ស្រ្តីវៀតណាមលោតពីលើស្ពានអាកាសសិង្ហបុរីស្លាប់នៅនឹងកន្លែង និងជាន់ពីលើបុរសបើកម៉ូតូម្នាក់ដួលច្រងាប់ច្រងិល (របួសស្រាល)
ស្ត្រីជនជាតិវៀតណាមម្នាក់ បានស្លាប់ភ្លាមៗនៅនឹងកន្លែងកើតហេតុ បន្ទាប់ពីលោតទម្លាក់ខ្លួនពីលើផ្លូវស្ពានអាកាស West Coat ក្នុងប្រទេសសិង្ហបុរី កាលពីថ្ងៃទី ០៣ មីនា ២០១៥ ។ ស្ត្រីរងគ្រោះត្រូវបានគេជឿថា បានចុះចេញពីម៉ូតូ រួចក៏លោតធ្វើអត្តឃាតបែបនេះតែម្តង ។
ស្ត្រីរងគ្រោះដែលគេស្គាល់ឈ្មោះថា Ho Chieu អាយុ ២៥ ឆ្នាំ បានធ្លាក់ចុះលើផ្លូវ Blangah ទល់មុខស្តប់រថយន្តក្រុង១ ជិតមជ្ឈមណ្ឌលអាហារ Seah Im ។ មុនពេលធ្លាក់ដល់ដី ស្ត្រីរងគ្រោះបានធ្លាក់ជាន់លើអ្នកបើកបរម៉ូតូម្នាក់ បណ្តាលឲ្យរអិលដួលអូសចម្តាយពី ៧ ឬ ៨ ម៉ែត្រ ។ ទោះជាយ៉ាងណា បុរសអាយុ ២៤ ឆ្នាំ នោះ គ្រាន់តែរងរបួសស្រាលប៉ុណ្ណោះ ហើយគាត់ក៏បដិសេធមិនទៅមន្ទីរពេទ្យទេ ។
យោងតាមកាសែតចិន Lianhe Wanbao, ស្ត្រីជនជាតិវៀតណាមនេះ ត្រូវបានគេដឹងថា បានកំពុងជិះម៉ូតូជាមួយបុរសជនជាតិសិង្ហបុរីវ័យពាក់កណ្តាលម្នាក់ ។ អ្នកទាំងពីរត្រូវបានគេជឿថា កំពុងរស់នៅជាមួយគ្នា ។
អ្នកសារព័ត៌មាននៅកន្លែងកើតហេតុបានឲ្យដឹងថា ដៃគូរបស់នាងបានលើកត្រកងខ្លួនរបស់នាង និងព្យាយាមធ្វើឲ្យនាងដឹងខ្លួនវិញ, ប៉ុន្តែ បុរសរូបនោះបដិសេធមិននិយាយទៅកាន់អ្នកកាសែតទេ ។ ទោះជាយ៉ាងណា ស្ត្រីរងគ្រោះត្រូវបានបញ្ជាក់ថាស្លាប់នៅកន្លែងកើតហេតុ ។
បច្ចុប្បន្ន ប៉ូលីសកំពុងស៊ើបអង្កេតករណីនេះ ៕
នារីរងគ្រោះ
បុរសអ្នកបើកបរម៉ូតូខាងក្រោមរងរបួសស្រាល
