ពលរដ្ឋនៅកំពង់ឆ្នាំងប្រមូលផ្ដុំគ្នានៅសាលាឃុំសុំឲ្យអាជ្ញាធរបំភ្លឺរឿងលក់ដីព្រៃសហគមន៍
ពលរដ្ឋប្រមាណ ៣០០នាក់ នៅឃុំខ្នារឆ្មារ ស្រុកសាមគ្គីមានជ័យ ខេត្តកំពង់ឆ្នាំង ប្រមូលផ្ដុំគ្នាក្នុងបរិវេណសាលាឃុំខ្នារឆ្មារ នៅថ្ងៃទី៤ ខែវិច្ឆិកា ដើម្បីឲ្យអាជ្ញាធរបំភ្លឺរឿងលក់ដីព្រៃសហគមន៍ និងគម្រោងវាស់វែងដីរបស់ក្រុមហ៊ុនឯកជន។
ក្រុមពលរដ្ឋ បានរំសាយការជួបជុំទៅវិញ បន្ទាប់ពីអភិបាលស្រុកសាមគ្គីមានជ័យ មកជួបពិភាក្សាជាង ២ម៉ោង នៅល្ងាចថ្ងៃដដែល ប៉ុន្តែពលរដ្ឋបង្ហើបថា លទ្ធផលនៃការបំភ្លឺរបស់អាជ្ញាធរ និងភូមិបាលស្រុក ហាក់មិនទាន់ច្បាស់នៅឡើយ។
ប្រតិកម្មរបស់ក្រុមអ្នកភូមិ គឺបន្ទាប់ពីដឹងថា អាជ្ញាធរមូលដ្ឋានគ្រោងដាក់ដីព្រៃទំហំជាង ៧០ហិកតារ និងដីផ្នែកខ្លះនៅក្បែរនោះ ចូលទៅក្នុងប្លង់ដីរបស់ក្រុមហ៊ុនចិន ឈ្មោះ ហ្សុងជានជីន បៀនជីងតេឈូ (Zhong Jian Jin Bian Jing Te Qu)។ ក្រុមពលរដ្ឋបញ្ជាក់ថា បើការវាស់វែងដំណើរការមែននោះ ដីព្រៃសហគមន៍ និងដីស្រែចម្ការកំពុងបង្កបង្កើនផលរបស់ពលរដ្ឋជាច្រើនគ្រួសារ នៅភូមិអណ្ដូងត្រមូង នៃឃុំឈូកស ស្រុកកំពង់ត្រឡាច និងភូមិត្រដក់ពង នៃឃុំខ្នារឆ្មារ ស្រុកសាមគ្គីមានជ័យ នឹងត្រូវប៉ះពាល់។
តំណាងពលរដ្ឋម្នាក់ លោក គង់ សុគុណ មានប្រសាសន៍ថា ក្រុមឈ្មួញបានផ្ដល់ប្រាក់ចំនួន ២០០ដុល្លារក្នុងមួយគ្រួសារ ដល់ពលរដ្ឋភូមិត្រដក់ពង នៃឃុំខ្នារឆ្មារ ជាង ៣០០គ្រួសារ កាលពីដើមឆ្នាំ២០១៤ ជាថ្នូរនឹងការលក់ដីព្រៃសហគមន៍ ឬដីព្រៃគីឡូដែលពលរដ្ឋចំនួន ៧ភូមិ ក្នុងឃុំធ្លាប់អាស្រ័យផល។ ចំណែកដីនៅក្បែរនោះ ត្រូវក្រុមឈ្មួញដើរទិញចោះៗ ប៉ុន្តែគ្រោងវាស់វែងទាំងដីដែលពលរដ្ឋមិនទាន់បានលក់ទៅឲ្យក្រុមហ៊ុន៖ «បាទ! គោលបំណងរបស់ពលរដ្ឋទី១ គាត់សួរបញ្ជាក់ឲ្យដឹងពីព្រំប្រទល់ដីច្បាស់លាស់ ពាក់ព័ន្ធនឹងដីព្រៃគីឡូ (ដីព្រៃសហគមន៍) និងដីប្រជាពលរដ្ឋនៅជុំវិញព្រៃគីឡូហ្នឹងផង។ សកម្មភាពប្រាំងមិញមុនយើងស្ទូង ការបាញ់ថ្នាំក្រហមវាហួសដីព្រៃគីឡូហ្នឹងទៀត ដែលផ្អើលហ្នឹង»។
ឆ្លើយតបបញ្ហានេះ អភិបាលស្រុកសាមគ្គីមានជ័យ លោក វន ស៊ីផា ថ្លែងបញ្ជាក់ថា ដីព្រៃគីឡូ គឺមិនស្ថិតនៅក្នុងគម្រោងវាស់វែងរបស់ក្រុមហ៊ុននោះទេ ប៉ុន្តែនឹងត្រូវវាស់វែងទៅលើដីដែលពលរដ្ឋបានលក់នៅក្បែរនោះ។ លោកថា ផ្ទៃដីរបស់ក្រុមហ៊ុនមានទំហំធំធេងមិនទាន់កំណត់ច្បាស់លាស់ តែការវាស់វែងរបស់ក្រុមហ៊ុននាថ្ងៃខាងមុខ នឹងពុំមានបញ្ហាអ្វីធ្ងន់ធ្ងរនោះទេ ដោយពលរដ្ឋគ្រាន់តែមិនផ្ដិតមេដៃទទួលស្គាល់ព្រំដី ប្រសិនបើមានដីប៉ះពាល់ ឬមិនទាន់លក់ ហើយលោកនឹងសម្របសម្រួលដោះស្រាយបញ្ហានេះដោយសន្តិវិធី៖ «ដីធំដីច្រើន (ច្រើនកន្លែង) យើងអត់ទាន់ដឹងកំណត់ទំហំប៉ុន្មានទេ ព្រោះគេសុំវាស់ អ៊ីចឹងទាល់តែចុះទៅពិនិត្យសិនបានដឹងទំហំច្បាស់លាស់។ បើប៉ះដីគាត់ គាត់កុំព្រម ហើយខ្ញុំនិយាយប្រាប់ ខ្ញុំអ៊ីចឹងថាខ្ញុំនៅខាងប្រជាពលរដ្ឋ ដូចជាថាបំពានប្រាប់ខ្ញុំទៅខ្ញុំអាចដោះស្រាយតាមផ្លូវច្បាប់ ឲ្យខ្ញុំទៅហែបាតុកម្មតវ៉ាខ្ញុំមិនចូលរួមទេ ប៉ុន្តែចរចា ខ្ញុំនឹងចរចា»។
នៅក្នុងសេចក្ដីជូនដំណឹងរបស់អភិបាលស្រុកសាមគ្គីមានជ័យ លោក វន ស៊ីផា ចុះថ្ងៃទី២៧ ខែតុលា ឆ្នាំ២០១៤ បញ្ជាក់ថា ក្រុមមន្ត្រីជំនាញនឹងចុះកំណត់ព្រំ វាស់វែង និងបំពេញទម្រង់បែបបទនៃការប្រមូលទិន្នន័យក្បាលដី តាមការស្នើសុំរបស់ក្រុមហ៊ុន ដែលមានព្រំប្រទល់ខាងជើងទល់នឹងផ្លូវរទេះ ខាងត្បូងទល់នឹងអូរ ខាងកើតទល់អូរ និងខាងលិចទល់នឹងផ្លូវលំ ចាប់ពីថ្ងៃទី២៨ ខែតុលា រហូតដល់ថ្ងៃទី១១ ខែវិច្ឆិកា ឆ្នាំ២០១៤។ សេចក្ដីជូនដំណឹងបន្តថា សាមីអ្នកស្នើសុំចុះបញ្ជីដី អ្នកមានដីជាប់ព្រំ និងជនដែលមានការពាក់ព័ន្ធក្បាលដីស្នើសុំចុះបញ្ជីនេះ ត្រូវបង្ហាញខ្លួននៅទីតាំងដីនៅថ្ងៃទី១១ ខែវិច្ឆិកា ឆ្នាំ២០១៤ វេលាម៉ោង ១០ព្រឹក ដើម្បីបំពេញបែបបទ ឬជំទាស់តវ៉ាតាមគោលការណ៍ និងនីតិវិធីនៃការចុះបញ្ជីដីធ្លីជាធរមាន៕
ប្រភពពី វិទ្យុអាស៊ីសេរី
