សេដ្ឋី និងទីប្រឹក្សានយោបាយកំពូលម្នាក់របស់ចិនត្រូវគេទាត់ចេញពីក្រុមជំនុំ
បណ្ដាសមាជិកនៃក្រុមជំនុំទីប្រឹក្សានយោបាយកំពូលៗនៅប្រទេសចិនបាន សម្រេចបោះឆ្នោតទម្លាក់លោកសេដ្ឋី James Tien ពីក្រុមប្រឹក្សានេះដោយសារតែការរិះគន់របស់លោកទៅលើលោក លឿង ជុនយីង នាយកប្រតិបត្ដិក្រុងហុងកុង។
កាលពីសប្ដាហ៍មុននេះ លោកសេដ្ឋី James Tien បានទទូចជាសាធារណៈឲ្យលោក លឿង ជុនយីង លាលែងពីតួនាទីដោយសារលោកមិនអាចបញ្ចប់បញ្ហាធ្វើបាតុកម្មរបស់មហាជនបាន។
សេដ្ឋី និងទីប្រឹក្សានយោបាយកំពូលម្នាក់របស់ចិនត្រូវគេទាត់ចេញពីក្រុមជំនុំ (Credit: Reuters)
លោក James Tien បានខុសចិត្ដទទួលយកការការបោះឆ្នោតទម្លាក់លោកនេះ ហើយថែមទាំងបាននិយាយថា លោកក៏នឹងលាលែងពីតួនាទីជាមេដឹកនាំគណបក្សសេរីនិយមរបស់លោកផងដែរ ដែលមាននិន្នាការគាំទ្ររដ្ឋាភិបាលក្រុងប៉េកាំង។
នៅដើមសប្ដាហ៍នេះ ពួកសកម្មជនទាមទារលទ្ធិប្រជាធិបតេយ្យនៅហុងកុងបានរំលឹកខួប១ខែនៃការចាប់ផ្ដើមយុទ្ធនាការបាតុកម្មរបស់ខ្លួន ដើម្បីជាការទាមទារ ហើយឆ្លើយតបទៅនឹងការសម្រេចចិត្ដរបស់រដ្ឋាភិបាលចិននៅក្រុងប៉េកាំង ដែលចង់តែងតាំងបេក្ខជនឈរឈ្មោះដោយផ្ទាល់សម្រាប់ឲ្យបណ្ដាជនបោះឆ្នោតឲ្យនៅឆ្នាំ២០១៧ខាងមុខ ជាជាងឲ្យម្ចាស់ឆ្នោតជ្រើសតាំងបេក្ខជនដោយខ្លួនឯង៕ ប្រភព ៖ Radioaustralia
