សមត្ថកិច្ចមូលដ្ឋានអះអាងថាបុរសម្នាក់អារកសម្លាប់ខ្លួនឯងព្រោះតែមានវិបត្តិក្នុងគ្រួសារ
ភ្នំពេញ ៖ បុរសម្នាក់បានអារ.កសម្លាប់ខ្លួនឯងនៅក្នុងផ្ទះ កាលពីវេលាម៉ោង៣នាទីរសៀល ថ្ងៃទី៧ ខែវិច្ឆកា ឆ្នាំ២០១៤ឋិតក្នុងភូមិស្ងួនពេជ្រ សង្កាត់កន្ទោក ខណ្ឌពោធិ៏សែនជ័យ រាជធានីភ្នំពេញ ដោយមិនដឹងមូលហេតុច្បាស់ លាស់ ។
ជនរងគ្រោះមានឈ្មោះ សាត វណ្ណឌី ភេទប្រុស អាយុ២៦ឆ្នាំ មុខរបរកម្មកររោងចក្រកាត់ដេរ មានទីលំនៅផ្ទះក្នុងភូមិកើតហេតុខាងលើ។
ក្រុមគ្រួសារជនរងគ្រោះបានប្រាប់ឲ្យដឹងដែរថា មុនពេលកើតហេតុ ជនរងគ្រោះបានដើរចេញទៅក្រៅផ្ទះរបស់ខ្លួន ហើយគេឃើញអង្គុយតែម្នាក់ឯងនៅ មាត់ប្រឡាយ ដែលមានចម្ងាយពីផ្ទះប្រហែលជាង២០ម៉ែត្រ បន្ទាប់មកក៏ឃើញជនរងគ្រោះដើរត្រឡប់មកផ្ទះវិញ ដោយមិននិយាយរកបងប្អូនណាទេ ហើយក៏ដើរចូលក្នុងផ្ទះបាត់ ។ ក្រោយមក បងជីដូនមួយស្រីម្នាក់ដើរចូលទៅក្នុងផ្ទះក៏ប្រទះឃើញជនរងគ្រោះដេកដួលក្នុងថ្លុកឈាម បង្កការភ្ញាក់ផ្អើលឆោឡោតែម្តង ។
នាយប៉ុស្តិ៏នគរបាលរដ្ឋបាលកន្ទោក បានប្រាប់ឲ្យដឹងតាមទូរស័ព្ទថា បុរសរូបនេះកាលពីក៏ធ្លាប់បានប្រើប្រាស់ថ្នាំផងដែរ ប៉ុន្តែឥឡូវនេះជនរងគ្រោះបានឈប់ប្រើប្រាស់ទៀតហើយ ។ នាយប៉ុស្តិ៍ដដែលបន្តថា ករណីដែលជនរងគ្រោះអារ.កសម្លាប់ខ្លួនឯងនេះក៏មិនបានដឹងច្បាស់ថា បណ្តាលពីមូលហេតុអ្វីដែរ ព្រោះក្រុមគ្រួសារក៏មិនបាននិយាយអ្វីដែរ ។
ដោយឡែក សមត្ថកិច្ចជំនាញព្រហ្មទណ្ឌខណ្ឌដែលបានចុះដល់កន្លែងកើតហេតុ បានឲ្យដឹងដែរថា ជនរងគ្រោះបានដេកស្លាប់ថ្លុកឈាម ហើយនៅជិតខ្លួនសាកសពឃើញមានកាំបិតខ្លីចុងស្រួច ។ បើតាមការឲ្យដឹងពីសាច់ញាតិដែលបានរៀបរាប់ថា ជនរងគ្រោះអាចជួបវិប្បត្តិស្នេហា ឬវិប្បតិ្តក្នុងគ្រួសារ ។ សមត្ថកិច្ចបន្តថា ក្រោយពីសមត្ថកិច្ចធ្វើកោសល្សវិច័យរួចរាល់ ក៏បានប្រគល់ឲ្យគ្រួសារធ្វើបុណ្យតាមប្រពៃណី ៕
ប្រភពពី នគរវត្ត
