បុរសម្នាក់ជួបរឿងហួសចិត្តចំណាយ ៤៥០ដុល្លារទិញ MacBook តាមអនឡាញ បានត្រឹមតែក្រដាស ១សន្លឹកទៅវិញ
បុរសម្នាក់ដែលមានឈ្មោះ Paul Barrington ថ្មីៗនេះបានទិញកុំព្យូទ័រ MacBook លើគេហទំព័រលក់ទំនិញអនឡាញ eBay របស់អាមេរិកក្នុងតម្លៃ ៣០០ផោន (ប្រហែល ៤៥០ដុល្លារ) តែបែរជាទទួលបានត្រឹមតែក្រដាសមួយសន្លឹកមានរូប MacBook ទៅវិញ។
គេហទំព័រ CNET ឱ្យដឹងថា បុរសម្នាក់នេះ ចង់ទិញកុំព្យូទ័រ MacBook មិនមែនសម្រាប់ប្រើប្រាស់ក្នុងការរកស៊ីជំនួញអ្វីនោះទេ តែលោកចង់ប្រើសម្រាប់បំពេញអាជីពជាឌីជេ (DJ) ក្នុងពិធីមង្គលការ ដើម្បីទាញយក (download) និងរៀបចំកម្មវិធី Software ល្អៗ។ ប៉ុន្តែរឿងដែលហួសចិត្តកើតមានចំពោះបុរសមានវ័យ៣៨ឆ្នាំនេះ គឺលោកទិញ MacBook ពីគេហទំព័រ eBay តែពេលបើកប្រអប់ឡើងមិនឃើញកុំព្យូទ័រ បែរជាឃើញតែក្រដាសមួយសន្លឹកមានរូប MacBook នៅលើនោះទៅវិញ។
ជំនួសឱ្យកុំព្យូទ័រឡេបថប (Laptop) របស់ Apple លោក Barrington ទទួលបានត្រឹមតែក្រដាសមួយសន្លឹកនៅក្នុងប្រអប់ដែលមានរូបកុំព្យូទ័រ MacBook ពណ៌ស/ខ្មៅនៅលើនោះប៉ុណ្ណោះ។ លោកបានប្រាប់ព្រឹត្តិបត្រព័ត៌មានថា៖ «ខ្ញុំចង់ទិញ Laptop មួយគ្រឿង ដូច្នេះខ្ញុំបានឆែកមើលតារាងតម្លៃដាក់លក់លើអនឡាញព្រមទាំងការកម្រិតគុណភាពរបស់អ្នកលក់»។ លោកនិយាយទៀតថា លោកជាអតិថិជនម្នាក់តែងតែទិញអីវ៉ាន់ផ្សេងៗនៅលើគេហទំព័រអនឡាញនេះអស់រយៈពេល ២-៣ឆ្នាំមកហើយ ប៉ុន្តែមិនដែលជួបរឿងបែបនេះទេ ដូច្នេះលោកគ្មានការសង្ស័យអ្វីឡើយនៅពេលទិញ MacBook ពី eBay។
គ្រាន់តែបើកប្រអប់ឡើងភ្លាមលោកហួសចិត្ត និងអស់សំណើចយ៉ាងខ្លាំង។ អ្នកនាំពាក្យរបស់ក្រុមហ៊ុនលក់ទំនិញអនឡាញ eBay បានឆ្លើយតបទៅកាន់បុរសនេះ ដោយប្រើសំដីសូមទោសចំពោះបញ្ហាដែលលោក Barrington បានជួបរឿងហួសចិត្តលើកនេះ។ ក្រុមហ៊ុននឹងទទួលខុសត្រូវដោយសងប្រាក់ទៅឱ្យលោក Barrington វិញ៕
ចុះប្រិយមិត្ត តើធ្លាប់ជួបករណីហួសចិត្តស្រដៀងនេះដែរឬទេ?
ប្រែសម្រួល៖ លី ឈៀន
ប្រភព៖ cnet
