញ្ជាក់​បាន​ថា iPad 5 ក៏​ដូច​ជា iDevice ដទៃ​ទៀត​នឹង​រួច​រាល់​ក្នុង​ពេល​ឆាប់ៗ​ខាង​មុខ​ដែល​ប្រភព​បាន​លើកឡើង​ខាង​លើ​ថា នឹង​បង្ហាញ​វត្តមាន​ជា​ផ្លូវការ​អំឡុង​ខែ​កក្កដា-សីហា​ខាង​មុខ។