AdDuplex ៖ « Nokia Lumia 920 គឺជាទូរស័ព្ទ Windows Phone ដែលពេញនិយមជាងគេ»
ទូរស័ព្ទទំនើប Lumia 920 របស់ក្រុមហ៊ុន Nokia គឺត្រូវបានប្រកាសចេញកាលពីចុងឆ្នាំ២០១២ ប៉ុន្តគេសង្កេតឃើញថាវាពិតជាទទួលបានការគាំទ្រនិងពេញនិយច្រើន ពីសំណាក់អតិថិជនទូទាំងសលកលោកជាពិសេសទីផ្សារចក្រភពអង់គ្លេស និង ចិន ។Nokia Lumia 920 ទើបតែទទួលបានតំណែងលេខ១ នៅក្នុងចំណោមទូរស័ព្ទទំនើបដែលដំណើរការដោយប្រព័ន្ធប្រតិបត្តិការ Windows Phone នេះបើយោងតាមរបាយការណ៍ដែលចេញដោយ AdDuplex ។ មូលហេតុដែលបណ្ដាលឲ្យ Lumia 920 ទទួលបានតំណែងនេះ ព្រោះថាតម្រូវការនៃទូរស័ព្ទមួយនេះ បានកើនឡើងច្រើនជាង Lumia 800 ដែលជារៀមច្បងរបស់ខ្លួននោះ (Lumia 800 ប្រកាសចេញកាលពីឆ្នាំ២០១១)។ ប្រភពដដែលបានបង្ហាញថាគម្លាតរវាងចំណែកទីផ្សាររបស់ Lumia 920 និង Lumia 800 គឺមិនខុសគ្នាខ្លាំងនោះទេ ព្រោះថាបើពិនិត្យលើក្រាហ្វិកដែលបានបង្ហាញឃើញថាវាមានចំនួន 14% ដូគ្នា ប៉ុន្តែអ្វីដែលធ្វើឲ្យ AdDuplex សន្និដ្ឋានជាជំហានចុងក្រោយថាវាអាចទទួលបានលេខ១នោះគឺផ្អែកលើ សន្ទុះកើនឡើងយ៉ាងខ្លាំងនៃ Lumia 920 ។
ប្រភពខាងលើក៏បានបន្ថែមទៀតដែរថាក្រុមហ៊ុន Nokia ទទួលបានចំនួន 80% នៃចំណែកទីផ្សារទូរស័ព្ទទំនើបដែលដំណើរការដោយ Windows Phone នៅទូទាំងពិភពលោក ដូច្នេះមានន័យថា Nokia ជាក្រុមហ៊ុនដែលនាំចេញទូរស័ព្ទដំណើរការដោយ Windows Phone បានច្រើនជាងក្រុមហ៊ុននានាទាំងអស់ ដូចជា HTC ជាដើមនោះ ៕
