១០០ឆ្នាំទៀត មនុស្សអាចរស់នៅក្នុងលំហអាកាសបាន
យ៉ាងហោចណាស់នៅបំណាច់ឆ្នាំ ២ ១០០ ខាងមុខ មនុស្សលោកអាចរស់នៅ នៅក្រៅភពផែនដីបាន។ នេះបើយោងតាមប្រសាសន៍របស់លោក Dr Al Globus អ្នកជំនាញជាន់ខ្ពស់ខាងស្រាវជ្រាវផ្នែកលំហអវកាសរបស់អង្គការអវកាស NASA ។
ជាមួយនឹងការខិតខំប្រឹងប្រែងរបស់លោក និង ក្រុមការងារក្នុងមជ្ឈមណ្ឌលស្រាវជ្រាវរបស់អង្គការកំពូលខាងលើ អ្នកជំនាញរូបនេះមានសុទិដ្ឋិនិយមថា មនុស្សអាចរស់នៅក្នុងលំហអាកាសបាននៅក្នុងរយៈពេលយ៉ាងហោចណាស់ ៩ ទសវត្សទៀត។
តាមការអះអាងរបស់លោក ការរស់នៅរបស់មនុស្សមិនមែនជាការបណ្តែតខ្លួននៅគន្លងផែនដីដោយផ្ទាល់នោះទេ តែជាការផលិតយានអវកាសដ៏មហិមាមួយជាមួយនឹងសំណង់គ្រប់ប្រភេទប្រៀបដូចជាទីក្រុង (ទីក្រុងអណ្តែត) មួយដូច្នេះដែរ ដែលអាចណ្តែតខ្លួននៅលើគន្លងតារាវិថីបាន។
លោក Al Globus បានពន្យល់ដូច្នេះថា៖« នៅពេលដែលគេផលិតបានយានខាងលើ វានឹងត្រូវបាញ់បង្ហោះចូលគន្លងតារាវិថី ផុតពីទំនាញផែនដី។ នៅទីនោះហើយដែលមនុស្សលោកយើងអាចទស្សនាទិដ្ឋភាពនានានៅលំហអាកាសជុំវិញភពផែនដីយើងនេះបានជាមួយសមត្ថភាពអាចផ្ទុកមនុស្សចាប់ពី រាប់ពាន់នាក់រហូតដល់ លាននាក់អាស្រ័យលើទំហំនៃយាននោះដូចយើងកំពុងរស់នៅលើភពផែនដីដែរ»។
ទីក្រុងអណ្តែតលើយានអវកាស ប្រភពរូបភាព៖ Dailymail
លំនៅឋាន សំណង់អគារ រុក្ខជាតិ រួមទាំងអ្វីៗគ្រប់យ៉ាងដែលមាននៅលើផែនដី នឹងត្រូវបំពាក់ក្នុងយាននេះ មុននឹងបាញ់បង្ហោះចូលទៅគន្លងតារាវិថីសម្រាប់ឲ្យមនុស្សស្នាក់នៅ។
លោកបានបញ្ជាក់ទៀតថា យាននេះនឹងមិនត្រឹមតែជាកន្លែងដើម្បីការកម្សាន្ត និង ការស្នាក់នៅប៉ុណ្ណោះទេ ទែវាក៏ជាកន្លែងដែលនឹងប្រើប្រាស់សម្រាប់ការផលិតភាពយន្ត កន្លែងប្រកួតកីឡា ស្រាវជ្រាវ និង សេវាកម្មផ្សេងៗទៀតដែលជាតម្រូវការប្រចាំថ្ងៃរបស់មនុស្សលោក។
ជុំវិញការអះអាងរបស់លោក Al Globus សាធារណជនទូទៅហាក់មិនសូវមានជំនឿលើការលើកឡើងរបស់អ្នកជំនាញរូបនេះនោះឡើយ ដោយគិតថា វាជារឿងមួយលំបាកបំផុត។
លោក Al Globus ពានគាំទ្រទៅនឹងការយល់ឃើញដូចនេះ ដោយហេតុថា គេមិនទាន់មានបច្ចេកវិទ្យាគ្រប់គ្រាន់នៅឡើយនាពលបច្ចុប្បន្ននេះ។ យ៉ាងណាមិញ លោកមានជំហរយ៉ាងមុតមាំថា អ្នកវិទ្យាសាស្ត្រពិតអាចផលិតវាបាននៅពេលដែលបច្ចេកវិទ្យាពិភពលោកកាន់តែរីកចម្រើនជាងនេះ៕
ប្រែសម្រួល៖ ខេវិន
ប្រភព៖ Dailymail
