ក្រុមហ៊ុន​ដឹក​អ្នកដំណើរ​ក្នុង​រាជធានី​ភ្នំពេញ​យីហោ​វីរៈ​​​ប៊ុន​ថាំ​​អេច​ប្រេស​ បាន​អះអាង​ថា​ ក្រុមហ៊ុន​ខ្លួន​ជា​ក្រុមហ៊ុន​​ផ្ដល់​សេវា​រថយន្តក្រុង​ថ្មី​​ហើយ​ប្លែក​​ដំបូង​គេ​ក្នុង​ប្រទេស​កម្ពុជា ដែល​មាន​រៀបចំ​គ្រែ​ពូក​ ​​ទូរទស្សន៍ និង​​មាន​ផ្ដល់​​សេវា​ Wifi ដោយ​ដឹក​អ្នកដំណើរ​ទៅ​ខេត្ត​​កំពុង​មាន​សក្ដានុពល​មួយ​ចំនួន​ក្នុង​ប្រទេស និង​ធ្លាយ​ដល់​ប្រទេសជិតខាង​​​ទៀត​ផង។ ​​

​គិត​មក​ទល់​ពេលនេះ ក្រុមហ៊ុន​ដឹក​អ្នកដំណើរ​​វីរៈ​​​ប៊ុន​ថាំ​​អេច​ប្រេស​ បាន​ដំណើរ​ការ​​អស់​រយៈពេល​ជាង​ ៨​ឆ្នាំ​មក​ហើយ ​​ហើយ​​ការ​ផ្ដល់​សេវា​រថយន្តក្រុង​ដែល​មាន​រៀបចំ​គ្រែ​ពូក​​ ​បាន​ប្រហែល ​​៣​ឆ្នាំ​​ហើយ​ដែរ។ ​​

​អ្នកគ្រប់គ្រង​ក្រុមហ៊ុន​​រថយន្ត​ដឹក​អ្នក​ដំណើរ​​​​​ខាង​លើ​ លោក នៅ គា​វី​រៈ ឲ្យ​ ​TheBNEWS​ ​ដឹង​ថា តាម​ពិត​ទៅ​ក្រុមហ៊ុន​លោក​បាន​ផ្តល់​សេវា​រថយន្តក្រុង​ដែល​មាន​រៀបចំ​បន្ទប់​មាន​គ្រែ​ពូក​ ទូរទស្សន៍ កន្លែង​សម្រាប់​សាក​ទូរស័ព្ទ​ និង​មាន​​ផ្ដល់​ WiFi ​នេះ ​អស់​រយៈពេល​បី​ឆ្នាំ​ហើយ​គ្រាន់តែ​ថា មហាជន​នៅ​មិន​ទាន់​បាន​ទទួល​បាន​ដំណឹង​នេះ​គ្រប់​ៗ​គ្នា​​ប៉ុណ្ណោះ​។​

​អ្នកគ្រប់គ្រង​រូប​នេះ​ បាន​បន្ត​ទៀត​ថា ក្រុមហ៊ុន​​​លោក​ ​មាន​ផ្ដល់​សេវា​រថយន្ត​ចែកចេញជា​បី​ប្រភេទ គឺ​ទី​១ ប្រភេទ​រថយន្ត​ធំ​ពីរ​ជាន់ ​Hotel Bus ដែល​មាន​បន្ទប់​គេង​គ្រែ​ពូក និង ប្រភេទ​រថយន្ត​ដែល​អាច​ទម្រេត​ខ្លួន​បាន​ ​30​ដឺ​ក្រេ ពោល​គឺ ផ្អែក​បាន​ពាក់កណ្ដាល​ខ្លួន ​(Sleeping Bad) និង​រថយន្ត​មួយ​ប្រភេទ​ទៀត​គឺ រថយន្ត​ដែល​មាន​កន្លែង​សម្រាប់​អង្គុយ​ធម្មតា​ដែល​យើង​ហៅថា Sitting Bus​។​

​លោក វីរៈ​បញ្ជាក់​ថា សម្រាប់​តម្លៃ​វិញ ប្រភេទ​រថយន្ត​ធំ​ពីរ​ជាន់ Hotel Bus តម្លៃ​ចន្លោះ​ពី​១០-១១$ សម្រាប់​ការ​ធ្វើដំណើរ​ពី​ភ្នំពេញ ទៅ​ខេត្ត សៀមរាប ​​ខេត្ត​ព្រះសីហនុ​ និង​ប៉ោយប៉ែត ។ ឯ​ប្រភេទ​រថយន្ត Sleeping Bad និង Sitting Bus វិញ តម្លៃ​ចន្លោះ​ពី​៧-៩$ សម្រាប់​ការ​ធ្វើដំណើរ​ទៅ​ខេត្ត​ទាំង​បី​ខាងលើ និង​អាច​ធ្លាយ​ដល់​ប្រទេសជិតខាង​។​

​សូម​បញ្ជាក់​ថា ក្រុមហ៊ុន​ដឹក​អ្នកដំណើរ​​វីរៈ​​​ប៊ុន​ថាំ​​អេច​ប្រេស​ ​​ទទួល​បាន​ភ្ញៀវ​​បាន​ចំនួន​ចន្លោះ​ពី​២០០-៣០០​នាក់​ក្នុង​មួយថ្ងៃ​៕

​ដោយ​៖ ម៉ៅ ចរិយា