ក្រុមជនជាតិភាគតិច ស្នើនាយករដ្ឋមន្ត្រីលុបចោលអាជ្ញាប័ណ្ណក្រុមហ៊ុនវិនិយោគមួយ
តំណាងសហគមន៍ជនជាតិដើមភាគតិចព្នងចំនួន៥នាក់មកពីខេត្តមណ្ឌលគិរីក្រោមការសម្របសម្រួលរបស់សមាគមអាដហុកបានដាក់ពាក្យបណ្តឹងមួយទៅកាន់លោកនាយករដ្ឋមន្ត្រីហ៊ុន សែន នៅព្រឹកថ្ងៃព្រហស្បតិ៍នេះ ដើម្បីស្នើសុំលុបចោលអាជ្ញាធរប័ណ្ណរបស់ក្រុមហ៊ុនវិឡាឌីវីលុបមេន ខូអិលធីឌី។ ក្រោយដាក់បណ្តឹង តំណាងទាំងនេះ បានធ្វើសន្និសីទកាសែតមួយនៅទីស្នាក់ការអាដហុក រៀបរាប់ពីទុក្ខលំបាករបស់ខ្លួនពីផលប៉ះពាល់ដោយសារក្រុមហ៊ុននេះ។
ក្រុមតំណាងជនជាតិដើមភាគតិចធ្វើសន្និសីទកាសែតកាលពីព្រឹកថ្ងៃទី៣០ ខែតុលា ឆ្នាំ ២០១៤
RFI/ សហការី
ក្នុងពាក្យបណ្តឹងនោះ តំណាងសហគមន៍ជនជាតិដើមភាគតិចព្នង បានស្នើឲ្យលោកនាយករដ្ឋមន្ត្រីហ៊ុន សែន លុបចោលអាជ្ញាប័ណ្ណក្រុមហ៊ុនវិឡាឌីវីលុបមេន ខូអិលធីឌី ដែលពួកគេអះអាងថា កំពុងឈូសឆាយដីព្រៃដែលប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់ពួកគេ។
លោក ប្លឹក ម៉ាល់ តំណាងសហគមន៍ជនជាតិដើមភាគតិចព្នងបានថ្លែងក្នុងសន្និសីទកាសែតថា ការឈូសឆាយរបស់ក្រុមហ៊ុននេះ បានប៉ះពាល់ដល់ការរស់នៅរបស់ប្រជាពលរដ្ឋជនជាតិដើមភាគតិចចំនួនប្រមាណ២៧៣គ្រួសារ នៅក្នុងភូមិឡៅកា សង្កាត់សុខដុម ក្រុងសែនមនោរម្យ ខេត្តមណ្ឌលគិរី។ លោកបន្តថា ប្រជាពលរដ្ឋជនជាតិភាគតិចដូចពួកគាត់ គឺរស់ពឹងអាស្រ័យលើព្រៃឈើទាំងអស់នោះ ហើយប្រសិនបើក្រុមហ៊ុននេះ នៅតែបន្តឈូសឆាយទៀតនោះ ពួកគាត់មិនដឹងជារស់នៅពឹងផ្អែកលើអ្វីទៀតនោះទេ។
សូមជំរាបជូនថា តំណាងសហគមន៍ជនជាតិដើមភាគតិចទាំងនេះធ្លាប់បានដាក់ពាក្យបណ្តឹងព្រហ្មទណ្ឌជាច្រើនលើកហើយទៅកាន់តុលាការខេត្តមណ្ឌលគិរី ប៉ុន្តែមិនមានការដោះស្រាយជូននោះទេ។ ហើយថ្មីៗនេះ ក្រុមជនជាតិដើមភាគតិចក៏បានដាក់ពាក្យបណ្តឹងម្តងទៀតទៅកាន់តុលាការ តែបានបង្វែរពីបណ្តឹងព្រហ្មទណ្ឌមកជាបណ្តឹងរដ្ឋប្បវេណីវិញដោយស្នើឲ្យតុលាការពិចាណាលុបចោលអាជ្ញាប័ណ្ណរបស់ក្រុមហ៊ុនវិឡាឌីវីលុបមេន ខូអិលធីឌី ។
ជាមួយគ្នានេះ តំណាងជនជាតិដើមភាគតិចក៏បានពាក្យបណ្តឹងដាច់ដោយឡែកមួយទៀតទៅកាន់ប្រមុខរដ្ឋាភិបាលកម្ពុជា ដោយស្នើឲ្យលុបចោលអាជ្ញាប័ណ្ណក្រុមហ៊ុននេះផងដែរ។
សមាគមអាដហុក បានគាំទ្រការដាក់ពាក្យបណ្តឹងទៅកាន់ប្រមុខរដ្ឋាភិបាល ក៏ដូចជាទៅកាន់តុលាការស្នើឲ្យមានការលុបចោលអាជ្ញាប័ណ្ណក្រុមហ៊ុនវិនិយោគនេះ។ លោក ធន សារាយ ប្រធានសមាគមអាដហុកបានហៅការដាក់ពាក្យបណ្តឹងរបស់ក្រុមតំណាងជនជាតិដើមភាគតិចទាំងនេះថា ជាយន្តការថ្មីមួយដែលជួយពន្លឿននូវការចាត់ការរបស់តុលាការ។ លោកបន្ថែមថា អាដហុកនឹងផ្តល់មេធាវីដើម្បីជួយដល់ដំណើរការបណ្តឹងរបស់ប្រជាពលរដ្ឋជនជាតិភាគតិចនេះ។
សមាគមអាដហុក បានគាំទ្រការដាក់ពាក្យបណ្តឹងទៅកាន់ប្រមុខរដ្ឋាភិបាល ក៏ដូចជាទៅកាន់តុលាការស្នើឲ្យមានការលុបចោលអាជ្ញាប័ណ្ណក្រុមហ៊ុនវិនិយោគនេះ។ លោក ធន សារាយ ប្រធានសមាគមអាដហុកបានហៅការដាក់ពាក្យបណ្តឹងរបស់ក្រុមតំណាងជនជាតិដើមភាគតិចទាំងនេះថា ជាយន្តការថ្មីមួយដែលជួយពន្លឿននូវការចាត់ការរបស់តុលាការ។ លោកបន្ថែមថា អាដហុកនឹងផ្តល់មេធាវីដើម្បីជួយដល់ដំណើរការបណ្តឹងរបស់ប្រជាពលរដ្ឋជនជាតិភាគតិចនេះ។
សូមបញ្ជាក់ថា កន្លងមករដ្ឋាភិបាលកម្ពុជាតាមរយៈក្រសួងបរិស្ថាន បានដកហូត និងសម្រួលផ្ទៃដីពីក្រុមហ៊ុនវិនិយោគចំនួន១៩ក្រុមហ៊ុន ដោយសារមានបញ្ហាជាមួយប្រជាពលរដ្ឋ។ ទន្ទឹមគ្នានេះ សមាគមអាដហុក ក៏បានស្នើដល់រដ្ឋាភិបាល លុបចោលបន្ថែមទៀតរាល់កិច្ចសន្យាទាំងឡាយដែលក្រុមហ៊ុនបាននិងកំពុងដំណើរការ ដោយរំលោភទៅលើស្មារតីនៃអនុក្រឹត្យស្តីពីសម្បទានដីសេដ្ឋកិច្ច និងក្រមរដ្ឋប្បវេណីដែលកំពុងនៅជាធរមាន៕ ប្រភព ៖ rfi
