ទៀ បាញ់៖ ឡានពាក់ស្លាក ន.ប, ខ.ម មិនក្លែងក្លាយទេ
ភ្នំពេញៈ រដ្ឋមន្រ្តីក្រសួងការពារជាតិ លោក ទៀ បាញ់ កាលពីថ្ងៃព្រហស្បតិ៍បានឡើងបំភ្លឺក្នុងវេទិការបស់សភាពាក់ព័ន្ធនឹងយានយន្តដែលប្រើស្លាក ន.ប និង ខ.ម ថា សុទ្ធតែជាស្លាកលេខស្របច្បាប់គ្មានការក្លែងបន្លំទេ។
ក្នុងកិច្ចពិភាក្សាលើសេចក្តីព្រាងច្បាប់ស្តីពីចរាចរណ៍ផ្លូវគោករបស់រដ្ឋសភាកាលពីម្សិលមិញ តំណាងរាស្ត្រគណបក្សប្រជាជនកម្ពុជា និងជារដ្ឋមន្រ្តីក្រសួងការពារជាតិ លោក ទៀ បាញ់ បានផ្តល់អនុសាសន៍ពីការគ្រប់គ្រងយានយន្តនិងតបទៅនឹងការលើកឡើងរបស់គណបក្សសង្គ្រោះជាតិ ពាក់ព័ន្ធនឹងយានយន្តជាច្រើនចរាចរណ៍ក្នុងរាជធានីដែលប្រើស្លាកលេខ នគរបាល (ន.ប) និង ខេមរភូមិន្ទ (ខ.ម) ដែលអ្នកខ្លះមិនបានបំពេញការងារទេ បែរជាប្រើស្លាកលេខនោះយកទៅជិះដើរលេង រំលោភអំណាចពាក់ស្បែកខ្លា ធ្វើបាបប៉ូលិសចរាចរណ៍ដោយបើកបរខុសច្បាប់ថែមទៀតផង។
លោក ទៀ បាញ់ បានលើកឡើងថា៖ «ក្រសួងការពារជាតិ មានមន្ដ្រីមួយចំនួនដែលមានសមត្ថកិច្ចអាចប្រើប្រាស់យានយន្តបំពាក់ស្លាកលេខក្រសួងការពារជាតិ អ្នកដែលដាក់ស្លាកលេខទាំងនេះ គឺធ្វើដោយស្របច្បាប់អត់មានភាពអនាធិបតេយ្យទេ ដោយអ្នកទាំងនោះសុទ្ធតែជាកម្លាំងនគរបាលនិងខេមរភូមិន្ទយ៉ាងពិតប្រាកដ ពុំមានក្លែងបន្លំឡើយ»។
ឆ្លើយតបនឹងរឿងនេះ តំណាងរាស្ត្រគណបក្សសង្គ្រោះជាតិ លោក គឹមសួរ ភិរិទ្ធ បានអះអាងតបភ្លាមៗថា ការលើកឡើងរបស់លោក ទៀ បាញ់ គឺមិនត្រឹមត្រូវតាមច្បាប់ឡើយ ព្រោះច្បាប់មិនបានចែងកំណត់ឲ្យមានការប្រើប្រាស់ស្លាកលេខនោះ លើរថយន្តឯកជនរបស់មន្រ្តីរាជការឡើយ ជាក់ស្តែង ឡានស៊ីវិលជាច្រើនបានកំពុងប្រើប្រាស់ស្លាកទាំងនោះ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានថ្លែងដែរថា៖ «ប្រជាពលរដ្ឋតែងតែរអ៊ូរទាំជុំវិញរឿងនេះ មានអ្នកខ្លះប្រើប្រាស់ស្លាកលេខឡាននេះ បង្កភាពមិនប្រក្រតីហើយមិនទទួលខុសត្រូវ ថែមទាំងសំឡុត គំរាមអ្នកដំណើរផង»។
ក្នុងកិច្ចប្រជុំកាលពីម្សិលមិញនេះ តំណាងរាស្ត្រគណបក្សទាំងពីរ បានផ្តល់ជាអនុសាសន៍និងសំណើទៅរដ្ឋមន្ដ្រីក្រសួងសាធារណការនិងដឹកជញ្ជូន ជុំវិញការរៀបចំនិងកែសម្រួលផ្លូវថ្មើរជើងផ្លូវសម្រាប់អ្នកអូសរទេះ ដឹកសត្វ ការបង្កើនសមត្ថភាពដល់សមត្ថកិច្ចក្នុងការគ្រប់គ្រងស្ថានការណ៍ពេលមានគ្រោះថ្នាក់ចរាចរណ៍ ការបង្កភាពងាយស្រួលក្នុងការទទួលប័ណ្ណបើកបរ កាតព្វកិច្ចម្ចាស់ហាងលក់យានយន្តក្នុងការផ្តល់ស្លាកលេខនិងប័ណ្ណសម្គាល់យានយន្តដល់អ្នកទិញ គួបផ្សំការពង្រឹងសមត្ថភាពអនុវត្តច្បាប់របស់គណៈកម្មាធិការ សុវត្ថិភាពចរាចរណ៍ផ្លូវគោក។
ឆ្លើយតបនឹងអនុសាសន៍ទាំងនេះរដ្ឋមន្រ្តីក្រសួងសាធារណការ និងដឹកជញ្ជូន លោក ត្រាំ អ៊ីវតឹក បានថ្លែងថា ក្រសួងនឹងពង្រឹងកែតម្រូវបន្ថែមតាមអនុសាសន៍ទាំងនេះ បើទោះជាការរៀបចំមួយចំនួននៅមានភាពខ្វះខាតច្រើនក្តី។
លោកបន្ថែមថា៖ «យើងក៏នឹងគ្រោងរៀបចំប្រព័ន្ធគ្រប់គ្រងស្លាកលេខយានយន្តផងដែរ ដើម្បីអាចកំណត់អត្តសញ្ញាណម្ចាស់យានយន្តទាំងនោះបានរហ័ស និងមានប្រសិទ្ធភាព»។
រហូតមកទល់ថ្ងៃព្រហស្បតិ៍ ទី៤ ខែធ្នូ ម្សិលមិញនេះ សភាបានអនុម័តច្បាប់ស្តីពីចរាចរណ៍ផ្លូវគោក បានចំនួន ៤ ជំពូកទៀតបន្ថែមលើ ៤ ជំពូកដែលបានអនុម័តកាលពីពីរថ្ងៃមុន។ រដ្ឋសភាក៏គ្រោងនឹងពិភាក្សាលើសេចក្តីព្រាងច្បាប់នេះបន្តនៅព្រឹកថ្ងៃសុក្រនេះ ដើម្បីពន្លឿនច្បាប់នេះចូលជាធរមានក្នុងគោលបំណងការពារសុវត្ថិភាពចរាចរណ៍របស់ប្រជាពលរដ្ឋជាចម្បង៕
ប្រភពពី ភ្នំពេញប៉ុស្តិ៍
