ទូកងក្តាមប្រៃមកពីខេត្តកំពង់ឆ្នាំងឈ្នះនៅថ្ងៃទីបីទៀតហើយ
ទូកងមានឈ្មោះថាក្តាមប្រៃមកពីខេត្តកំពង់ឆ្នាំង ដែលត្រូវបានអះអាងថា មានការរារាំងសប្បុរសជនផ្តល់អំណោយទៅឲ្យកីឡាករអុំទូកនេះ ត្រូវបានប្រកាសថា ជាអ្នកឈ្នះនៅថ្ងៃទីបីជុំទីមួយ ដែលមានឱកាសទៅរកការប្រកួតផ្តាច់ព្រ័ត្រយកចំណាត់ថ្នាក់លេខមួយ។
តាមការប្រកាសព័ត៌មានរបស់គណៈកម្មាការអុំទូក និងសាក្សីជាច្រើនបានឲ្យដឹងថា ទូកងក្តាមប្រៃមកពីខេត្តកំពង់ឆ្នាំងនេះ ដែលចំណុះអ្នកអុំជាង៧០នាក់ ដែលស្ថិតនៅលើខ្សែទឹកខាងក្រៅ បានឈ្នះលើគូប្រកួតមួយទៀតដែលមានឈ្មោះ “សំហេងសែនជ័យបារមីព្រែកប្រា” ត្រឹមប្រវែងជាងពីរម៉ែត្រពីក្បាលទូក។ តាមសេចក្តីរាយការណ៍ឲ្យដឹងទៀតថា ទូកងក្តាមប្រៃរយៈពេលបីថ្ងៃមកនេះមិនដែលប្រកួតចាញ់ម្តងឡើយ ហើយមិនតែប៉ុណ្ណោះមានសេចក្តីរាយការណ៍ថា ទូកងនេះត្រូវបានហាមអ្នកសប្បុរសជនមួយចំនួនយកអំណោយទៅឲ្យ ប៉ុន្តែមិនអាចមានប្រភពផ្លូវការពីគណៈកម្មាការបុណ្យអុំទូកថា បណ្តាលមកពីបញ្ហាអ្វីនោះទេ។
ទោះជាយ៉ាងណា VOD មិនទាន់អាចសុំការបំភ្លឺពីគណៈកម្មាការគ្រប់គ្រងទូកងបាននៅឡើយទេ ពីមូលហេតុដែលរារាំងការផ្តល់អំណោយទូកក្តាមប្រៃនេះ។ តាមព័ត៌មានឲ្យដឹងថា ទូកងក្តាមប្រៃនេះដែលជារបស់សហគមន៍ដីធ្លីខេត្តកំពង់ឆ្នាំង។
សូមជម្រាបថា ទូកងដែលចូលមកប្រកួតនៅថ្ងៃនេះមាន២៤៨ទូក ហើយក្នុងនោះទូកដែលមានឈ្មោះថាសែនជ័យ ឬក៏តេជោសែន មានរហូតដល់ទៅ១៤៤ទូក ស្មើ៥៨ភាគរយ។ ប្រសិនបើទូកក្តាមប្រៃឈ្នះនៅជុំផ្តាច់ព្រ័ត្រនៅល្ងាចនេះ មានន័យថាទូកដែលមិនមានឈ្មោះទទួលអំណោយពីអ្នកមានប្រាក់ស្តុកស្តម្ភ និងអ្នកមានអំណាចគឺជាលើកដំបូង បានឈ្នះដោយកម្លាំងចិត្តយ៉ាងខ្លាំង៕
ប្រភពពី vodhotnews.com
