កម្មករនាំគ្នាតវ៉ានៅមុខស្ថានទូតចិនដោយសារថៅកែរោងចក្ររត់ចោល
កម្មករប្រមាណ៨០០នាក់នៅរោងចក្រស្បែកជើងដែលទើបប្តូរឈ្មោះថ្មីពី”ហ៊ុយ ចៀន”ទៅជា “ចៀន ឡឹ” នៅថ្ងៃព្រហស្បតិ៍នេះ ដង្ហែក្បួនដាក់ញត្តិទៅស្ថានទូតចិនប្រចាំកម្ពុជា ឲ្យជួយអន្តរាគមន៍ទៅថៅកែរោងចក្រដើម្បីទូទាត់ប្រាក់អតីតភាពការងារ ខណៈក្រុមហ៊ុនបិទទ្វាជិត១ខែហើយ។
តំណាងកម្មកររោងចក្រ ជៀន ឡឹ ស្ថិតក្នុងភូមិជ្រោយអំពិល សង្កាត់ក្បាលកោះ ខណ្ឌមានជ័យ អ្នកស្រី ហោ ចន្ធី ឲ្យដឹងថា ពួកគាត់ធ្វើបាតុកម្មតវ៉ាជាច្រើនលើកចាប់ពីថ្ងៃទី១៥ ខែកញ្ញាមក ដើម្បីទាមទារលក្ខខណ្ឌពីរចំណុចគឺទី១ឲ្យទទួលយកតំណាងកម្មករ លោក ហេង ស៊ីហឿន ឲ្យចូលធ្វើការវិញ ទី២ទាមទារបើកប្រាក់ឈ្នួលអតីតភាពការងារដល់កម្មករ ដោសាយររោងចក្របានប្ដូរឈ្មោះពីរោងចក្រ ហ៊ុយ ចៀន ទៅជារោងចក្រ ចៀន ឡឹ ហើយបិទទ្វាររោងចក្រចាស់។
កម្មកររោងចក្រស្បែកជើង ចៀន ឡឹ នាំគ្នាតវ៉ានៅមុខស្ថានទូតចិននារសៀលថ្ងៃព្រហស្បតិ៍នេះ (រូបដោយ៖ សុភាព)
កម្មករម្នាក់ទៀត កញ្ញា កេង ណារី ព្រមានថា បើស្ថានទូតចិនមិនរកដំណោះស្រាយជូនកម្មករទេ នោះពួកគេនឹងបន្តធ្វើបាតុកម្មនៅមុខស្ថានទូតនេះរហូតមានដំណោះស្រាយ។
អគ្គកុងស៊ុលស្ថានទូតចិនប្រចាំកម្ពុជា លោក យ៉ាង ឈីងលាង ដែលទទួលយកញត្តិរបស់កម្មករថ្លែងថា លោកនឹងព្យាយាមជួយអន្តរាគមន៍ទៅភាគីក្រុមហ៊ុនឲ្យពន្លឿនដោះស្រាយជូនកម្មករ តាមលទ្ធភាពតាមដែលអាចធ្វើទៅបាន។
ដោយឡែក នៅថ្ងៃព្រហស្បតិ៍នេះ តំណាងកម្មករឲ្យដឹងថា ពួកគេក៏នាំគ្នាទៅក្រសួងការងារ ដើម្បីសួរពីលទ្ធផលដែលពួកគេធ្លាប់ដាក់ញត្តិឲ្យស្ថាប័ននេះជួយរកដំណោះស្រាយដែរ តែមិនទាន់មានការឆ្លើយតបពីក្រសួងនៅឡើយ។
ករណីនេះVOD មិនអាចសុំការអត្ថាធិប្បាយពីអ្នកនាំពាក្យក្រសួងការងារលោក ហេង សួរបានទេ។
ប្រធានសម្ព័ន្ធសហជីពជាតិ លោក ហ្វា សាលី ថ្លែងនៅមុខស្ថានទូតចិនថា រដ្ឋាភិបាលចិនមុននឹងបញ្ជូនអ្នកវិនិយោគចិនមកកម្ពុជាត្រូវពង្រឹងផ្នែកច្បាប់ដល់ពួកគេ ដើម្បីបញ្ចៀសកុំឲ្យមានជម្លោះផ្សេងៗរវាងនិយោជក និងកម្មករនិយោជិត។
ក្រុមអ្នកតវ៉ាឲ្យដឹងទៀតថារោងចក្រដេរស្បែកជើង ហ៊ុយ ចៀន ឬចៀន ឡឹ បង្កើតឡើងនៅឆ្នាំ២០០៦ ស្ថិតក្នុងភូមិជ្រោយអំពិល សង្កាត់ក្បាលកោះ ខណ្ឌមានជ័យ រាជធានីភ្នំពេញ មានកម្មករសរុប១២០០នាក់។ ការធ្វើកូដកម្មតវ៉ានេះមានរយៈពេលជាងកន្លះខែហើយ តែរហូតមកដល់ពេលនេះនៅតែមិនទាន់មានដំណោះស្រាយនៅឡើយ៕ ប្រភព ៖ VOD
