ជនសង្ស័យថាជាចារបុរសរុស្ស៊ីម្នាក់ត្រូវបានចាប់ខ្លួននៅក្រុងញវយ៉ក
ផ្នែកការទូតរុស្ស៊ីបានប្រកាសកាលពីថ្ងៃអង្គារ ថាការចាប់ខ្លួនជនសង្ស័យជាចារបុរសរុស្ស៊ីនេះ គឺវាឋិតនៅក្នុងក្របខ័ណ្ឌនៃ”យុទ្ធនាការប្រឆាំងរុស្ស៊ី” ដែលដំណើរការដោយសហរដ្ឋអាមេរិកដើម្បីប្រឆាំងនឹងប្រទេសរុស្ស៊ីដែលមានទំនាក់ទំនងដ៏ល្អក់កករជាទីបំផុតជាមួយលោកខាងលិចចាប់តាំងពីសង្គ្រាមត្រជាក់មក។
ក្រសួង FBIអាមេរិក បានប្រកាសពីញូវយក អំពីការចាប់ខ្លួនជនម្នាក់ដែលសង្ស័យថាជាចារបុរសរុស្ស៊ីកាលពីម្សិលមិញ
ការិយាល័យស៊ើបអង្កេតរដ្ឋសហព័ន្ធអាមេរិក ហៅកាត់ថា FBI បានប្រកាសពីទីក្រុងញ៉ូវយ៉កកាលពីថ្ងៃច័ន្ទ ពីការចាប់ខ្លួនជនសង្ស័យថាជាចារបុរសរបស់រុស្សីដែលធ្វើការក្នុងធនាគាររុស្សីនិងក៏ជាសមាជិកនៃបណ្តាញដែលព្យាយាមដើម្បីប្រមូលទិន្នន័យសេដ្ឋកិច្ច នេះបើតាមអជ្ញាធរប៉ូលិសសហព័ន្ធអាមេរិក។
ចំណែកខាងការទូតរុស្ស៊ីបានគូសបញ្ជាក់ថា ជនដែលត្រូវបានគេចាប់នោះឈ្មោះ Evgueni Bouriakov មានតួនាទីជានាយករងតំណាងរបស់ធនាគាររុស្ស៊ី Vnesheconombank នៅអាមេរិកហើយថាជាការចោទប្រកាន់ដែលគ្មានភស្តុតាងជាសំអាងទាល់តែសោះពីភាគីអាមេរិក។
អ្នកនាំពាក្យក្រសួងការបរទេសរុស្ស៊ី លោក Alexandre Loukachevitch បានសង្កត់ធ្ងន់ក្នុង សេចក្តីថ្លែងការណ៍មួយនៅថ្ងៃអង្គារថា សហរដ្ឋអាមេរិកបានសម្រេចចិត្ត បើកដំណើរការនូវតំណាក់កាលថ្មីមួយនៃយុទ្ធនាការប្រឆាំងនឹងរុស្ស៊ី ដោយបានជជុះបង្កើតបញ្ហាថ្មីមួយបន្ថែមទៀតពីរឿងចារកម្ម។ លោក Loukachevitch បានលើកឡើងថា ទំនាក់ទំនងរវាងរុស្ស៊ីនិងអាមេរិកមានជាយូរមកហើយដោយ បានឆ្លងកាត់នូវរយៈកាលដ៏លំបាក ដោយសារតែគោលនយោបាយប្រទូស្តរ៉ាយហិង្សារបស់ក្រុងវ៉ាស៊ីនតោន។
លោកក៏បានអំពាវនាវដល់សេវាសម្ងាត់អាមេរិកថា គួរបញ្ចប់នូវការបង្កហេតុនានា ប្រឆាំងនឹងពលរដ្ឋរុស្ស៊ី ដោយលោកយល់ឃើញថាទង្វើបែបនេះនឹងនាំឲ្យបញ្ហាក្នុងទំនាក់ទំនងទ្វេភាគីកាន់តែធ្ងន់ធ្ងរនិងក៏ធ្វើឱ្យខូចដល់អនាគតសម្រាប់កិច្ចសហប្រតិបត្តិការ រវាងទីក្រុងម៉ូស្គូនិងវ៉ាស៊ីនតោន។
គួររំលឹកផងដែរថា ថ្មីៗនេះប្រទេសរុស្ស៊ីបានទទួលរងនូវទណ្ឌកម្មសេដ្ឋកិច្ចដែលមិនធ្លាប់មានពីមុនមកពីសំណាក់សហភាពអឺរ៉ុបនិងសហរដ្ឋអាមេរិក ដែលបានចោទប្រកាន់ប្រទេសរុស្សុីពីការគាំទ្រដោយយោធា ចំពោះក្រុមឧទ្ទាមដែលឋិតនៅភាគខាងកើតប្រទេសអ៊ុយក្រែន។
បន្ទាប់ពីការទម្លាក់គ្រាប់បែកនៅកំពង់ផែអ៊ុយក្រែនក្នុងក្រុង Mariupol ដែលបានសម្លាប់ជនស៊ីវិលចំនួន ៣០នាក់ និងដែលត្រូវបានគេដឹងថាជាស្នាដៃរបស់ក្រុមបំបែកខ្លួនទំនោរគាំទ្ររុស្ស៊ី លោកប្រធានាធិបតី អាមេរិក បារ៉ាក់ អូបាម៉ា ក៏បានសន្យាផងដែរកាលពីថ្ងៃអាទិត្យកន្លងទៅថា នឹងបង្កើនសំពាធបន្ថែមទៀតចំពោះប្រទេសរុស្ស៊ី៕ ប្រភពៈ RFI
