តាមស្រឡាញ់កូនក្រមុំមិនបាន ទាញកាំភ្លើងបាញ់រះ របួសឪពុកម្តាយទាំងព្រឹក
ខេត្តមណ្ឌលគិរី ៖ ប្ដីប្រពន្ធ ២នាក់ រស់នៅស្រុកអូររាំង ខេត្តមណ្ឌលគិរី កាលពីព្រឹកថ្ងៃទី១៥ ខែវិច្ឆិកា ឆ្នាំ២០១៤ ត្រូវជនសង្ស័យបាញ់ប្រហារ បណ្ដាលឲ្យរងរបួស យ៉ាងធ្ងន់ធ្ងរ នៅចំណុចភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរីហើយបច្ចុប្បន្ន ជនរងគ្រោះ ត្រូវក្រុមគ្រួសារញាតិមិត្ត និងសមត្ថកិច្ចប៉ូលិស ស្រុកអូរាំង នាំយកមកសម្រាកព្យាបាល នៅមន្ទីរពេទ្យបង្អែកខេត្ត។
ករណីនេះ បើតាមការសន្និដ្ឋានបឋម គឺជាការប៉ុនប៉ងមនុស្សឃាត ផ្ដើមឡើងដោយជនសង្ស័យ ជាជនបង្កលួចស្រឡាញ់ កូនស្រីរបស់ជនរងគ្រោះ និងមានការប្រចណ្ឌច្រើន ទើបកើតរឿងបែបនេះតែម្ដង។ មុនពេលកើតហេតុ នៅផ្ទះជនរងគ្រោះ ទាំង ២នាក់ ប្ដីប្រពន្ធ មានកូនក្រមុំ ទំនងជាជនសង្ស័យ ដែលជាជនបង្កបានលួចស្រឡាញ់ ហើយនៅពេល ដែលមានភ្ញៀវ ចូលផឹកស៊ីច្រើនពេក ជនសង្ស័យ ក៏មានការប្រចណ្ឌ។ នៅម៉ោងប្រមាណជា ១១យប់ ជនសង្ស័យ បានទៅស្រែកហៅ ឲ្យបើកទ្វារ តែអ្នកផ្ទះមិនព្រមបើកទ្វារឲ្យ ទើបជនសង្ស័យ បាញ់រះតែម្តង។
ជនរងគ្រោះ ដែលត្រូវគ្រាប់កាំភ្លើង រួមមានទី១. ប្តីមានឈ្មោះ អ៊ិត ថុល អាយុ ៥៤ឆ្នាំ ត្រូវភ្លៅខាងស្តាំ និងប្រពន្ធឈ្មោះ ជា គា អាយុ ៥២ឆ្នាំ អ្នកទាំង ២ រស់នៅភូមិកើតហេតុខាងលើ កំពុងនាំយកមកសង្គ្រោះ នៅមន្ទីរពេទ្យបង្អែក ខេត្តមណ្ឌលគិរី។ ជនសង្ស័យត្រូវបានគេស្គាល់ឈ្មោះ ចឹ សុខ ភេទប្រុស អាយុ ៣៣ឆ្នាំជនជាតិព្នង រស់នៅភូមិកើតហេតុ ជាមួយគ្នា បានបាញ់រះចំនួន ៩គ្រាប់ ហើយជនល្មើស ប្រើប្រាស់កាំភ្លើងម៉ាក A K ៕
_________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
