រកឃើញពិភពចម្លែកមានព្រះអាទិត្យដល់ទៅ៤
ក្រុមតារាវិទូបានរកឃើញពិភពថ្មី១ ស្ថិតនៅចម្ងាយ ១២៥ ឆ្នាំ ពន្លឺ ដែលមានព្រះអាទិត្យដល់ទៅ ៤ ។
ថ្មីៗនេះ លទ្ធផលពីការសង្កេតមើលតាមស្ថានីយ៍តារាសាស្ត្រ Palomar, San Diego, Calif (អាមេរិក) បានជួយដល់ក្រុមអ្នកជំនាញការរកឃើញរឿងដ៏ចម្លែក១គឺៈ ពិភពថ្មី១ក្នុងអវកាសត្រូវបានបំភ្លឺដោយព្រះអាទិត្យចំនួន ៤ ។
ពិភពនេះ រួមជាមួយព្រះអាទិត្យ៤របស់វា បានត្រូវហៅជារួមថា ៣០ Ari ។ នេះជាប្រព័ន្ធមួយរួមមានចលនា៤ ព្រមទាំងពិភព១មានចម្ងាយពីផែនដីប្រមាណ ១៣៦ ឆ្នាំពន្លឺ ក្នុងនោះ បើគិតតែពីពិភពនោះ មកត្រឹមផែនដី គឺមានចម្ងាយ ១២៥ ឆ្នាំពន្លឺ ។
ពិភពចម្លែកស្ថិតនៅកណ្តាលរូបនេះ មានព្រះអាទិត្យ៤ព័ទ្ធជុំវិញ
ប្រការពិសេសនៃពិភពនេះ គឺការដែលវាស្ថិតនៅក្នុងតារាវិធីនៃព្រះអាទិត្យ៤ផ្សេងៗពីគ្នា ។ ចម្ងាយពីភពនេះដល់ព្រះអាទិត្យ ដែលនៅកៀកបំផុត (ហៅថាតារា ៣០ AriB) គឺស្មើនឹងប្រមាណ ៣០ ដង នៃចម្ងាយពីផែនដីទៅដល់ព្រះអាទិត្យ (៤,៤ ពាន់លានគីឡូម៉ែត្រ) ។ រយៈពេលប៉ាន់ស្មានសម្រាប់ចលនា១ជុំ ព័ទ្ធជុំវិញ ៣០ Ari B នៃភពនេះគឺ ៣៥៥ ថ្ងៃ ។
ពិនិត្យលើទំហំវិញ ពិភពព្រះអាទិត្យ៤នេះ មានទំហំធំជាង ១០ ដង ប្រៀបនឹងភពព្រហស្បតិ៍ ប៉ុន្តែ វាពុំមានផ្ទៃរាបសម្រាប់យានអវកាសអាចចុះសំចតបានទេ ។ តាមពិតទៅ គេបានឃើញវាមុននេះ ២-៣ ឆ្នាំ ។
ប្រព័ន្ធ ៣០ Ari ដែល NASA ផ្តល់ឲ្យ
ទើបតែពេលថ្មីៗនេះ ដោយប្រើប្រតិបត្តិការសង្កេតមើល Robo-Ao គួបផ្សំ PALM- 3000 ទើបគេរកឃើញព្រះអាទិត្យទី៤ ។ តាមរយៈនោះ ៣០ Ari ក្លាយជាប្រព័ន្ធភពមានព្រះអាទិត្យ៤ ទី២ដែលគេធ្លាប់រកឃើញក្នុងចក្រវាឡ ។ ពិភពដូចគ្នាដំបូងគឺ KIC 4862625 ត្រូវបានគេរកឃើញមុននេះ ៤ ឆ្នាំ ។
ប្រព័ន្ធភព KIC 4862625 រកឃើញនៅឆ្នាំ ២០១២
បច្ចុប្បន្ន គេកំពុងប្រមូលផ្តុំសិក្សាពីពិភពនេះ ៕
