តុលាការសម្រេចឃុំខ្លួនប្រធាននាយកដ្ឋានព័ត៌មានបក្សប្រឆាំង
គណបក្សសង្គ្រោះជាតិ ចាត់ទុកថា ការចាប់ខ្លួន លោក មាជ សុវណ្ណារ៉ា សមាជិកជាន់ខ្ពស់គណបក្សសង្គ្រោះជាតិ គឺជាការប៉ុនប៉ងរបស់គណបក្សកាន់អំណាច ដើម្បីដាក់គំនាបលើគណបក្សប្រឆាំងក្នុងការកែទម្រង់ច្បាប់ ស្ដីពីការរៀបចំ និងប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោត។
ប្រតិកម្មនេះ កើតឡើងបន្ទាប់ពីប្រធាននាយកដ្ឋានព័ត៌មានរបស់បក្សប្រឆាំង លោក មាជ សុវណ្ណារ៉ា ត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្ននៅគុកព្រៃស នៅល្ងាចថ្ងៃទី១១ ខែវិច្ឆិកា។
មន្ត្រីជាន់ខ្ពស់គណបក្សសង្គ្រោះជាតិ ស្នើឲ្យរាជរដ្ឋាភិបាលដោះលែងប្រធាននាយកដ្ឋានព័ត៌មានគណបក្សនេះជាបន្ទាន់ដោយឥតលក្ខខណ្ឌ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ហៅការចាប់ខ្លួន លោក មាជ សុវណ្ណារ៉ា ថាជាគំនាបនយោបាយ។ លោកបន្តថា គណបក្សប្រជាជនកម្ពុជា ចាំបាច់ត្រូវអនុវត្តតាមកិច្ចព្រមព្រៀងកាលពីថ្ងៃទី២២ ខែកក្កដា ដោយមិនត្រូវប៉ុនប៉ងគាបសង្កត់បែបនេះឡើយ។ លោកបញ្ជាក់ថា មេដឹកនាំគណបក្សសង្គ្រោះជាតិ នឹងជួបសន្ទនាជាមួយមន្ត្រីជាន់ខ្ពស់គណបក្សប្រជាជនកម្ពុជា ដើម្បីទាមទារឲ្យដោះលែងសកម្មជនគណបក្សសង្គ្រោះជាតិ ទាំងអស់៖ «ជួយទៅតាមផ្លូវច្បាប់ យើងរកមេធាវីយើងជួយតាមនីតិវិធី។ ហើយថ្នាក់ដឹកនាំជាន់ខ្ពស់គណបក្សសង្គ្រោះជាតិ នឹងទំនាក់ទំនងទៅកាន់មន្ត្រីគណបក្សប្រជាជនកម្ពុជា ដើម្បីដោះស្រាយរឿងនេះឲ្យដូចករណីមុនៗ»។
លោក មាជ សុវណ្ណារ៉ា ត្រូវបាននគរបាលចាប់ខ្លួនកាលពីវេលាម៉ោង ១១ថ្ងៃត្រង់ ក្នុងពេលដែលលោកជិះឡានទៅធ្វើការនៅម្តុំពេទ្យអង្គឌួង។ ការចាប់ខ្លួននេះ ធ្វើឡើងតាមដីការបស់ចៅក្រមស៊ើបសួរសាលាដំបូងរាជធានីភ្នំពេញ ក្នុងសំណុំរឿងហិង្សានៅទីលានប្រជាធិបតេយ្យ កាលពីថ្ងៃទី១៥ ខែកក្កដា និងស្របពេលដែលគណបក្សទាំងពីរកំពុងខ្វែងគំនិតគ្នា ក្នុងការរៀបចំសេចក្តីព្រាងច្បាប់ស្ដីពីការរៀបចំ និងប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោត។
មន្ត្រីសិទ្ធិមនុស្សឲ្យដឹងថា ចៅក្រមស៊ើបសួរ លោក កែវ មុន្នី បានសម្រេចចោទប្រកាន់ លោក មាជ សុវណ្ណារ៉ា តាមមាត្រា២៨ និង ២១៨ ។ មាត្រា៤៩៥ និងមាត្រា៤៥៩ នៃក្រមព្រហ្មទណ្ឌ ដោយចោទពីបទផ្ដើមគំនិតហិង្សាដោយចេតនាដោយមានស្ថានទម្ងន់ទោស ញុះញង់ឲ្យប្រព្រឹត្តបទឧក្រិដ្ឋ និងដឹកនាំចលនាកុបកម្ម។ បើសិនជាតុលាការរកឃើញថា លោកពិតជាមានទោសមែន លោក មាជ សុវណ្ណារ៉ា នឹងអាចជាប់ពន្ធនាគាររហូតដល់ ៣០ឆ្នាំ។
មន្ត្រីអង្កេតជាន់ខ្ពស់អង្គការការពារសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា ករណីចាប់ខ្លួនមន្ត្រីជាន់ខ្ពស់បក្សប្រឆាំងនេះ បង្ហាញពីភាពលម្អៀងនៃការអនុវត្តច្បាប់របស់អាជ្ញាធររាជរដ្ឋាភិបាល៖ «នៅទីលានប្រជាធិបតេយ្យ ពេលដែលសន្តិសុខវាយអ្នកផងមិនដែលតុលាការណាចោទប្រកាន់ទេ តែពេលប៉ះទង្គិចគ្នាគេចាប់ទាំងអស់តែម្តង»។
លោក មាជ សុវណ្ណារ៉ា មានសញ្ជាតិពីរ គឺខ្មែរ និងអាមេរិកាំង។
ចំណែកឯអ្នកនាំពាក្យស្ថានទូតអាមេរិក វិញ បញ្ជាក់ថា លោកមិនទាន់អាចធ្វើអត្ថាធិប្បាយបានទេនៅថ្ងៃនេះ។
លោក មាជ សុវណ្ណារ៉ា ជាមន្ត្រីជាន់ខ្ពស់គណបក្សសង្គ្រោះជាតិ ម្នាក់ក្នុងចំណោមមនុស្សជាច្រើននាក់ទៀត ដែលដឹកនាំបាតុកម្មទៅរំដោះទីលានប្រជាធិបតេយ្យកាលពីថ្ងៃទី១៥ ខែកក្កដា។ ក្រុមបាតុករគាំទ្រគណបក្សសង្គ្រោះជាតិ បានប៉ះទង្គិចគ្នាជាមួយសន្តិសុខសាលារាជធានីភ្នំពេញ ខណៈដែលមន្ត្រីគណបក្សសង្គ្រោះជាតិ ឈរស្រែកតាមមេក្រូឲ្យបញ្ចប់ហិង្សា។ ហិង្សាកាលណោះ បណ្ដាលឲ្យសន្តិសុខរបស់សាលារាជធានីភ្នំពេញជាង ៤០នាក់រងរបួសធ្ងន់ និងស្រាល។ សមត្ថកិច្ចបានចាប់ខ្លួនអ្នកតំណាងរាស្ត្រគណបក្សសង្គ្រោះជាតិ ៧នាក់ និងមន្ត្រីកិច្ចការសាធារណៈម្នាក់យកទៅដាក់គុក។ អ្នកទាំងប្រាំបីនាក់ ត្រូវបានដោះលែងដំណាលគ្នានឹងកិច្ចព្រមព្រៀងនយោបាយកាលពីថ្ងៃទី២២ ខែកក្កដា។
អ្នកជំនាញវិទ្យាសាស្ត្រនយោបាយ លោកបណ្ឌិត សុខ ទូច បញ្ជាក់ថា ការបន្តចាប់ខ្លួនមន្ត្រីបក្សប្រឆាំង ជាយុទ្ធសាស្ត្រយកប្រៀបលើគូប្រជែងរបស់បក្សកាន់អំណាច។ ហើយរឿងនេះ អាចមានវិធីដោះស្រាយតែមួយគត់ គឺការចរចាផ្នែកនយោបាយ ព្រោះច្បាប់មិនមានឥទ្ធិពលឡើយក្នុងករណីនេះ។
មន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន សុំមិនធ្វើអត្ថាធិប្បាយតបនឹងការចោទប្រកាន់របស់បក្សប្រឆាំងឡើយ នៅល្ងាចថ្ងៃទី១១ ខែវិច្ឆិកា ឆ្នាំ២០១៤៕
ប្រភពពី វិទ្យុអាស៊ីសេរី
