Facebook ស្ងួតមុខដោយសារអ្នកប្រើបណ្ដាញសង្គមខ្លួន ប្រឆាំងការប្រើសញ្ញាបង្ហាញអារម្មណ៍ ‘Feeling Fat’
ថ្មីៗនេះក្រុមហ៊ុន Facebook បានលុបចោលនូវការប្រើពាក្យសំដីសំដែងអារម្មណ៍ធាត់ ‘feeling fat’ ដោយសាររងមតិរិះគន់ពីអ្នកប្រើរាប់ពាន់នាក់។ អ្នកប្រើបានត្អូញត្អែរថា ការប្រើ ‘feeling fat’ នេះគឺអាចបង្កើតជាក្ដីអាម៉ាស់សម្រាប់អ្នកប្រើទៅវិញទេ ហើយក៏គ្មានអ្វីជាចាំបាច់ក្នុងការប្រើអារម្មណ៍បែបនេះដែរ។
លោកអ្នកដែលកំពុងប្រើបណ្ដាញទំនាក់ទំនងសង្គម Facebook និងដែលធ្លាប់ប្រើអារម្មណ៍ ‘feeling fat’ នឹងមើលឃើញមានរូបសញ្ញាពិសេសបង្ហាញអារម្មណ៍ធាត់ (feeling fat)។ សញ្ញាអារម្មណ៍នោះគឺជារូប ថ្ពាល់ធំមូល ជាមួយស្នាមផ្នត់នៅលើចង្កា ដើម្បីប្រើជាមួយ status របស់អ្នកប្រើ កន្លងទៅ។ យ៉ាងណាបន្ទាប់ពីមានការប្រមូលញត្តិមិនពេញចិត្តតាមអនឡាញជាង ១៦០០០នាក់រួចមក ឥឡូវនេះ Facebook បានដកជម្រើសសញ្ញាបង្ហាញអារម្មណ៍ (emoji) ‘feeling fat’ ពី status ហើយជំនួសមកវិញនូវការប្រើ (emoji) ‘feeling stuffed’។ នេះបើយោងតាមសេចក្ដីរាយការណ៍ពីគេហទំព័រ telegraph។
មតិប្រមូលផ្ដុំនៅលើគេហទំព័រ change.org ដែលជាការលើកឡើងដោយលោកស្រី Catherine Weingarten និងក្រុម Endangered Bodies បានជជែកពិភាក្សាលើប្រធានបទ មិនគាំទ្រដល់ការរំលេចនូវភាពអាម៉ាស់លើរាងកាយរបស់អ្នកប្រើប្រាស់។ អ្នកទាំងនោះបានលើកឡើងថា “ធាត់” គឺពុំមែនជាអារម្មណ៍ “feeling” នោះទេ ទោះបីវាជាផ្នែកនៃរូបរាងពិតរបស់អ្នកក៏ដោយ ប៉ុន្តែមនុស្សរាល់គ្នាសមនឹងទទួលបានការគោរពជាង៕
ប្រែសម្រួល៖ លី ឈៀន
ប្រភព៖ pcmag, telegraph, neowin, tribune
