យន្តហោះមួយគ្រឿងទៀតរបស់ AirAsia បកត្រឡប់ក្រោយវិញ បន្ទាប់ពីហោះជារង្វង់អស់៤ម៉ោងដោយសារបញ្ហាបច្ចេកទេស
អ្នកបើកបរយន្តហោះ D7172 របស់ក្រុមហ៊ុន AirAsia បានសម្រេចចិត្តហោះហើរត្រឡប់មកកាន់ប្រទេសម៉ាឡេស៊ីវិញ កាលពីថ្ងៃអាទិត្យ បន្ទាប់ពីមានបញ្ហាបច្ចេកទេស ហើយយន្តហោះនោះសម្រេចចិត្តហោះវិលជុំវិញនៅលើអាកាសរយៈពេល ៤ ម៉ោងមុនពេលអាចចុះចត។
ហេតុការណ៍នេះបណ្តាលឲ្យមានការភ្ញាក់ផ្អើលយ៉ាងខ្លាំងដល់អ្នកដំណើរ ប៉ុន្តែគ្មាននរណាម្នាក់រងរបួស ឬ ស្លាប់អ្វីឡើយ។
នៅថ្ងៃកើតហេតុនោះ យន្តហោះD7172របស់ក្រុមហ៊ុនAirAsia មានមនុស្សសរុប ៣៧១ នាក់ បានចេញដំណើរពីទីក្រុង កូឡាឡាំពួរ ប្រទេសម៉ាឡេស៊ី ឆ្ពោះទៅកាន់ទីក្រុង ជេដ្ឋា ( Jeddah) ប្រទេសអារ៉ាប៊ីសាអ៊ូឌីត។ ប៉ុន្តែនៅពេលហោះហើរទៅដល់ច្រកសមុទ្រនៃរដ្ឋ Malacca របស់ម៉ាឡេស៊ី ស្រាប់តែប្រព័ន្ធរក្សាលំនឹងល្បឿនរបស់យន្តហោះមានបញ្ហា ធ្វើឲ្យយន្តហោះនោះហោះជារង្វង់រយៈពេល ៤ម៉ោង ហើយសាំងយន្តហោះបានអស់យ៉ាងរហ័ស។
ដោយសារតែស្ថានការណ៍កាន់តែអាក្រក់ទៅៗ អ្នកបើកបរយន្តហោះ ក៏បានប្រកាសអាសន្ន ហើយក៏ ព្យាយាមហោះត្រឡប់មកកាន់ប្រលានយន្តហោះក្នុងទីក្រុងកូឡាឡាំពួរ រហូតអាចចុះចតដោយសុវត្ថិភាព។
…វិធីសាស្ត្រ ១០យ៉ាងអាចធ្វើឱ្យលោកអ្នកមានឱកាសនៅមានជីវិតករណីយន្តហោះធ្លាក់…
នេះគឺជាហេតុការណ៍ថ្មីមួយទៀត បន្ទាប់ពីយន្តហោះ QZ8501 របស់ក្រុមហ៊ុន AirAsia បានធ្លាក់ចូលសមុទ្រជ្វាបណ្តាលឲ្យមនុស្ស១៦២ នាក់បានស្លាប់៕
ប្រែសម្រួល៖ រស្មី
ប្រភព៖ channelnewsasia.com
