​លោក Hafthór ‘Thor’ Björnsson តារា​សម្ដែង​ពី​​ “Game Of Thrones” ភាពយន្ត​ជា​ស៊េរី​ដ៏​ល្បីល្បាញ​ប៉ុស្ដិ៍ HBO បាន​បំបែក​ឯតទគ្គកម្ម​ពិភពលោក​ដែល​មិន​ធ្លាប់​មាន​អ្នកណា​អាច​បំបែក​បាន​រហូតដល់​ ១០០០​ឆ្នាំ​​ទើប​​លោក​ធ្វើ​បានសម្រេច។​

​បុរស​មាន​រូបរាង​ធំ​ខ្ពស់​វ័យ ២៦​ឆ្នាំ​ជនជាតិ Iceland បាន​បំបែក​ឯតទគ្គកម្ម​ពិភពលោក​ក្នុង​ការ​ប្រកួតប្រជែង​កំពូល​អ្នក Viking រឹងមាំ​បំផុត​ក្នុង​លោក​ដែល​បាន​រៀបចំ​ឡើង​នៅ​ប្រ​ទេ​​ស ​ន័រវែស​​ ហើយ​បើ​ចាំ​មិន​ខុស​ទេ​គេ​ម្នាក់​នោះ​គឺ Hafthor តារា​សម្ដែង​ដែល​ដើរតួ​ជា Gregor “The Mountain” Clegane ភាពយន្ត​ជា​ស៊េរី​ល្បីល្បាញ​។ នៅ​ក្នុងការ​ការប្រកួត​នោះ Hafthor អាច​លី​គល់ឈើ​ដែលមាន​ទម្ងន់​រហូតដល់​ ១៤៣៣ ផោន (៦៥០​គីឡូក្រាម​) ប្រវែង​​ ៣០​ហ្វូ​ត (១០​ម៉ែត្រ​) ដើរ​បាន ៥​ជំ​ហ៊ាន បំបែក​ឯតទគ្គកម្ម​ចាស់​ដែល​ធ្វើ​បាន​សម្រេច​កាល​ ១០០០​ឆ្នាំមុន។​

​ក្រោយ​បាន​ទទួល​តំណែង​ជា​អ្នក Viking ដែល​រឹងមាំ​បំផុត​ក្នុង​លោក Hafthor បាន​ផុស​រូបភាព​និង​សារ​លើ Instagram ផ្ទាល់ខ្លួន​លោក​ថា​៖ «​ថ្ងៃនេះ​ខ្ញុំ​កសាង​ប្រវត្តិសាស្ត្រ​បានសម្រេច​ហើយ​» ​ដោយ​លោក​បានបញ្ជាក់​បន្ថែមទៀត​ថា​ក្រោយ​លី​គល់ឈើ​ដ៏​ធ្ងន់​ដើរ​បាន​ប្រាំ​ជំ​ហ៊ាន ខ្នង​របស់​លោក​មិនមាន​បញ្ហា​អ្វី​នោះទេ ហើយ​ពេលនេះ​គោលដៅ​​ចម្បង​​របស់លោក​គឺ​ការ​ក្លាយជា​បុរស​ដែល​រឹងមាំ​បំផុត​ក្នុង​លោក​ហើយ​គ្មានអ្វី​អាច​បញ្ឈប់​លោក​បាន​នោះទេ​។

​ម្ចាស់​ឯតទគ្គកម្ម​ពិភពលោក​ដើម​ដែល Hafthór ‘Thor’ Björnsson បំបែក​បាន​នោះ​គឺ​ស្ថិត​ក្នុង​ប្រវត្តិសាស្ត្រ​ជនជាតិ Iceland ដោយ​លោក Orm Storulfsson ជា​ជនជាតិ Iceland ដូចគ្នា​អាច​លី​គល់ឈើ​ទម្ងន់ ៦៥០​គីឡូក្រាម​ហើរ​ដើរ​បាន ៣​ជំ​ហ៊ាន ចំណែក​ម្ចាស់​ស្ថិតិ​ថ្មី ១០០០​ឆ្នាំក្រោយ​អាច​ដើរ​បាន​៥​ជំ​ហ៊ាន​៕

​ទស្សនា​វីដេអូ Hafthór ‘Thor’ Björnsson បំបែក​ឯកទគ្គកម្ម​ពិភពលោក​៖

​ប្រែ​សម្រួល​៖ សុខា នី​កា​

ប្រភព៖​ dailymail.co.uk