កងយោធាឥណ្ឌូណេស៊ីឈប់ស្វែងរកនិងស្រង់យកបំណែកយន្តហោះនិងសាកសព AirAsia QZ8501 ហើយ
កងកម្លាំងយោធារបស់ប្រទេសឥណ្ឌូណេស៊ី បានប្រកាសកាលពីថ្ងៃម្សិលមិញថា ខ្លួនបានបញ្ឈប់កិច្ចខិតខំប្រឹងប្រែងដើម្បីស្រង់យកបំណែកយន្តហោះ និងសាកសពពីសមុទ្រជ្វាហើយបន្ទាប់ពីបានបំពេញបេសកកម្មនេះអស់រយៈពេលប្រមាណ ១ខែ។ នេះបើយោងតាមការចុះផ្សាយរបស់ សារព័ត៌មាន CNN។
បើតាមប្រភពដដែល ទោះជាក្រុមយោធារបស់ប្រទេសឥណ្ឌូណេស៊ីបានបញ្ឈប់សកម្មភាពនេះក្ដី ប៉ុន្តែទីភ្នាក់ងារជួយសង្គ្រោះនិងរុករករបស់ឥណ្ឌូណេស៊ី (BASARNAS) នឹងនៅតែបន្តស្រង់យកសាកសពដែលជាប់នៅក្នុងបំណែក និងតួយន្តហោះនៅក្នុងសមុទ្រជ្វាបន្តទៀត។
សូមបញ្ជាក់ថា កងយោធានៃប្រទេសឥណ្ឌូណេស៊ីបានផ្ដល់កងកម្លាំង និងបរិក្ខារជាច្រើនក្នុងប្រតិបត្តិការរុករកយន្តហោះរបស់ក្រុមហ៊ុន AirAsia កន្លងមក។ ការប្រកាសរបស់កងយោធាឥណ្ឌូណេស៊ីនៅពេលនេះ បានធ្វើឱ្យគ្រួសារជនរងគ្រោះមួយចំនួនមិនសប្បាយចិត្ត ខណៈសមាជិកគ្រួសាររបស់ពួកគេដែលនៅលើយន្តហោះនោះមិនទាន់ត្រូវបានស្រង់មកលើគោកបាននៅឡើយ។
គិតមកទល់នឹងពេលនេះ សាកសពនៅលើយន្តហោះ QZ8501 ត្រូវបានស្រង់ដោយជោគជ័យបានចំនួន ៧០នាក់ហើយ។ កាលពីចុងសប្ដាហ៍កន្លងទៅនេះ ក្រុមអ្នកមុជទឹកនៃកងទ័ពជើងទឹកឥណ្ឌូណេស៊ី បានព្យាយាមស្រង់តួយន្តហោះពីក្នុងទឹកដោយប្រើខ្សែពួរ និងបាល់ឡុងចងភ្ជាប់ប៉ុន្តែមិនទទួលបានជោគជ័យនោះទេព្រោះថាដាច់ខ្សែ៕
ប្រភព៖ http://edition.cnn.com/
