ប្រទេសជាឋានសួគ៌សម្រាប់អ្នកវិនិយោគគឺអាស៊ីអាគ្នេយ៍
ប្រទេសដែលបង្កលក្ខណៈល្អប្រសើរសម្រាប់ការប្រកបមុខរបររកទទួលទាន (Business-Friendly Countries) មិនមែនប្រទេសដែលមានទំហំសេដ្ឋកិច្ចធំៗ ដូចជាប្រទេសចិន – ប្រេស៊ីល (Brazil) -ឬឥណ្ឌា (India) នោះទេ។ នេះបើយោងតាមការចាត់ចំណាត់ថ្នាក់របស់ធនាគារពិភពលោក (World Bank)។ ប្រទេសខ្លះមានទំហំតូច ប៉ុន្តែបែរជាកន្លែងដ៏ល្អសម្រាប់ប្រកបមុខរបរ ដែលគេហៅថា «តូចតែខ្លឹម» តួយ៉ាងដូចជាប្រទេសសិង្ហបុរី និងប្រទេសនូវែលហ្សេឡង់ (New Zealand) គឺវ៉ាដាច់គេក្នុងចំណោមប្រទេសចំនួន ១៨៧ ដែលស្ថិតក្នុងបញ្ជីវាយតម្លៃ និងចាត់ចំណាត់ថ្នាក់។
«ធនាគារពិភពលោក» វាយតម្លៃនេះ ដោយយោងតាម «សូចនាករបែបបរិមាណវិស័យ -quantitative indicators» ស្ដីពី«បទបញ្ញត្តិក្នុងវិស័យធុរកិច្ច – business regulation» ហើយយកសូចនាករនេះជាគោល ដើម្បីប្រៀបធៀបប្រទេសទាំង ១៨៩ នេះ។ នីតិវិធីក្នុងការវាយតម្លៃនេះ គឺគិតចាប់ពីការដំណើរការមុខរបររកស៊ី និងវិនិយោគដំបូងបំផុត រហូតដល់ការរត់ការសុំសិទ្ធិបើកអាជីវកម្ម ឬវិនិយោគ – ការផ្គត់ផ្គង់អគ្គិសនីសម្រាប់សហគ្រាស និងឧស្សាហកម្មតូចធំ – ការចុះបញ្ជិកាក្នុងក្រសួង – កិច្ចគាំពារវិនិយោគិន – នីតិវិធីក្នុងការបង់ពន្ធ – មធ្យោបាយដឹកជញ្ជូនផលិតផលចេញទៅក្រៅប្រទេស – ការគោរពកិច្ចសន្យាយ៉ាងខ្ជាប់ខ្ជួន – និងនីតិវិធីដោះស្រាយក្នុងករណីក្រុមហ៊ុនក្ស័យធន (insolvency)។
ប្រទេសដែលមានចំណាត់ថ្នាក់ទាបជាងគេក្នុងបញ្ជីគឺប្រទេសដែលកំពុងកើតមានចម្បាំងរាំងជល់ និងប្រទេសដែលមានអសន្តិសុខពេញផ្ទៃប្រទេសដូចជា៖ អេរិចទ្រា (Eritrea) – លីប៊ី (Libya) – សាធារណរដ្ឋអាហ្វ្រិកកណ្ដាល (Central African Republic) – ស៊ូដង់ខាងត្បូង (South Sudan) – អាហ្វហ្គានីស្ថាន (Afghanistan)។ល។ បណ្ដាប្រទេសអាស៊ីដែលនាំមុខគេក្នុងបញ្ជីមានដូចជា៖ ១- សិង្ហបុរី (Singapore) ២- នូវែលហ្សេឡង់ (New Zealand) ៣- កោះហុងកុង (Hong Kong) ៥- កូរ៉េខាងត្បូង (South Korea) ១០- អូស្ត្រាលី (Australia) ១៨- ម៉ាឡេស៊ី (Malaysia) ២៦- ថៃ (Thailand) ២៩- ជប៉ុន (Japan) ៕
ប្រែសម្រួល ៖ អន សំអាង
ប្រភព៖ businessinsider.com
