នារីអាស៊ីក្មេងសោះក្លាយជាកំពូលតារាម៉ូដែលល្បី លើឆាកអន្តរជាតិ!
កើតនៅថ្ងៃទី២៧ ខែមករា ឆ្នាំ១៩៨៨ ក្នុងទីក្រុង Yongzhou ខេត្តហួណាន ប្រទេសចិន សព្វថ្ងៃ Liu Wen បានក្លាយជាតារាបង្ហាញម៉ូតមួយរូប មានឈ្មោះល្បីល្បាញលើឆាកអន្តរជាតិ។
នាង Liu Wen
នាង Liu Wen ជាកូនស្រីទោលក្នុងគ្រួសារមួយ។ នៅវ័យជំទង់ ម្ដាយបង្កើតបានលើកទឹកចិត្ត និងចង់ឱ្យនាងមានវិជ្ជាជីវៈត្រឹមត្រូវ។ ម្ល៉ោះហើយទើបម្ដាយជំរុញឱ្យនាងញ៉ាំអាហារល្អ ថែរាង ដើម្បីចូលប្រកួតក្នុងកម្មវិធីបង្ហាញម៉ូដ។ ពេលចូលប្រកួតប្រជាប្រិយភាព និងកេរ្តិ៍ឈ្មោះរបស់នាងចាប់ផ្ដើមលេចធ្លោឡើង គួរឱ្យកត់សម្គាល់តាំងពីពេលនោះមក។
បច្ចុប្បន្ន នាងជាតារាម៉ូដែលស្រីទី១ ប្រចាំអាស៊ីបូព៌ា ដែលបានដើរម៉ូតក្នុងកម្មវិធីបង្ហាញឈុតក្នុង លំដាប់ពិភពលោក Victoria’s Secret Fashion Show ។
កេរ្តិ៍ឈ្មោះ ឆ្នាំ ២០១០ ដល់ ២០១៤
ឆ្នាំ២០១០ តារាវ័យ២៦ឆ្នាំរូបនេះបានក្លាយជាអ្នកនាំពាក្យដំបូងរបស់ក្រុមហ៊ុនលក់ផលិតផលថែសម្រស់ Estée Lauder នៅទីក្រុង New York ។ ឆ្នាំ២០១២ កាសែត The New York Times ដាក់ឈ្មោះនាងជា “កំពូលតារាបង្ហាញម៉ូដអាស៊ីទី១របស់ចិន”។ ក្នុងឆ្នាំ២០១៣ Liu Wen បានក្លាយជាតារាបង្ហាញម៉ូដអាស៊ីទី១ផងដែរ ដែលជាប់ជាតារាម៉ូដែលរកចំណូលបានខ្ពស់ លំដាប់ទី៥លើពិភពលោក ក្នុងទស្សនាវដ្ដី Forbes។
យ៉ាងណាទស្សនាវដ្ដី Forbes បង្ហាញទៀតថា នាងជាប់ជាតារារកបានចំណូលខ្ពស់លំដាប់ទី៦ ពោលគឺ ៧លានដុល្លារអាមេរិក ក្នុងឆ្នាំ២០១៤។ ខែមេសាឆ្នាំនេះ ទស្សនាវដ្ដីអាមេរិក Vogue បានកត់សម្គាល់ថា នាងជាតារាបង្ហាញម៉ូត មានអ្នកគាំទ្រច្រើនក្នុងបណ្ដាញសង្គម។
ដោយឡែក ក្នុងខែកក្កដា តារាកូនទោលរូបនេះត្រូវគេហទំព័រ Models.com ដាក់ឈ្មោះថា “New Supermodel” ។ មកដល់ខែតុលា Liu ជាមនុស្សទី១លើពិភពលោក ដែលបានបង្ហាញនាឡិកាដៃ Apple Watch លើគម្របទស្សនាវដ្ដី Vogue China ចេញផ្សាយនៅខែវិច្ឆិកាខាងមុខ។
កេរ្តិ៍ឈ្មោះ ឆ្នាំ ២០០៥ ដល់ ២០១០
Liu ចាប់ផ្ដើមអាជីពបង្ហាញម៉ូដដំបូងក្នុងកម្មវិធី New Silk Road World Model Contest ឆ្នាំ២០០៥។ កាលនោះជយលាភីបានលើនាង Du Juan ។ ទោះមិនបានឈ្នះក្នុងកម្មវិធីនេះ នាងបានក្លាយជាអ្នកបង្ហាញម៉ូដពេញម៉ោងភ្លាមៗដែរ ហើយនាងក៏ទទួលជោគជ័យ ក្រោយធ្វើការថតផ្សាយជាមួយទស្សនាវដ្ដីម៉ូដ Vogue និង Harper’s Bazaar។
ពេលថតសំលៀកបំពាក់ច្នៃម៉ូដដោយ Karl Lagerfeld និង Viktor and Rolf ក្នុងខែកញ្ញា ឆ្នាំ២០០៧ នាងបានធ្វើឱ្យឧស្សាហកម្មម៉ូដអន្តរជាតិក្លាយជាការចាប់អារម្មណ៍យ៉ាងខ្លាំង ។ ដល់ឆ្នាំ២០០៨ នាងត្រូវគេអញ្ជើញទៅទីក្រុងប៉ារីស ចុះហត្ថលេខាជាមួយភ្នាក់ងារមួយ (Agency) ដើម្បីចូលរួមកម្មវិធី Paris Fashion Week។
ក្នុងខែមករាឆ្នាំដដែល នាងបង្ហាញខ្លួនក្នុងទស្សនាវដ្ដី Chinese Vogue ហើយក៏បានបង្ហាញម៉ូដ នៅឆាកអន្តរជាតិ និងការបង្ហាញម៉ូដជាច្រើនទៀត។
មកដល់ខែមករា និងខែមិនា ឆ្នាំ២០០៩ Liu Wen បានចូលប្រឡូកស៊ុបក្នុងឧស្សាហកម្មបង្ហាញម៉ូដ ដោយដើរបាន៧៤ Show ក្នុងទីក្រុង New York, London, Milan, និង Paris។ ពេលរដូវកាលឆ្នាំ ២០១០ មកដល់ នាងដើរបាន៧០ Show ផងដែរ ក្នុងទីក្រុងទាំងបួននេះ។ ចំនួនបង្ហាញខ្លួនយ៉ាងច្រើននេះ បានធ្វើឱ្យនាងក្លាយជាតារាបង្ហាញម៉ូដ ដែលមានគេកក់ទុកច្រើន បន្ទាប់ពីតារាបារាំងនាង Constance Jablonski។
តារាល្បីប្រចាំនៅអាស៊ី និងឆាកអន្តរជាតិនេះ មានអាយុ២៦ឆ្នាំ កម្ពស់ ១,៧៨ ម៉ែត្រ ទម្ងន់៥០គីឡូក្រាម សក់ពណ៌ខ្មៅ និងភ្នែកពណ៌ខ្មៅ៕
ប្រែសម្រួល៖ អ៊ុំ សុភក្តិ
ប្រភព៖ បរទេស
ប្រភព៖ បរទេស
