ពលករនៅកូរ៉េប្រតិកម្មចំពោះមន្ត្រីទូតខ្មែរដែលចង់ចាប់បញ្ជូនអ្នកគាំទ្របក្សប្រឆាំង
ពលករខ្មែរនៅប្រទេសកូរ៉េខាងត្បូងមួយចំនួន បានបញ្ចេញប្រតិកម្មចំពោះឯកអគ្គរាជទូតខ្មែរប្រចាំនៅប្រទេសកូរ៉េខាងត្បូង ដែលចង់ចាប់ខ្លួនអ្នកដែលគាំទ្រគណបក្សប្រឆាំងបញ្ជូនមកស្រុកខ្មែរវិញនោះ។
ការបញ្ចេញប្រតិតកម្មនេះ នៅបន្ទាប់ពីពួកគេបានឃើញឯកអគ្គរាជទូតខ្មែរបានសរសេរនៅក្នុងគណនីហ្វេសប៊ុកផ្ទាល់ខ្លួនលោកថា ប៉ូលិសកូរ៉េខាងត្បូងបានបញ្ជូនអ្នកដែលប្រឆាំងរដ្ឋាភិបាលកម្ពុជា មកលោករួចហើយ។
ប្រធានចលនាយុវជននៅទីក្រុងអាន់សាន់ (Ansan) ប្រទេសកូរ៉េខាងត្បូង (South Korea) លើកឡើងថា ឯកអគ្គរាជទូតខ្មែរប្រចាំនៅប្រទេសកូរ៉េ កំពុងតែគំរាមកំហែងដល់ពលករខ្មែរដែលគាំទ្រគណបក្សប្រឆាំង។
លោក យឹម ស៊ីណន ជាប្រធានចលនាយុវជនឲ្យដឹងតាមទូរស័ព្ទពីទីក្រុងអាន់សាន់ថា ឯកអគ្គរាជទូតខ្មែរប្រចាំនៅប្រទេសកូរ៉េខាងត្បូង លោក សុត ឌីណា បានសរសេរនៅក្នុងបណ្ដាញសង្គមហ្វេសប៊ុក (Facebook) ក្នុងគណនីរបស់លោកថា ប៉ូលិសកូរ៉េខាងត្បូង គេបានបញ្ជូនឈ្មោះពលករ និងអ្នកប្រឆាំងមកឲ្យលោកអស់ហើយ។
លោក យឹម ស៊ីណន បញ្ជាក់ថា ការសរសេររបស់លោក ស៊ុត ឌីណា នេះ ជាការគំរាមកំហែងពលករខ្មែរដែលគាំទ្រគណបក្សសង្គ្រោះជាតិ ប្រឆាំងនឹងការដឹកនាំខុសឆ្គងមួយចំនួនរបស់រដ្ឋាភិបាលបច្ចុប្បន្ន៖ «សំឡេង»។
លោក ស៊ុត ឌីណា បានសរសេរនៅក្នុងគណនីហ្វេសប៊ុករបស់លោកនោះ មានខ្លឹមសារថា “ប៉ូលិសកូរ៉េខាងត្បូង គេបានផ្ដល់ឈ្មោះប្អូនៗពលករនិងអ្នកប្រឆាំងមកអស់ហើយ។ តើឲ្យគេចាត់ការដែរឬទេ? ពីព្រោះអ្នកទាំងអស់គ្នាមិនមែនជនភៀសខ្លួននយោបាយទេ។ ហើយកុំភ្លេចថា កូរ៉េខាងត្បូងគាំទ្រសម្ដេចតេជោខ្លាំងណាស់។ សូមប្អូនកុំមើលរំលងការនេះឲ្យសោះ។ គិតអនាគតខ្លួនឯងនិងគ្រួសារឲ្យបានវែងឆ្ងាយបន្តិចទៅ”។
នៅក្នុងបណ្ដេញសង្គមហ្វេសប៊ុក មានអ្នកបញ្ចេញមតិឆ្លងឆ្លើយជាច្រើនប្រតិកម្មចំពោះលោក ស៊ុត ឌីណា ដែលបានសរសេរអំពីប៉ូលិសកូរ៉េខាងត្បូង ចង់ចាប់ខ្លួននេះ។ អ្នកខ្លះបញ្ចេញមតិឆ្លើយតបថា សុំឲ្យលោក ស៊ុត ឌីណា បំពេញតួនាទីជាឯកអគ្គរាជទូតឲ្យបានពេញលេញទៅប្រសើរណាស់ទៅហើយ កុំគំរាមកំហែងនិស្សិត ពលករខ្មែរដែលកំពុងធ្វើការនៅប្រទេសកូរ៉េនោះ ប្រយ័ត្នពួកគេនាំគ្នាធ្វើបាតុកម្មសុំឲ្យដកលោកជាដើម។
វិទ្យុអាស៊ីសេរីមិនអាចទាក់ទងឯកអគ្គរាជទូតខ្មែរប្រចាំនៅប្រទេសកូរ៉េខាងត្បូង លោក ស៊ុត ឌីណា បាននៅឡើយទេ នៅថ្ងៃទី៦ វិច្ឆិកា។
មន្ត្រីនាំពាក្យក្រសួងការបរទេសនិងសហប្រតិបត្តិការអន្តរជាតិ លោក កុយ គួង មានប្រសាសន៍ថា លោកមិនបានដឹងអំពីបញ្ហានេះនៅឡើយទេ។
ប្រធានចលនាយុវជន លោក យឹម ស៊ីណន បញ្ជាក់ថា មូលហេតុដែលលោក ស៊ុត ឌីណា សរសេរគំរាមបែបនេះ មកពីលោក ស៊ុត ឌីណា ដឹងថា ពលករខ្មែរនឹងធ្វើបាតុកម្ម ឬដាក់ញត្តិនៅពេលលោកនាយករដ្ឋមន្ត្រី ហ៊ុន សែន ទៅទស្សនកិច្ចផ្លូវរដ្ឋនៅខែធ្នូ ខាងមុខ ដូច្នេះ លោក ស៊ុត ឌីណា សរសេរគំរាមជាមុន។
លោក យឹម ស៊ីណន បញ្ជាក់ទៀតថា ចលនាយុវជនរបស់លោកមានគម្រោងសុំជួបលោកនាយករដ្ឋមន្ត្រី ហ៊ុន សែន ឬដាក់ញត្តិទាមទារឲ្យលោកនាយករដ្ឋមន្ត្រីដោះស្រាយបញ្ហាមួយចំនួនដែលកំពុងកើតមាននៅក្នុងសង្គមកម្ពុជា ដូចជាបញ្ហារំលោភសិទ្ធិមនុស្ស បញ្ហាជម្លោះដីធ្លី និងបញ្ហាផ្សេងៗទៀត៕
ប្រភពពី វិទ្យុអាស៊ីសេរី
