សង្សារមួយគូត្រូវរ៉ូវគ្នាតែក្រុមគ្រួសារខាងស្រីរារាំងបង្កជាអំពើហិង្សាបែកមុខខាងប្រុស
ភ្នំពេញ ៖ បុរសម្នាក់ដែលមានសង្សារស្រឡាញ់គ្នាល្អូកល្អឺន តែក្រុមគ្រួសារខាងនារីត្រូវជាបង និងឪពុកមារមិនពេញចិត្តបានព្រួតគ្នាវាយ ហើយគប់នឹងដុំថ្ម បណ្តាលឱ្យរងរបួសត្រង់ចង្ការ និងសៀតថ្កាខាងឆ្វេង ខណៈបុរសរូបនេះមកទទួលនារីជាសង្សារទៅលេងផ្ទះរបស់ខ្លួន ។ ហេតុការណ៍នេះបង្កឱ្យមានការភ្ញាក់ផ្អើលនៅវេលាម៉ោង៩និង៥០នាទីយប់ ថ្ងៃទី២៤ ខែវិច្ឆិកា ឆ្នាំ២០១៤ នៅចំណុចផ្ទះជួលក្រោយវត្តសន្សំកុសល តាមផ្លូវលេខ២៨BT ស្ថិតក្នុងភូមិសន្សំកុសល២ សង្កាត់បឹងទំពុន ខណ្ឌមានជ័យ រាជធានីភ្នំពេញ ។
បុរសរងគ្រោះមានឈ្មោះ អ៊ូ សំបាន ភេទប្រុស អាយុ២៤ឆ្នាំ រស់នៅក្នុងភូមិ-សង្កាត់ កើតហេតុ ខាងលើ ។
ប្រភពព័ត៌មានពីកន្លែងកើតហេតុបានឱ្យដឹងថា បុរសរងគ្រោះនិងនារីជាសង្សារស្រឡាញ់គ្នា និងបានរស់នៅជាមួយគ្នាម្តងម្កាលដូចជាប្តីប្រពន្ធទៅហើយ គ្រាន់តែអ្នកទាំងពីរមិនបានរៀបការតាមផ្លូវច្បាប់ ហើយបងប្អូនសាច់ញាតិខាងនារីជាសង្សារមិនពេញចិត្តខាងប្រុសនោះទេ ។
ប្រភពដដែលបានឱ្យដឹងថា នៅមុនពេលកើតហេតុ នារីជាសង្សារបានទូរស័ព្ទឲ្យបុរសរងគ្រោះ យកម៉ូតូមកឌុបនាងទៅលេងនៅផ្ទះក្រុមគ្រួសារបុរសរងគ្រោះដែលរស់នៅក្នុង ភូមិ-សង្កាត់ជាមួយគ្នា បុរសរងគ្រោះបានបើកម៉ូតូមកដល់នាងខាងស្រី ។ ខណៈមកដល់មុខផ្ទះជួលដែលនារីជាសង្សារជួលស្នាក់ នៅជាមួយក្រុមគ្រួសាររបស់នាងនោះ ក៏ស្រាប់តែត្រូវបងប្រុស និងឪពុកមារបស់នាង ដែលមិនសូវពេញចិត្តបុរសរងគ្រោះផងនោះ បានចេញមករារាំងហើយយកដុំថ្មគប់បុរសរងគ្រោះ បណ្តាលឱ្យរងរបួសចំចង្ការ និងសៀតថ្កាខាងឆ្វេង ។ ឃើញដូច្នេះយាយរបស់នារីរងគ្រោះបានចេញមកឃាត់កុំឱ្យវាយតប់គ្នា ក៏បណ្តាលឱ្យរងរបួសដៃផងដែរ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកពិនិត្យកន្លែងកើតហេតុ និងបានសួរនាំទើបដឹងថា ជារឿងទំនាស់ក្នុងគ្រួសារ ហើយសមត្ថកិច្ចក៏បានប្រាប់ទៅបុរសរងគ្រោះចាំមកដាក់ពាក្យបណ្តឹងនៅព្រឹកស្អែក ក្នុងនោះនារីជាសង្សារថា នាងនឹងសហការជាមួយបុរសជាសង្សារដោយមិនឱ្យរឿងនេះបញ្ចប់ដោយគ្មានដំណោះស្រាយនោះទេ ៕
___________
ប្រភពពីនគរវត្ត
