ខេម ទិញផ្ទះថ្មីតម្លៃជាង៧ម៉ឺនដុល្លារ គួបនឹងរថយន្តឡិចស៊ីស Mini RX
ភ្នំពេញ: ជាជោគជ័យថ្មីលើទំព័រជីវិតរបស់តារាចម្រៀងសម្បូររោមមុខសំឡេងស្អក ដែលទទួលបានការពេញនិយមក្នុងវិស័យសិល្បៈចម្រៀងយុវវ័យ លោក ខេម បានសម្រេចសមិទ្ធផលផ្ទះល្វែងមួយជុងថ្មីសន្លាងតម្លៃថ្លៃជាង៧ម៉ឺនដុល្លារ ជាការដើរចេញពីជីវិតវេទនាទាំងបាតដៃទទេ។
ខេម ក៏ទទួលស្គាល់ថា លោកទើបនឹងទិញផ្ទះល្វែងថ្មីមួយជុងតម្លៃជាង៧ម៉ឺនដុល្លារនៅក្នុងបុរីពិភពថ្មី។ មហាជននៅចាំបានថា មុនក្លាយជាតារាចម្រៀងល្បី និងរកបានទ្រនំជ្រក ផលិតកម្មថោន ខេម ដែលមានឈ្មោះពិត ប៊ុន សុណារិន ធ្លាប់ហែលឆ្លងជីវិតជាអ្នករត់ម៉ូតូឌុប និងរស់យ៉ាងលំបាកក្នុងជីវភាពគ្រួសារក្រីក្រនៅទឹកដីខេត្តកំពង់ឆ្នាំង តំបន់មាត់ទន្លេស្រុកកំពង់លែង និងធ្លាប់ទទួលការមាក់ងាយយ៉ាងច្រើនពីមិត្តភក្តិ។
ស្តែងពីជីវិតដ៏កម្សត់នេះ កម្មវិធីប៉ុស្តិ៍២១របស់ទូរទស្សន៍ស៊ីធីអិន បានទៅថតដល់ស្រុកកំណើត ខេម រស់នៅជាមួយម្តាយក្នុងខ្ទមកម្សត់រហែកធ្លុះធ្លាយ។ ប៉ុន្តែក្រោយឆ្លងកាត់ការតស៊ូក្នុងជីវិតដោយការឧស្សាហ៍ព្យាយាម និងអំណត់បំផុតមក ខេម បានលុបស្រមោលអតីតកាលបណ្ដើរៗ ហើយពេលនេះលោកបានក្លាយជាតារាចម្រៀងដ៏មានប្រជាប្រិយភាពម្នាក់ ដែលមានសំនៀងដិតជាប់ក្នុងបេះដូងយុវវ័យ។
ជាមួយនឹងការឡើងមុខមាត់ប្រកួតប្រជែង តារាចម្រៀងដែលទទួលការគាំទ្រពីយុវវ័យជាមួយបទថ្មី «ខ្លាចហើយលុយ» លោក ខេម បានបញ្ជាក់ថា៖ «ខ្ញុំពិតជាបានទិញផ្ទះនៅបុរីពិភពថ្មី ក្នុងតម្លៃជាង៧ម៉ឺនដុល្លារមែន ប្រាក់ទាំងនោះបានមកពីកម្លាំងញើសឈាមសុទ្ធសាធ»។
ជាងនេះទៅទៀតតារាចម្រៀងដែលទើបសម្ភាសធ្លាក់នៅស្ថានទូតអាមេរិក និងខកខានចេញច្រៀងនាយសមុទ្រទាំងប្រជាប្រិយភាពក្នុងស្រុកកំពុងលូតឡើងស្រឺតៗនោះបានឲ្យដឹងទៀតថា «ទន្ទឹមនឹងទិញបានផ្ទះល្វែងមួយនេះ ខ្ញុំក៏ទើបទិញឡានឡិចស៊ីស Mini RX ពណ៌ខ្មៅ»។
លោកបញ្ជាក់ថា៖ «ដើម្បីងាយស្រួលក្នុងការធ្វើដំណើរ ខណៈមុននោះចុះឡើងជិះតាក់ស៊ី»។
នៅឆ្នាំ២០១៤នេះ អាជីពចម្រៀងរបស់ ខេម ហាក់មានសន្ទុះហក់ឡើងយ៉ាងខ្លាំង ដែលពេលនេះ មានការបង្ហើបពីអ្នកជិតដិតរបស់លោកថា មួយខែ៣០ថ្ងៃ ខេម សឹងតែរកពេលទំនេរគ្មាន។
តបនឹងការលើកឡើងនេះ ខេម ទទួលស្គាល់ថា៖ «រាល់ថ្ងៃក្រៅពីការមមាញឹកថតបទថ្មីៗ ឲ្យផលិតកម្ម ក៏មមាញឹកណាស់ដែរក្នុងការចេញច្រៀងឲ្យបណ្តាក្រុមហ៊ុន ពិសេសចេញទៅច្រៀងលក់សំបុត្រតាមខេត្ត»។
លោកក៏បានបញ្ជាក់ថា៖ «បើកុំតែខ្ញុំខិតខំបែបនេះ នោះខ្ញុំ ប្រហែលនឹងមិនសន្សំលុយបានទិញផ្ទះទិញរថយន្តបាននោះទេ»។
បើទោះជាប្រជាប្រិយភាព ខេម កំពុងស្ទុះឡើងយ៉ាងដូច្នេះក្តី ប៉ុន្តែយ៉ាងណាតម្លៃខ្លួន តារារូបនេះ បើប្រៀបនឹងតារាចម្រៀងលោក ព្រាប សុវត្ថិ និង លោក ខេមរៈ សិរីមន្ត ហាក់នៅមានគម្លាតពីគ្នានៅឡើយ។ ទាក់ទិននឹងតម្លៃខ្លួន ខេម មិនទម្លាយចេញនោះទេ ដោយ លោក លើកឡើងថា រឿងនេះ វាជារឿងសម្ងាត់។
ប៉ុន្តែប្រភពពីអ្នកជិតដិត របស់តារាចម្រៀងសំឡេងស្អកបែបយុវវ័យរូបនេះ បង្ហើបថា៖ «ខេម ពេលនេះមួយយប់ តម្លៃខ្លួនអាចជា១ពាន់ដុល្លារឡើង ប៉ុន្តែតម្លៃនេះមិនទាន់គិតការចេញទៅច្រៀងឲ្យបណ្តាក្រុមហ៊ុនធំៗតាមខេត្តនោះទេ ប្រាក់តម្លៃខ្លួនអាចឡើងជាងនេះ»។
ប្រភពពីអ្នកជិតដិតដដែលក៏បាននិយាយទូទាត់ចំណូលប្រចាំឆ្នាំរបស់តារានេះត្រួសៗថា៖ «ចំណូល ខេមក្នុងមួយឆ្នាំរកបានចាប់ពី៤ម៉ឺនដុល្លារទៅ៦ម៉ឺនដុល្លារ»៕
ប្រភពពី ភ្នំពេញប៉ុស្តិ៍
