រថយន្ដកុងតឺន័រផែស្ងួតតិចស្រ៊ុនបុកលោកតាជិះកង់ស្លាប់
ខេត្ដស្វាយរៀង ៖ រថយន្ដកុងតឺន័រមួយគ្រឿងបើកបរក្នុងទិសដៅស្របនឹងលោក តាជិះកង់ដែរ ហើយរថយន្ដក៏បុកពីក្រោយ បណ្ដាលឱ្យស្លាប់ភ្លាមៗកាលពីម៉ោង៩និង៤០នាទីព្រឹក ថ្ងៃទី២២ ខែវិច្ឆិកា ឆ្នាំ២០១៤ នៅលើផ្លូវជាតិលេខ១ ក្នុងភូមិព្រែកទប់ឃុំស្វាយជ្រំ ស្រុកស្វាយជ្រំ។
មន្ដ្រីនគរបាលស្រុកស្វាយជ្រំបានឱ្យ ដឹងថា លោកតាដែលជិះកង់ត្រូវរថយន្ដ បុកឈ្មោះម៉ៅ ហ៊ា ជន្មាយុ៩៦ឆ្នាំ រស់នៅភូមិត្របែកប្រហោង ឃុំតាសួស ស្រុកស្វាយជ្រំ ហើយរថយន្ដបានបើក បុកពីក្រោយបណ្ដាលឱ្យគាត់ស្លាប់នៅទី កើតហេតុ។ ចំណែកអ្នកបើកបររថយន្ដ មិនស្គាល់អត្ដសញ្ញាណនោះទេ អាស្រ័យ ដោយក្រោយកើតហេតុ ជននោះបាន បើកទ្វាររថយន្ដគេចខ្លួនផងដែរ។
ប្រភពព័ត៌មានពីសាក្សបាននិយាយថា នៅមុនពេលកើតហេតុលោកតាជិះ កង់តាមផ្លូវជាតិលេខ១តែម្នាក់ឯងដើម្បី ត្រឡប់ទៅផ្ទះសម្បែរវិញ គឺជាត់ជិះពី ទិសខាងកើតមកលិចស្របពេលនោះ ស្រាប់តែមានរថយន្ដកុងតឺន័រមួយគ្រឿង ពាក់ស្លាកលេខភ្នំពេញ ៣A-១៦៦៩ ជារថយន្ដរបស់ក្រុមហ៊ុនផែស្ងួតតិចស្រ៊ុន បើកបរស្របទិសដៅភ្លាមនោះក៏បុក លោកតាពីក្រោយបណ្ដាលឱ្យស្លាប់តែម្ដង ។ បន្ទាប់ពីកើតហេតុភ្លាម អ្នកបើករថយន្ដបានបង្អង់ល្បឿនឈប់ចតរួចគេចខ្លួនបាត់។
អ្នកស្រុកដែលបានឃើញហេតុការណ៍ ក៏ទាក់ទងទៅសមត្ថកិច្ចមូលដ្ឋានដើម្បីឱ្យជួយអន្ដរាគមន៍និងប្រាប់ដល់ក្រុម គ្រួសារសពឱ្យមកទទួលយកទៅធ្វើបុណ្យ តាមលំអានទំនៀមទម្លាប់ខ្មែរ ៕
- ____________
- ប្រភពពីនគរវត្ត
