បណ្តាញចលនាសង្គមរកចំណុចខ្សោយបក្សឈ្នះឆ្នោតទាំងពីរដើម្បីជំរុញឲ្យធ្វើការតាមប្រជាធិបតេយ្យ
បណ្តុំអង្គការសង្គមស៊ីវិល ឬហៅថា “បណ្តាញចលនាសង្គម” នៅរសៀលថ្ងៃអាទិត្យនេះ បានពិភាក្សាជាមួយបណ្តាញនានា ដើម្បីរកចំណុចខ្វះខាតដែលគណបក្សឈ្នះឆ្នោតទាំងពីរមិនបានអនុវត្តស្របតាមគោលការប្រជាធិបតេយ្យ។
សាស្ត្រាចារ្យ និងជាអ្នកស្រាវជ្រាវពីការអភិវឌ្ឍសង្គម លោក មាស នី ឲ្យVODដឹងថា ការជួបពិភាក្សានោះ គឺសិក្សាពីចំណុចខ្វះខាតមួយចំនួនរបស់គណបក្សប្រជាជនកម្ពុជា និងគណបក្សសង្គ្រោះជាតិ រួចយកចំណុចខ្វះខាតទាំងនោះ ធ្វើជាសំណើដាក់សម្ពាធទៅបក្សទាំងនោះ ដើម្បីជំរុញឲ្យពួកគេធ្វើការងារស្របតាមគោលការណ៍លទ្ធិប្រជាធិបតេយ្យ ដោយពុំមានគ្រួសារនិយម និងបក្សពួកនិយមជាដើម។ លោកបន្តថា ការជួបពិភាក្សានោះ នឹងបើកឲ្យមានសមាជិកចូលរួមបន្ថែមចាប់ពី១០០ទៅ២០០នាក់ ដើម្បីចងក្រងបណ្តាញនេះឲ្យកាន់តែរឹងមាំ។
ទោះយ៉ាងណា លោក មាស នី មិនបានបញ្ជាក់ថ្ងៃដែល “បណ្តាញចលនាសង្គម” គ្រោងដាក់សំណើទៅគណបក្សទាំងពីរនោះទេ។ តែលោកថា រាល់សំណើដែលដាក់ទៅហើយ បើគណបក្សទាំងពីរមិនធ្វើតាមទេ នោះ “បណ្តាញចលនាសង្គម” នឹងពិចារណាបង្កើតគណបក្សថ្មីមួយ ដើម្បីប្រកួតប្រជែងជាមួយបក្សទាំងពីរនៅពេលខាងមុខ។
លោកមាស នី លើកឲ្យដឹងដែរថា បណ្តាញចលនាសង្គមយល់ថា ការដឹកនាំរបស់គណបក្សប្រជាជនកម្ពុជា និងគណបក្សសង្គ្រោះជាតិដែលមានអាសនៈក្នុងសភា មិនទាន់មានលក្ខណៈប្រជាធិបតេយ្យទេ។ លោកថា ការសម្រេចកិច្ចការប្រទេសជាតិទាំងអស់ ស្ថិតនៅលើមេបក្សជាអ្នកបញ្ជា សូម្បីតែតំណាងរាស្ត្រក្នុងសភា សម្រេច ឬ អនុម័តច្បាប់អ្វីមួយ តំណាងរាស្ត្រទាំងនោះ មិនបានបង្ហាញឆន្ទៈឯករាជ្យឡើយ ដោយគេតម្រូវឲ្យបោះឆ្នោតដោយលើកដៃ។
ដោយសារបញ្ហានេះ “បណ្តាញចលនាសង្គម” គ្រោងចុះបញ្ជីផ្លូវការនៅក្រសួងមហាផ្ទៃ នាដើមឆ្នាំ២០១៥នេះ នូវអ្វីដែលក្រុមនេះយល់ថា ជាចលនាដើម្បីដាក់សម្ពាធឲ្យអ្នកនយោបាយខ្មែរ ដើរតាមគន្លងប្រជាធិបតេយ្យ៕ ប្រភព ៖ VOD
