បុរសម្នាក់មានប្រព័ន្ធការពារខ្លួនខ្លាំងនិងចម្លែក ដល់ថ្នាក់មេរោគអេដស៍ធ្វើអ្វីមិនកើត
នៅក្នុងលោកនេះមានមនុស្សម្នាក់ដែលបានឆ្លងមេរោគអេដសន៍ចូលក្នុងខ្លួនហើយ បែរជាមេរោគអេដស៍មិនអាចបំបែកខ្លួននិងមិនអាចបៀតបៀនដល់អាយុជីវិតរបស់គាត់ទាល់តែសោះ។ លោកស្ទីវក្រូន (Steve Crohn) ជាជនជាតិអាមេរិក កើតនៅថ្ងៃទី៥ កញ្ញា ១៩៤៦ ត្រូវគេប្រសិទ្ធិនាមថា «បុរសមេរោគអេដស៍ធ្វើអ្វីមិនកើត The Man Who Can’t Catch AIDS»។
លោកជាអ្នករស់នៅរដ្ឋញូយ៉ក សហរដ្ឋអាមេរិក ត្រូវអ្នកវិទ្យាសាស្ត្របូមឈាមយកទៅពិនិត្យក្នុងអតិសុខុមទស្សន៍ ដើម្បីរកមូលហេតុពិត ដែលមេរោគអេដស៍មិនអាចធ្វើអ្វីលោកកើត។ ឈាមរបស់លោកផ្ទុកសារធាតុមួយប្រភេទ ដែលមេរោគអេដស៍មិនអាចធ្វើសកម្មភាព ឬចាប់តោងកោសិកានៅក្នុងកោសិកាឈាមដើម្បីរស់ និងបំបែកខ្លួន។
កាលពីពេលកន្លងមក សារព័ត៌មានចុះផ្សាយថាមានករណីអ្នកខ្លះធម្មជាតិរបស់គាត់ជួយឲ្យគាត់មិនឆ្លងមេរោគអេដស៍ចូលក្នុងឈាមទេ។ ដោយឡែក ករណីលោកស្ទីវក្រូន (Steve Crohn) ខុសពីគេ។ លោកបានឲ្យដឹងថាករណីលោកស្ទីវក្រូន គឺមេរោគអេដស៍បានឆ្លងចូលក្នុងសរសៃឈាម ប៉ុន្តែនៅក្នុងឈាមរបស់លោកមានប្រព័ន្ធការពារយ៉ាងក្រាស់ឃ្មឹក ដែលអាចផ្សាំខ្លួន និងស្គាល់ចំណុចខ្សោយរបស់មេរោគអេដស៍ច្បាស់។ ហេតុនេះហើយ ទើបមេរោគអេដស៍ធ្វើអ្វីលោកមិនកើត។
បណ្ឌិត Bill Paxton បានធ្វើពិសោធ ដោយកាត់កោសិកាសេដេកាត់ (CD4) ដែលជាមុខសញ្ញាសម្រាប់មេរោគអេដស៍ចាប់តោងនិងបំផ្លាញ។ បន្ទាប់មកលោកយកសេដេកាត់របស់លោកស្ទីវក្រូន ទៅចាក់បញ្ចូលមេរោគអេដស៍។ មេរោគអេដស៍ពេលចូលក្នុងឈាមលោកស្ទីវក្រូនហើយ បែរជាមិនអាចភ្ជាប់ខ្លួនវាទៅតោងចាប់កោសិកាសេដេកាត់ (CD4) ព្រោះនៅក្នុងឈាមរបស់លោកស្ទីវក្រូន មានសារធាតុមួយប្រភេទឈ្មោះ chemokines។ លោកស្ទីវក្រូនស្លាប់កាលពីឆ្នាំ២០១៣ ដោយអំពើអត្តឃាត (suicide)៕
ប្រែសម្រួល ៖ អន សំអាង
ប្រភព៖ The Independent , The Telegraph, The New York Times , The Daily Mail
