បន្ទាប់ពី​ក្រុមហ៊ុន Microsoft ដាក់​ចេញ​កម្មវិធី Microsoft Office ជំនាន់​សាកល្បង (Office Preview) មុន​ចេញ​ផ្លូវការ​កាលពី​ចុង​ឆ្នាំ​២០១៤ ពេល​នេះ ក្រុមហ៊ុន Software យក្ស​នេះ បាន​សម្រេច​ដាក់​ចេញ​កម្មវិធី​ជំនាញ​សម្រាប់​កិច្ចការ​ការិយាល័យ​នេះ​ផ្លូវការ សម្រាប់​ដំណើរការ​នៅ​លើ ស្មាតហ្វូន/ថេប្លេត ប្រើ Android OS ហើយ។

នៅ​លើ​ទំព័រ blog ផ្លូវការ​របស់ Microsoft ក្រុមហ៊ុន​បាន​បញ្ជាក់​ថា ក្រុមហ៊ុន​កំពុង​ខិតខំ​អភិវឌ្ឍ​កម្មវិធី Office ជាមួយ​បទពិសោធន៍​ខ្ពស់ សម្រាប់​បំពេញ​តម្រូវការ​សាធារណជន ដែល​ក្នុង​នោះ ក្រុមហ៊ុន​យក​ចិត្ត​ទុកដាក់​នៅ​លើ​សេវាកម្ម Cloud សម្រាប់​ភ្ជាប់​ជាមួយ Office app ផង​ដែរ។ កាលពី​ថ្ងៃ​ទី២១ ខែ​មករា​នេះ ក្រុមហ៊ុន​បាន​ដាក់​ចេញ​ជំនាន់ Office សាកល្បង​គឺ Office 2016 សម្រាប់​ដំណើរការ​លើ Windows 10 ប្រភេទ touch និង​ឧបករណ៍​ឆ្លាតវៃ​ចល័ត។

ចំណែក​ថ្ងៃ​នេះ ក្រុមហ៊ុន​មាន​មោទនភាព ប្រកាស​ចេញ​កម្មវិធី Microsoft Office ដែល​អាច​បំពេញ​ការងារ​ទាក់ទង​នឹង​ការ​រៀបចំ​ឯកសារ Word, Excel និង PowerPoint សម្រាប់​ថេប្លេត Android។ វីដេអូ​ខាង​ក្រោម​នឹង​បង្ហាញ​អំពី​ផ្ទាំង​ការងារ​នៅ​លើ​កម្មវិធី Office សម្រាប់ Android៖

សូម​បញ្ជាក់​ថា ក្រុមហ៊ុន Software យក្ស​នេះ​បាន​ដាក់​ចេញ​កម្មវិធី Microsoft Office ផ្លូវការ​ដំណើរការ​នៅ​លើ iPhone/iPad/iPod Touch រួច​មក​ហើយ​កាលពី​ឆ្នាំ​២០១៤ ចំណែក​ពេល​នេះ Office ផ្លូវការ​សម្រាប់ Android លោក​អ្នក​ក៏​អាច​ទាញ​យក​បាន​ដែរ។

ទាញ​យក​កម្មវិធី Microsoft Office ដោយ​ឥត​គិត​ថ្លៃ  Android

ប្រែ​សម្រួល៖ លី ឈៀន

ប្រភព៖​ mashable, geeky-gadgets