អាជ្ញាធរខេត្តកំពង់ឆ្នាំងរារាំងមិនឲ្យផ្តល់អំណោយផ្ទាល់ដៃ ដល់កីឡាករអុំទូកដែលមិនដាក់ឈ្មោះសែនជ័យ
សប្បុរសជនមួយក្រុមខកចិត្តនឹងអាជ្ញាធរ ដែលរារាំងពួកគេមិនឲ្យចុះចែកគ្រឿងឧបភោគ បរិភោគ និងថវិកាមួយចំនួនដោយផ្ទាល់ដៃ ដល់កីឡាករទូកងមួយគ្រឿង មកពីខេត្តកំពង់ឆ្នាំង ដែលពួកគេអះអាងថា មកពីទូកនោះមិនមានដាក់ពាក្យថា សែនជ័យ។
ទូកងជាង២០០ទូក ដែលមានឈ្មោះចូលប្រកួតប្រជែងក្នុងព្រះរាជពិធីបុណ្យអុំទូកឆ្នាំ២០១៤នេះ មាន ជិត៦០% បានដាក់ឈ្មោះដែលមានពាក្យតេជះ ឬសែនជ័យ។ ចំណែកទូកមួយមកពីស្រុកកំពង់ត្រឡាចខេត្តកំពង់ឆ្នាំង ដាក់ឈ្មោះបែបសាមញ្ញថា “ក្តាមប្រៃ”។
ព្រះសង្ឃមួយអង្គ ក្នុងចំណោមក្រុមការងារជាច្រើនទៀត ដែលចុះចែកអំណោយដល់កីឡាករ អុំទូកង ឈ្មោះក្តាមប្រៃ ព្រះនាម ណុប វណ្ណី មានថេរដីកាថា ក្រុមការងារព្រះអង្គបានចុះចែកអំណោយដល់ក្រុមកីឡាករក្តាមប្រៃនេះ ២ថ្ងៃជាប់ៗគ្នាមកហើយ ប៉ុន្តែព្រះអង្គថា ទើបតែនៅថ្ងៃទី៣ ត្រូវនឹងថ្ងៃទី៧ ខែវិច្ឆិកា ឆ្នាំ២០១៤នេះ ទើបគណៈកម្មការរៀបចំបុណ្យអុំទូក ខេត្តកំពង់ឆ្នាំង ដែលបោះទីតាំងនៅសាលាបឋមសិក្សាខណ្ឌជ្រោយចង្វា រាជធានីភ្នំពេញ មិនអនុញ្ញាតិឲ្យចុះចែកអំណោយ ដោយតម្រូវឲ្យយកអំណោយទាំងនោះទៅប្រគល់តាមរយៈគណៈកម្មការវិញ។
ព្រះអង្គយល់ថា វិធានការរបស់អាជ្ញាធរនេះ ជាការរើសអើងដើម្បីកេងចំណេញឲ្យបក្សនយោបាយណាមួយ និងអាចជាចេតនាចង់ប្រព្រឹត្តិអំពើពុករលួយ លើជំនួយមនុស្សធម៌នេះ។ លោកថា «ទូកគេផ្សេង ទូកគេភាគច្រើនត្រកូលសែនជ័យ ទូកគេសុទ្ធមេៗធំៗគ្រប់គ្រងតែម្តង ឧកញ៉ា មន្ត្រីធំៗគេអ្នកការពារ អ្នកឧបត្ថម្ភ។ ពួកគាត់ប្រកួតនេះ ប្រកួតយកកិត្តិយសជូនភូមិគាត់ បើថាទៅប្រជែងយកកិត្តិយសជាមួយគេ ទូកគេអ្នកធំៗគឺទៅមិនរួចទេ។ ទូកនេះអត់មានអ្នកឧកញ៉ា ឯកឧត្តមណាគ្រប់គ្រងផងហ្នឹង ពេលគាត់មក គាត់រៃអង្ករពីប្រជាពលរដ្ឋម្នាក់២-៣គីឡូឲ្យកីឡាគាត់អ្នកអុំហ្នឹង»។
VOD មិនអាចរកការបំភ្លឺពីអ្នកទទួលខុសត្រូវដែលចុះរារាំង បាននៅឡើយទេ នៅថ្ងៃសុក្រនេះ ប៉ុន្តែពលរដ្ឋដែលស្ថិតនៅក្នុងហេតុការណ៍រារាំងនោះ អះអាងថា អាជ្ញាធរបារម្ភថា ចំណីអាហារ ដែលក្រុមការងារ ឧបត្ថម្ភឲ្យកីឡាករផ្ទាល់ដៃនោះ ខ្លាចមានជាតិពុល ហើយអាចប៉ះពាល់ដល់សុខភាពកីឡាករពេលកំពុងប្រកួត។
បណ្ឌិតវិទ្យាសាស្ត្រនយោបាយ លោក សុខ ទូច ពន្យល់ថា មិនជាការចម្លែកទេដែលអាជ្ញាធរខ្មែរធ្វើកិច្ចការភ្ជាប់នឹងការកេងចំណេញនយោបាយ ហើយវាតែងតែជួបបញ្ហាសម្រាប់អ្នកមិនសម្របខ្លួនតាមការចង់បានរបស់អាជ្ញាធរ។ លោកបញ្ជាក់ថា «ក្តាមប្រៃហ្នឹងបើឈ្នះមែន វានឹងបង្ហាញពីការសាមគ្គីរបស់ប្រជាជនកម្ពុជា ដែលមិនចំណុះឲ្យអ្នកនយោបាយ ហើយចង់បង្ហាញថា ប្រជាជននៅកម្ពុជាការរួមគ្នា វាខ្លាំងជាងការប្រើប្រាស់អំណាច»។
បណ្ឌិតវិទ្យាសាស្ត្រនយោបាយ លោក សុខ ទូច ពន្យល់ថា មិនជាការចម្លែកទេដែលអាជ្ញាធរខ្មែរធ្វើកិច្ចការភ្ជាប់នឹងការកេងចំណេញនយោបាយ ហើយវាតែងតែជួបបញ្ហាសម្រាប់អ្នកមិនសម្របខ្លួនតាមការចង់បានរបស់អាជ្ញាធរ។ លោកបញ្ជាក់ថា «ក្តាមប្រៃហ្នឹងបើឈ្នះមែន វានឹងបង្ហាញពីការសាមគ្គីរបស់ប្រជាជនកម្ពុជា ដែលមិនចំណុះឲ្យអ្នកនយោបាយ ហើយចង់បង្ហាញថា ប្រជាជននៅកម្ពុជាការរួមគ្នា វាខ្លាំងជាងការប្រើប្រាស់អំណាច»។
យ៉ាងនេះក្តីកីឡាករអុំទូកង ឈ្មោះក្តាមប្រៃ អះអាងថា ទូកដែលមិនមានពាក្យថា សែនជ័យ នេះ បានឈ្នះបីប្រកួតជាប់ៗគ្មា រយៈពេល៣ថ្ងៃនេះ នៅសល់តែមួយប្រកួតទៀត ជាការប្រកួតផ្តាច់ព្រ័ត្រ នៅរសៀលថ្ងៃសុក្រនេះ៕
ប្រភពពី vodhotnews.com
