CEO កំពូលសិចស៊ី កំពុងជោគជ័យលើជំនួញឈុតក្នុង
នាង Chrissie Chau ដែលជាតារាសម្ដែង និងតារាម៉ូដែល ពេលនេះបានវិវឌ្ឍអាជីពបើកមុខជំនួញផ្ទាល់ខ្លួនបន្ថែម ជាម្ចាស់ក្រុមហ៊ុនលក់ឈុតក្នុងរបស់ស្ត្រី ម៉ាក LAANAA។ បច្ចុប្បន្ន ប្រធានក្រុមហ៊ុនដ៏សិចស៊ីនេះ កំពុងដើរតាមគម្រោង ពង្រីកជំនួញរបស់ខ្លួនវាយលុកទីផ្សារអាស៊ី។
ម៉ាកផលិតផលឈុតក្នុង LAANAA បានចាប់ផ្ដើមមានឈ្មោះលើទីផ្សារកាលពីខែធ្នូ ចុងឆ្នាំ ២០១៤កន្លងទៅ ហើយបច្ចុប្បន្នកំពុងប្រតិបត្តិការជាលក្ខណៈហាងទំនិញអនឡាញ ដែលទាក់ទាញវិនិយោគិនជាច្រើន ពីប្រទេសចិន និងសហរដ្ឋអាមេរិក។
ក្រៅពីសហការជាមួយវិនិយោគិនចិនដីគោក តាមរយៈហាងទំនិញអេឡិចត្រូនិក វិនិយោគិនមកពីអាមេរិកក៏បានចូលរួមបណ្ដាក់ទុនវិនិយោគក្នុងទឹកប្រាក់ប្រមាណ ៥០លានដុល្លារហុងកុង (ជាង ៦លានដុល្លារ) ទៅលើម៉ាកផលិតផលនេះដែរ។ ការវិនិយោគដ៏ធំនេះ ធ្វើឲ្យគេមានក្ដីសង្ឃឹមថា នឹងអាចជំរុញ LAANAA ឲ្យក្លាយជាផលិតឈុតក្នុងឈានមុខមួយ សម្រាប់សុភាពនារីទាន់សម័យនៅអាស៊ី។
ថ្មីៗនេះ Chrissie បានប្រារព្ធការដាក់តាំងបង្ហាញផលិតផលរបស់ខ្លួន ដើម្បីផ្សព្វផ្សាយពីការរចនាម៉ូដថ្មី។ មិត្តភ័ក្ដិដែលជាតារាល្បីៗជាច្រើន បានថតវីដេអូក្លិប ដើម្បីអបអរ Chrissie ចំពោះការធ្វើជំនួញដោយជោគជ័យ។ បើទោះបីជា ប្រធានក្រុមហ៊ុនវ័យ ២៩ឆ្នាំនេះ មានអាជីពជាតារាម៉ូដែលក្ដី ក៏នាងបានស្លៀកសំលៀកបំពាក់ជាលក្ខណៈអភិរក្សនិយម ដោយទុកឲ្យតារាម៉ូដែលបរទេសបីនាក់ទៀត ជាអ្នកបង្ហាញម៉ូដថ្មីជំនួស។
ពេលគេសួរថា ហេតុអ្វីបានជានាងមិនបង្ហាញម៉ូដដោយខ្លួនឯង? Chrissie ឆ្លើយថា “ទុកឲ្យខ្ញុំសប្បាយចិត្តធ្វើជាថៅកែគេម្ដងទៅ… ខ្ញុំមានអាជីពខាងហ្នឹងមែន តែគិតថាតារាម៉ូដែលបីនាក់នោះធ្វើបានល្អជាងខ្ញុំ”។
នាង Chrissie បានប្រកាសថា LAANAA និងក្រុមហ៊ុនលក់ទំនិញអនឡាញ Alibaba របស់មហាសេដ្ឋី Jack Ma កំពុងធ្វើការរួមគ្នាទៅលើគម្រោងថ្មីមួយ ដែលមានទំហំទឹកប្រាក់ ១០លានដុល្លារហុងកុង (ប្រហែល ១,៣លានដុល្លារ)។ នាងបានបញ្ជាក់ថា “ពិតណាស់ មានអ្នកវិនិយោគថ្មីជាច្រើនទៀត… ខ្ញុំមានទំនុកចិត្តចំពោះជំនួញមួយនេះ”។
ដោយមានសុទិដ្ឋិនិយមចំពោះអនាគតផលិតផល LAANAA នាង Chrissie បាននិយាយថា ខ្លួនមានសង្ឃឹមអាចបើកហាងដ៏ធំមួយនៅហុងកុងចុងឆ្នាំនេះ។ លើសពីនេះ នាងមានគោលបំណងនាំផលិតផលឈុតក្នុងខាងលើ ជាប់ឈ្មោះក្នុងទីផ្សារសហគ្រាសរីកលូតលាស់របស់ហុងកុង ក្នុងរយៈពេលបីឆ្នាំទៀតផងដែរ៕
