រឿង៤យ៉ាងដែលលោកអ្នកត្រូវតែធ្វើ មុននឹងលាឈប់ពីក្រុមហ៊ុនណាមួយ
ការលាឈប់ពីក្រុមហ៊ុន មិនមែនជារឿងងាយស្រួលសម្រាប់បុគ្គលិកម្នាក់ៗនោះទេ។ ការលាឈប់នេះទៀតសោត អាចបណ្ដាលមកពីបញ្ហាផ្សេងៗដូចជា បញ្ហាប្រាក់បៀវត្សរ៍ សម្ពាធការងារ ជម្លោះក្នុងក្រុមការងារ មិនមានការអភិវឌ្ឍន៍ខ្លួនទៅមុខទៀត និងសម្លឹងឃើញឱកាសនៅក្រុមហ៊ុនផ្សេងជាដើម។ អ្វីដែល Domneng7 ចង់បង្ហាញលោកអ្នកចំណុចមួយសំខាន់បំផុតនោះគឺថា មុននឹងដាក់ពាក្យឈប់ត្រូវសួរខ្លួនឯងម្ដងហើយម្ដងទៀតឱ្យបានច្បាស់លាស់។ ចំណុចបួន ខាងក្រោមនេះ គឺលោកអ្នកត្រូវធ្វើមុននឹងឈប់ពីក្រុមហ៊ុន៖
១) ត្រូវរកការងារថ្មីឱ្យបានសិនមុននឹងដាក់ពាក្យឈប់៖ មានមនុស្សមិនតិចនាក់នោះទេ ដែលលាឈប់ពីការងារភ្លាមៗដោយសារតែមានកំហឹង ឬមិនពេញចិត្តត្រង់ចំណុចណាមួយជាមួយនឹងមេឬជាមួយនឹងក្រុមហ៊ុន។ ទោះជាដល់ដំណាក់កាលលោកអ្នកមិនពេញចិត្តនឹងក្រុមហ៊ុនឬមេរបស់អ្នកយ៉ាងណាក្ដី លោកត្រូវរកការងារឱ្យបានថ្មីមុនសិនចាំដាក់ពាក្យឈប់។ មនុស្សមួយចំនួនធំ គឺពឹងផ្អែកលើប្រាក់ខែ បើសិនជាមិនទាន់រកការងារថ្មីបានផង ហើយដាក់ពាក្យឈប់ នោះលោកអ្នកនឹងប្រឈមបញ្ហាហិរញ្ញវត្ថុ។
២) ការដាក់ពាក្យឈប់គួរតែគោរពតាមលក្ខខណ្ឌក្រុមហ៊ុនកំណត់ និងប្រាប់ពីការងារថ្មីដល់មេរបស់អ្នក៖ ពេលដែលលោកអ្នកទទួលបានការងារថ្មី យ៉ាងហោចណាស់លោកអ្នកគួរដាក់ពាក្យលាឈប់តាមវិធានផ្ទៃក្នុងឬច្បាប់ក្រុមហ៊ុនកំណត់។ អាចពីរសប្ដាហ៍ មួយខែ ឬទៅបីខែ។ មួយទៀត បើអាចធ្វើបានលោកអ្នកគួរតែប្រាប់ដល់មេរបស់អ្នកតាមត្រង់ពីការងាររបស់អ្នក។ ធ្វើបែបនេះ មេឬប្រធានរបស់លោកអ្នកនឹងមិនគិតថាអ្នកក្បត់គាត់ ឬនាំឱ្យមើលមុខគ្នាមិនចំនៅថ្ងៃអនាគតនោះទេ។
៣) ធ្វើការងារឱ្យអស់ពីដៃពីជើង និងជួយបណ្ដុះបណ្ដាលអ្នកថ្មីក្រោយពីដាក់ពាក្យឈប់៖ មិនមែនក្រោយពីដាក់ពាក្យលាឈប់ហើយ បោះបង់ការងារចោល ឬធ្វើឱ្យតែរួចពីដៃនោះទេ។ លោកអ្នកត្រូវបង្ហាញពីភាពជាវិជ្ជាជីវៈក្នុងការងារ ហើយត្រូវចាំថាលោកអ្នកស៊ីប្រាក់ខែពីក្រុមហ៊ុនមួយខែ ឬពីរសប្ដាហ៍ឬបីខែទៀត ដូច្នេះត្រូវធ្វើការងារឱ្យអស់ពីដៃពីជើង។ លោកអ្នកត្រូវបញ្ចប់កិច្ចការដែលនៅសល់ទាំងប៉ុន្មាន ផ្ទេរការងារឱ្យបានគ្រប់ជ្រុងជ្រោយដល់ប្រធាន ឬបុគ្គលិកថ្មីដែលចូលជំនួស។ ជួយបណ្ដុះបណ្ដាលបុគ្គលិកថ្មីនោះឱ្យយល់ពីការងាររបស់អ្នកគ្រប់សព្វ។ ប្រាប់ពីឯកសារទាំងឡាយដែលលោកអ្នកបានធ្វើ ដល់បុគ្គលិកថ្មីឱ្យបានយល់។ នេះជាការធ្វើការប្រកបដោយវិជ្ជាជីវៈមួយដែលបង្ហាញពីតម្លៃរបស់អ្នក។
៤) មិនត្រូវចាត់ទុកអ្នកណាម្នាក់ជាសត្រូវ៖ លោកអ្នកកំពុងធ្វើការងារឱ្យក្រុមហ៊ុន ហើយបុគ្គលិកដទៃទៀតក៏ធ្វើការងារឱ្យក្រុមហ៊ុនដែរ។ ប្រការដែលលោកអ្នកគួរគិតនោះគឺថា កុំចាត់ទុកបុគ្គលិកនៅក្នុងក្រុមហ៊ុនចាស់ មិនថាមេរបស់អ្នក ឬបុគ្គលិកដែលអ្នកមិនចូលចិត្ត ជាសត្រូវ ព្រោះថាថ្ងៃណាមួយលោកអ្នកនឹងអាចធ្វើការនៅកន្លែងណាមួយជាមួយគ្នាក៏អាចថាបាន៕
៤) មិនត្រូវចាត់ទុកអ្នកណាម្នាក់ជាសត្រូវ៖ លោកអ្នកកំពុងធ្វើការងារឱ្យក្រុមហ៊ុន ហើយបុគ្គលិកដទៃទៀតក៏ធ្វើការងារឱ្យក្រុមហ៊ុនដែរ។ ប្រការដែលលោកអ្នកគួរគិតនោះគឺថា កុំចាត់ទុកបុគ្គលិកនៅក្នុងក្រុមហ៊ុនចាស់ មិនថាមេរបស់អ្នក ឬបុគ្គលិកដែលអ្នកមិនចូលចិត្ត ជាសត្រូវ ព្រោះថាថ្ងៃណាមួយលោកអ្នកនឹងអាចធ្វើការនៅកន្លែងណាមួយជាមួយគ្នាក៏អាចថាបាន៕
