រដ្ឋាភិបាលកម្ពុជា៖ ខេត្តព្រះសីហនុនឹងក្លាយជាតំបន់សេដ្ឋកិច្ចពិសេសគំរូពហុបំណង
សេចក្តីព្រាងគោលនយោបាយអភិវឌ្ឍន៍វិស័យ ឧស្សាហកម្ម ដែលទីស្តីការគណៈរដ្ឋមន្ត្រីកម្ពុជាប្រជុំពិនិត្យនិងអនុម័តនៅ ព្រឹកថ្ងៃសុក្រនេះ បង្ហាញវិធានការគន្លឹះជាក់ស្តែងបួន ដើម្បីជំរុញការអនុវត្ត។ ក្នុងចំណោមនោះ ការអភិវឌ្ឍនិងការប្រែក្លាយខេត្តព្រះសីហនុឱ្យទៅជា«តំបន់ សេដ្ឋកិច្ចពិសេសគំរូពហុបំណង» គឺជាវិធានការគន្លឺះទី៤ ដែលអាចធ្វើឱ្យខេត្តទេសចរណ៍ជាប់មាត់សមុទ្រមួយនេះមាន ឈ្មោះជា«ទីក្រុងឧស្សាហកម្មបៃតងអាស៊ាន» យ៉ាងយូរត្រឹមឆ្នាំ២០២៥។
ឆ្នេរសមុទ្រនៅក្នុងខេត្តព្រះសីហនុ
«ទីក្រុងឧស្សាហកម្មបៃតង អាស៊ាន»អាចនឹងក្លាយជាងារថ្មីមួយទៀតនាពេលអនាគតសម្រាប់ខេត្ត ព្រះសីហនុដែលបច្ចុប្បន្នជា«តារារះនាទិសនិរតី»របស់កម្ពុជា។ នេះមិនមែនជាការស្រមើស្រមៃទេ ព្រោះវាជាគោលដៅនៃវិធានការគន្លឹះជាក់ស្តែងទី៤សម្រាប់ជំរុញ ការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជាពីឆ្នាំ២០១៥ដល់ ឆ្នាំ២០២៥។
សេចក្តីព្រាងនៃឯកសារដែលទីស្តីការគណៈរដ្ឋមន្ត្រីកម្ពុជា ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន បានពិនិត្យនិងអនុម័តរួច នាព្រឹកថ្ងៃសុក្រ បង្ហាញថា ដើម្បីសម្រេចគោលដៅខាងលើ រដ្ឋាភិបាលគ្រោងអភិវឌ្ឍនិងប្រែក្លាយខេត្តជាប់មាត់សមុទ្រដែលមាន កំពង់ផែស្វយ័តក្រុងព្រះសីហនុកម្រិតអន្តរជាតិនោះ ឱ្យទៅជា«តំបន់សេដ្ឋកិច្ចពិសេសគំរូពហុបំណង»។ ក្នុងន័យនេះ ខេត្តព្រះសីហនុទៅថ្ងៃអនាគតគឺជាប៉ូលសេដ្ឋកិច្ចសំខាន់មួយ និងជាមជ្ឈមណ្ឌលឧស្សហកម្ម ពាណិជ្ជកម្ម និងទេសចរណ៍ ដែលរីកចម្រើន«ប្រកបដោយចីរភាព និងមានតុល្យភាពបរិស្ថាន»។
បើយោងតាមឯកសារដដែលនោះ រដ្ឋាភិបាលកម្ពុជាគ្រោងអនុវត្តតាមគោលការណ៍តំបន់រដ្ឋបាលពិសេសសម្រាប់ ខេត្តព្រះសីហនុ ដោយត្រូវរៀបចំផែនការមេសម្រាប់ការអភិវឌ្ឍ ក្របខ័ណ្ឌច្បាប់និងនិយ័តកម្ម ព្រមទាំងយន្តការគ្រប់គ្រងចាំបាច់នានា ដែលផ្តល់សិទ្ធអំណាច និងយុត្តាធិការពេញលេញ សម្រាប់គៀរគរ ទាក់ទាញ និងប្រមូលផ្តុំធនធាន បញ្ញាញាណ សកម្មភាពធុរកិច្ច និងការវិនិយោគ។
ចំណែកឯវិធានការគន្លឺះជាក់ស្តែងបីទៀតសម្រាប់ជំរុញការអនុវត្ត គោលនយោបាយអភិវឌ្ឍន៍វិស័យឧស្សាហកម្មកម្ពុជាគឺ៖ ១) ការរៀបចំនិងអនុវត្តផែនការបញ្ចុះថ្លៃអគ្គិសនី ២) រៀបចំនិងអនុវត្តផែនការមេសម្រាប់ការអភិវឌ្ឍប្រព័ន្ធដឹកជញ្ជូន និងឡូជិស្ទិក និង៣) ពង្រឹងនិងបន្តអភិវឌ្ឍយន្តការគ្រប់គ្រងទីផ្សារពលកម្ម និងការបណ្ដុះបណ្ដាលជំនាញ៕ ប្រភពៈ RFI
