អាជ្ញាធរថៃបន្តបញ្ជូនពលករចំណាកស្រុក៣០នាក់បន្ថែមទៀតមកកម្ពុជាវិញ
អគ្គស្នងការដ្ឋាននគរបាលជាតិឲ្យដឹងនៅថ្ងៃអាទិត្យនេះថា អាជ្ញាធរថៃបានបញ្ជូនពលករខ្មែរចំណាកស្រុកចំនួន៣០នាក់ ចូលមកកម្ពុជាវិញ តាមច្រកព្រំដែនភ្នំដី ស្រុកសំពៅលូន ខេត្តបាត់តំបង។
កាលពីថ្ងៃទី៦វិច្ឆិកា ឆ្នាំ២០១៤ ពលករខ្មែរចំណាកស្រុក៤៧៧នាក់ត្រូវបានបញ្ជូនមកកម្ពុជាតាមច្រកប៉ោយប៉ែត។
របាយការណ៍របស់អគ្គស្នងការដ្ឋាននគរបាលជាតិ ចុះផ្សាយកាលពីថ្ងៃទី៨ វិច្ឆិកា ម្សិលមិញឲ្យដឹងថា កាលពីថ្ងៃទី៧ វិច្ឆិកា អាជ្ញាធរថៃបានបន្តចាប់ពលករខ្មែរចំណាកស្រុកខុសច្បាប់ចំនួន៣០នាក់បន្ថែមទៀត បញ្ជូនមកកម្ពុជាវិញ បន្ទាប់ពីពួកគេបានលួចឆ្លងដែនខុសច្បាប់ទៅធ្វើការនៅប្រទេសថៃ។
កាលពីខែមិថុនា ឆ្នាំ២០១៤ អាជ្ញាធរថៃធ្លាប់ចាប់ពលករខ្មែរខុសច្បាប់ និងស្របច្បាប់ប្រមាណ២៥ម៉ឺននាក់ ដឹកតាមរថយន្តទ្រុងមកទម្លាក់ចោលនៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ឧត្តរមានជ័យ បាត់ដំបង និងខេត្តប៉ៃលិន។ ចំណាត់ការនេះ អាជ្ញាធរយោធាថៃធ្វើឡើងក្រោមហេតុផលពង្រឹងការអនុវត្តច្បាប់ ក្នុងប្រទេស និងចៀសវាងការជួញដូរមនុស្ស។
បន្ទាប់ពីអាជ្ញាធរថៃចាប់បញ្ជូនពលករខ្មែរមកកម្ពុជានោះដែរ រាជរដ្ឋាភិបាលកម្ពុជា ក៏ចេញអនុក្រឹត្យមួយកំណត់ឲ្យភាគីពាក់ព័ន្ធ យកថ្លៃធ្វើលិខិតឆ្លងដែនធម្មតាពីពលករ ក្នុង១នាក់ ចំនួន៤៩ដុល្លារ ក្នុងនោះរួមមាន បង់ថ្លៃសេវាថតរូបចំនួន៤ដុល្លារ ធ្វើប័ណ្ណការងាររបស់ក្រសួងការងារនិងបណ្តុះបណ្តាលវិជ្ជាជីវៈចំនួន ១០ដុល្លារ ធ្វើទិដ្ឋាការការងារនៅស្ថានទូតថៃ ចំនួន២០ដុល្លារ ហើយថ្លៃសោហ៊ុយចំណាយធ្វើដំណើរពីភ្នំពេញ ទៅទល់ដែនថៃ ចំនួន១៥ដុល្លារ។ តែសង្គមស៊ីវិលរិះគន់ថា ចំណាត់ការនេះមិនទាន់មានប្រសិទ្ធភាព១០០%នៅឡើយ ដោយសារការផ្សព្វផ្សាយព័ត៌មានរបស់ស្ថាប័នរដ្ឋមិនបានបើកឲ្យទូលាយ ទើបធ្វើឲ្យពលករនៅតែបន្តធ្វើចំណាកស្រុកខុសច្បាប់បែបនេះ៕ ប្រភព ៖ VOD
