ទីបំផុតធ្លាយព័ត៌មាន ប៊ីរីយ៉ា ដើរចែកធៀបការហើយ!
សាមីខ្លួន កញ្ញា ប៊ីរីយ៉ា បានបដិសេធ បន្ទាប់ពីធ្លាយព័ត៌មានកញ្ញា ត្រៀមចូលរោងការជាមួយនឹងគូស្នេហ៍ថ្មីជំនួសឲ្យលោក ចាំង ហ៊ុនជ័រ ជើងខ្លាំងខាងសេវាកម្សាន្ត AK អតីតសង្សារចាស់។ ប៉ុន្តែឥឡូវនេះ មានព័ត៌មានចេញមកទៀតថា កូនកាត់ឥណ្ឌារូបនេះ ដើរចែកធៀបការហើយ។
” ប៊ីរីយា…គេការថ្ងៃទី១០ធ្នូនេះហើយណាបង…គេមានហៅបងអត់?”។ តារាស្រីម្នាក់ បានផ្ដល់ដំណឹងនេះមកកាន់ Sabay ។ ប្រភពលាក់មុខនេះ ប្រាប់ទៀតថា គេបានទទួលការអញ្ជើញរួចហើយ ហើយតាមព័ត៌មានក្នុងធៀបនោះ មង្គលការរបស់កញ្ញា ប៊ីរីយ៉ា នឹងរៀបចំធ្វើឡើងនៅមជ្ឈមណ្ឌលម៉ុងឌីយ៉ាល់ អគារ C ។ យ៉ាងណា រូបគេមិនដឹងថា កូនកំលោះរបស់ ប៊ីរីយ៉ា ឈ្មោះអ្វីទេ។
“ខ្ញុំអត់ដឹងស្វាមីគេឈ្មោះអីទេបង ធៀបការគេធ្វើឲ្យតាម Facebook ដែរហ្នឹង មានតែមួយចំហៀងខាងមុខ អត់មានខាងក្នុងទេ អីចឹងអត់ដឹងថាឈ្មោះអីទេ!”។
ដំណឹងនេះ សាមីខ្លួន ប៊ីរីយ៉ា មិនទាន់អាចសុំការបញ្ជាក់ដោយផ្ទាល់បានទេ ដោយក្រុមការងារយើងបានទូរសព្ទចូលជាច្រើនដង ក្នុងនោះមានម្ដងនាងទទួលតែអត់និយាយ។ ក្រោយទៀត មាននារីម្នាក់ដែលប្រាប់ថា ជាជំនួយការរបស់ ប៊ីរីយ៉ា បានលើកទូរសព្ទជំនួស ប្រាប់ថា តារាសម្ដែងរូបនេះ កំពុងជាប់រវល់។ យ៉ាងណាជំនួយការរូបនេះ ទទួលថា ប៊ីរីយ៉ា ពិតជារៀបការមែន។ “ចាស៎…ពិតមែន…ប៉ុន្តែចង់សួរអីទៀត បងអ្ហែងចាំសួរគេផ្ទាល់ខ្លួនឯងទៅ!”។
វិលមកលោក ចាំង ហ៊ុនជ័រ ជាអតីតគូស្នេហ៍របស់ ប៊ីរីយ៉ា ប្រាប់ថាលោកអត់ទាន់ទទួលបានដំណឹងនេះទេ។ “អត់…អត់ទាន់បានដឹងផង…ខ្ញុំលឺតែគេថាជិតការៗដែរ ប៉ុន្តែកន្លងអត់ឃើញការផង”។ លោក ហ៊ុនជ័រ ប្រាប់ទៀតពួកលោកនៅតែរាប់អានគ្នាជាមួយអតីតគូស្នេហ៍ បើទោះបែកគ្នាហើយក៏ដោយ។ ដូច្នេះគ្មានបញ្ហាទេ បើអតីតគូស្នេហ៍អញ្ជើញការ លោកនឹងទៅចូលរួម។
យ៉ាងណា តាមព័ត៌មានដែលធ្លាយចេញកាលពីពេលមុន បានឲ្យដឹងថា ប៊ីរីយ៉ា និងគូស្នេហ៍ថ្មីឈ្មោះ តាំង ហៃឡេង ហៅ Iron Fox។ ដូចនឹងព័ត៌មានធ្លាយចេញពេលនេះដែរ គឺពិធីជ័យរបស់ តារាម៉ូដែល និងសម្ដែងរូបនេះ គ្រោងធ្វើនៅមជ្ឈមណ្ឌលម៉ុងឌីយ៉ាល់ និងគ្រោងអញ្ជើញភ្ញៀវកិត្តិយសខ្ទង់ជាង ៥០០នាក់ឯណោះ៕
ធៀបការរបស់ ប៊ីរីយ៉ា ដែលប្រភពទទួលបានតាម Facebook
អត្ថបទ៖ ទារិកា
